Kə̀fàʼ 23

1Yəə Pôl tiy anə sə kə ghu a ndàw ìsaʼà yìy, u lia yə̀ àghù yə̀ ghu kə də nəniy a ndàw ì saʼa yìy, u dzày tsə nə̀, “Awizə̂, ani bù kwùm tsə zii, mə faʼà awò Zə̀kìy nə̀ fòŋ yam ìdzòŋə̀ yìy.” 2Wù ùlwaʼà ùnè wə̀ ghu kə twoŋə nə̀ à də̌ Ànàniyàs ə tsày tsə kəlâŋ nə̀ aghû yə̀ ghu kwùlì təmi doʼò nəniy akə̀lə̀ Pôl, ghu bwad we anə idzwə anə yiə yə ù dzày nəniy ndzòʼò ayiə yiy. 3Pôl ə fə̀d dzày yə̀ â dòŋ kə mbwòʼ kə̀ a we nə̀, “Zə̀kìy kî bwalə sòʼò ŋwò wô.Wò ŋwamə zəŋə dzìy a dzây tsə nə̀ wò də̌ wù ùdzòŋə̀ wìy də̌ ghii nə̀ wò də̌ wù ùbɛbə̀ wìy. Wò dzìy nə̀ wò saʼa miə an-a-làŋ, kwuni zaʼa kə̀làŋ anə ayiə yə wò dzày nəniy nə̀ ghu bwad miə.”

4Aghû yə̀ ghu kə də nəniy akə̀lə̀ Pôl, ghu mee â Pôl a we nə, “Wò ghii nyàʼà wù ùlwaʼà ùnè ù Kəzə̀ wìy.”

5Pôl ə bə̀lì kə a ghu nə, “Awizə̂ Mə mə̀ kwu dzə̀ way nə̀ à də̌ wù ùlwaʼà ùnè wìy. Ŋwàʼà k-a-zə̀ kìy dziy nə̀ ‘Wò kwu dzə̀ way ani dzày àyiə bɛbə yiy â wù wə̀ ù də nəniy tuw kiy.’ ”

6Yəə Pôl kòʼ tsə nəniy nə̀ aghê Sadùsî nə̀ àghě Falàsî yìy kə də̀ sòʼo awò anə ŋwàâ kə ghù kə̀, u bwoʼ fyi kə kəbôŋ idoŋ dzày tsə nə̀, “Aghê Islàel yoow! Mə də wè Falàsî, wà àghě Falàsî. Ghu kwi na bə̀ mìə̀ fə bòʼ yiə yə mə kwu nəniy anə fôŋ yam nə̀ aghê pfə yiy nî zɛ̀mə̀ dzwəŋə bə̀ ŋwò, ghu ni muə bòʼ ibɛmə yə mə kwu.”

7Anə yiə yə ghu zuw tsə nəniy ayiə yə Pôl dzày tsə nəniy ghii, ŋwàâ kə ghè kə̀ kaʼ yə̀ ani zwìy anə iwè, sàlì dòʼò yə̀ anə ukaʼ, 8aŋwòə aghee Sadùsî yìy kə dzìy nə̀ abu wù pfə dzə̂ nəniy, ù kàm wày dzə ani zɛ̀mə̀ dzwoŋi dzə̀, dzìy sòʼò nə̀ tsə̀təndii t-a-zə̀ tìy way koʼ dzə, nə̀ nsìy mìy dzə soʼo. Falàsî tìy kwuni bɛmə nə̀ abu wù pfə tsə, ù nì kàmə̀ zɛmə̀ dzwəŋə ŋwò anə ipfə. Ghu bɛmə sòʼò nə̀ tsə̀təndii t-a-zə̀ tìy də ŋwô, nsìy mìy də soʼo. 9Mbòŋ mə̀ ghè mə̂ kàm ŋge dùw tsìy tsə. Aghê tyiə de ulàŋ àliy yiy à kə də nəniy aghee Falàsî, ghu ŋwò təmi kə idoŋ dzày tsə anə dzə̀ tə̀ taw tiy nə̀, “Ghè koʼò dzə̀ wày iyiə ìbɛbə ìliy yiy wù wə̀ zəŋi nəniy. À nyə̀ ni də nə̀ tsə̀ndii ə Kə̀zə̀ mə ndzə̀m bù dzə̀ŋì nə̀ we, moo usîy ùliy wiy mə̀ nyiə̀ bù dzəŋì nə̀ we.”

10Utswə̂d wə̀ ba kàm dùw fyi fwuli yə̀. Wù kə̀làŋ unè wə̀ ə tsəŋ, mòʼò kə nə̀ ghu kî kwi tsə Pôl ghu kaʼ sâ anə məmbə̀lə̀. U tsày yə̀ kə̀làŋ awò sǔgôʼ tə we tiy nə̀ ghu nîy ŋwô Pôl anə awo kə ghù yə̀, ghu zû dzwoŋi nə̀ we anə kəbali.

11Abù nə̀ ntsukə tə ghè tə̀, Mwe ə̀ mbyi bù təmi kə akə̀lə̀ Pôl, dzày tsə a we nə̀, “Kəə wò nə̀ tsəŋə dzə̂. Yəə wò kə naʼà nəniy ntwumə awò àghě Yèlusalèm yìy, à də̀ sòʼò ighəd wò kì kwu nəniy ani nàʼà awò àghě Lûm yìy.”

Aghee Dzû yìy kə byay tsə ani wiy màʼà Pôl

12Tswutswu wə, aghê Dzû àliy yiy kwi tsə kədzəŋə byay tsə, nyi kə sòʼò mə̀ŋkà nə̀ ghu kî nyi dzə̀ wày fyiə kə̀liy kiy, ghu kî mu sòʼò wày fyiə kə̀liy kiy à mày kə nə̀ ghu mə wiy màʼà Pôl. 13Utuw u ghu wə̀ ghu kə byay nəniy ayiə ghè yə̀, ghu kə tsìy fyi ŋwô mvəm miy inkyàʼì. 14Ghu ŋwò kə zù akə̀lə̀ ŋgəd tə aghè àlwaʼa tiy, nə̀ ŋgəd tə inaʼ tiy, dzày yə̀ aghu nə̀, “Ghè mə nyi ŋkà mìy nə̀ ghè kî nyi dzə̀ wày fyiə kə̀liy kiy à mày kə nə̀ ghè mə Pôl wiy màʼà. 15Gha nə̀ àghè ndàw ìsaʼà yìy, ghà twum yə̂ ntwum nyiə awò wù kə̀làŋ unè wìy nə̀ ù bù nə̀ Pôl akə̀lə̀ ghà. Ghà ŋwam dzây yə̂ a we nə ghà liə ani bəb dzwâb tsə ayiə kwùmə̀ yə̀ nə̀ Pôl. Ghè kwuni ŋwò tsə kə nyiə ghè zû bvə̀ ləmə yə̂ we anə dzəd, ghè ki wiy maʼà tsə we nə̀ ù kə ndwâm bû kwûm dzə̀ fə.”

16Yəə wà àzə̀ Pôl ùyəŋi, à kə də nəniy wà ùŋəmə̀ kə zuw tsə nəniy ayiə yə̀ ghu byay nəniy ani wiy màʼà Pôl ate, u zù anə kəbali, dzày yə̀ àyiə ghè yə̀ awò Pôl. 17Pôl ə dyaŋi twoŋə tsə sǔgôʼ ìmòʼ dzày yə̀ a we nə, “Nìy zǔ nə̀ wa nə̀ akə̀lə̀ wù kə̀làŋ ùnè wìy, ù kwu iyiə ani dzày awò we.” 18Sǔgôʼ ìghè yə̀ ə nìy kə wa nə zù nə̀ we akə̀lə̀ wù kə̀làŋ unè wə̀, dzày yə̀ a we nə, “Pôl wə̀ ù də nəniy a ndàw ntsaʼ, ù twoŋə tsə miə dzìy mə nîy kə wa nə̀ mə bû nə̀ we akə̀lə̀ wò aŋwòə ù kwu iyiə ani dzày bə̀ â wò.”

19Wù kə̀làŋ unè wə ə kwi tsə wa nə̀ anə ukwe, nìy nyi kwoʼ yə̀ nə̀ we, bəb tsə a we nə, “Wò dziy dzày nə̀ indiə â mìə̀ ə?”

20Wa nə dzày yə̀ a we nə̀, “Aghê Dzû àliy yiy byay na nə̀ ghu kî dzìy bə̀ tswutswu nə̀ wò nîy tswi bə̂ nə̀ Pôl a ndàw ìsaʼà yìy, ghu ki ŋwamə dziy nə̀ ghu dziy bəb dzwâb tsə ayiə awò we. 21Mə kwuni bwoʼo bə̀ wò nə̀ wo kiy, kəə wò nə̀ zəŋə dzə̂ àyiə yə ghu kî dzîy nəniy nə̀ wò zəŋi. Aghû yə̀ byay na ani wiy màʼà Pôl, ghu tsîy fyi ŋwô vəm miy inkyàʼì. Ghu mə nyi ŋkà mìy nə̀ ghu kî nyi dzə̀ wày fyiə kiy, ghu kì mu sòʼò wày fyiə kiy. À mày kə nə̀ ghu mə wiy màʼà Pôl. Ghu lyimə nyiə̀ ani zuw ayiə yə wò kwu ani dzày.”

22Wù kə̀làŋ unè wə̀ ə̀ dzày tsə awò wa nə̀ a we nə, “Kəə wò nə̀ dzîy dzə̂ â wù lìy nə̀ wò mə dzày nyə̀ ayiə yə awò mìə̀.” U dyaŋi dzày nə̀ wa nə̀ ŋwò zù a ndaw.

Ghu twum zù Pôl a Kàsaliyà

23Wù kə̀làŋ unè wə̀ ə twoŋə tsə sǔgôʼ tə we ìbè dzày tsə a ghu nə̀, “Ghà byay na tsə tə sǔgôʼ mə̀bwàm ìmbè, ghà byay na tsə aghee uŋkhinyàm mə̀vəm insèmbe, ghà byay na tsə soʼò tə̀sǔgôʼ mə̀bwàm ìmbè ghu kî bwìy nəniy anə ifwe nə̀ wuŋ tiy ani zù a Kàsaliyà anə fwa tə iwùŋ ìbwùkə nə̀ ntsukə tiy. 24Kaw tsə nə ùŋkhinyàm ùliy wiy, ghà nyiə̀ tsə â Pôl ù ki nyəŋə yə̂ ate ani zəŋi tsə nə̀ ghà zû kwûm dzwâb yə̂ a kə̀lə̀ Fɛlìks, ù kə də nəniy wè kə̀tuw a mbwòʼ ə̀ Kàsaliyà.” 25Wù kə̀làŋ unè wə̀ dyaŋi twà tsə kəŋwàʼà yəə ghu dziy ŋwò dzày tsə ate nə̀,

26“À ŋwàʼà kə̀ twà bə̀ mìə̀, Klodiyùs Lisìyàs. Mə twâ yə̀ awò wù ù nè wìy Fɛlìks; Mə twoŋə zuw bə̀ wò! 27Aghê Dzû yìy kə kwi tsə̀ wù wə̀ fə, ghu liə sòʼò ani wiy maʼà dyaŋi we. Mə bû kəli fyi kə nə̀ à də̀ wè Lûm, mə nîy kə nəniy sǔgôʼ tam tə̀liy tiy nə̀ ghu bii fyi we anə wo kə aghě Dzû. 28Mə kə liə ani kəli sòʼò sələ kə iyiə kə ghu kə kwi nəniy we ate, mə nîy kə we tswi yə̀ nə̀ we anə ndàw ìsaʼà yìy. 29Mə bù kəli fyi kə nə̀ ù kə̀ zəŋi dzə̂ iyiə ìbɛbə ìliy yəə ghu nə wiy we ate, moo yəə ghu nə̀ fê na we ate a ndàw ntsaʼ. Ayiə yiə ghu kwi nəniy we nə̀ ù zəŋi ŋwô a kwùmə̀ yə̀ nə̀ àyiə ulàŋ u ghu wiy. 30Yəə mə kəli fyi kə nə̀ ghu khu dzəd ani wiy we, mə dyaŋi twum bû nəniy we akə̀lə̀ wò. Mə dzây soʼò nəniy nə̀ aghû yə̀ ghu kwi kyabə tsə̀ nəniy we, ghu nîy bû nə̀ nsàʼ ìghè yə̀ akə̀lə̀ wò.”

31Sǔgôʼ tə̀ ə bvwami zəŋi sòʼò iyiə yə wù kə̀làŋ ùnè wə̀ dzày nəniy. Ghu nìy kə sòʼò Pôl nə̀ ntsukə tə ghè tə̀ zù nə̀ we a Àntipatlìs. 32Tswutswu wə̀, sǔgôʼ tə̀ ghu kə bwîy nəniy anə ifwe, ghu bù dzwoŋi anə kəbali. Sǔgôʼ tə̀ ghu kə nyi kə nəniy anə uŋkhinyàm, ghu tsə̀ŋə̀ zèe kə nə̀ Pôl. 33Abù ghu zû kwùm tsə nəniy a Kàsaliyà, ghu nìy kə ŋwàʼà kə̀ nyìə̀ â Fɛlìks, nìy nyiə̀ tsìy yə̀ sòʼò Pôl â we. 34Yəə Fɛlìks twoŋə kə nəniy ŋwàʼa kə̀, ù bəb yə̀ awò Pôl a we nə̀ ù fyi anə mbwòʼ ì ghà yìy. Pôl mee a we nə̀ ghe fyi a mbwòʼ ə̀ Sìlisìyà. Abù ù kaw kəli fyi kə nə̀ Pôl fyi anə mbwòʼ ə̀ Sìlisìyà, 35u dzày yə̀ awò Pôl a we nə̀ “Mə kî zwulə àyiə yiə̀ à dziy yiy a ki bu aghû yə̀ ghu kwi nəniy wô ghu bû dzày bə̂ dzə̂ nəniy ayiə yə ghu kwi wô ate.” Abù ù dzày tsə nəniy ayiə yə ghii, u nyiə̀ tsə kəlâŋ nə̀ sǔgôʼ tə we tiy si kyiŋə tsə Pôl anə ntòʼò Helòd.

Currently Selected:

Kə̀fàʼ 23: isu

Highlight

Compare

Copy