Kə̀fàʼ 22

1“Awizə̂ yamə, nə nə̀ təli yamə, ghà zwuli tsə mə tyi dzây bə̂ àyiə yə a kə fyi nəniy.” 2Abù ŋwàâ kə zuw tsə nəniy, Pôl dzə̀ŋə̀ nə̀ ghu anə idzə̀ŋi Hiblù à kə də nəniy idzəŋi ghu yiy, ghu kàm ŋwò dòʼò tsə moŋ ghu zuw.

Pôl tsìy yə̀ kə nə̀ sə kiy ani dzày a ghu nə, 3“Mə də wè Dzû, ghu miə byi anə inaʼ i Tasùs yə̀ i də nəniy anə mbwòʼ ə̀ Sìlisìyà. Mə kwuni nɛmə fə a Yèlusalèm. Gàmalìyèl kə də̌ àtyi dè wam. Ghu bwa tyili fyi kwoʼ bə̀ miə̀ anə ulàŋ u nə̀ tě ŋgàŋ a səsə yiy ùdzə̀m. Mə bvami kwu ighaa â Zə̀kìy ighəd anə yiə yə ghà kwu nəniy gha yə àdzə̀m ghà də nəniy zii fə. 4Mə kə zəŋə tsə̀ ùtswə̀d nə̀ aghù yə̀ ghu kə dzwùmə̀ nəniy dzə̀lə̀ ìmùə̀ yə̀ Mwe ə̀ mbyi dê na nəniy. Mə kə kwi tsə̀ àghè aliy yiy mə wiy màʼà ghu, mə kwi fyìə̀ nia àliy yiy a ndàw ntsaʼ. Mə kə nia dyaŋə dzə̀ wày ìsə yiy nə̀ à də̌ iyəŋi moo à də̀ iŋə̀mə̀. 5Wù ùlwaʼà ùnè wìy nə̀ àghè ndàw ìsaʼà yìy də ŋwô ani dzày bə̀ â ghà nə̀ ayiə yə mə dzîy nəniy à də̀ ayiə àsoŋə̀ yìy. Ghu maa nyiə̀ miə nə̀ ŋwàʼà kìy nə̀ mə zû nyiə̀ yə̀ awò ŋgəd tə ghě Dzû tìy anə inaʼi Dàmaskòs. Ŋwàʼà kə ghè kə nyiə̀ miə̀ nə̀ daʼa kiy nə̀ mə kwi bə̂ àghù yə̀ ghu bɛmə nəniy â Yesù, mə bû nə̀ ghu anə inaʼ i Yèlusalèm, awò ghu ani nyiə̀ ghu nə̀ mfəm.”

Pôl kə tyi dzày yəə ù kə bɛmə Zə̀kìy ate

(Kə̀fàʼ 9.1-19; 26.12-18)

6“Mə kə zè anə inaʼ i Dàmaskòs a tsuk fə̀liy fiy, mə swələ mìà yə̀, nə̀ inyi yiy tyimə kwoʼo bə̀ tsitsi, kaʼì tə̀liy tiy màŋ mwà fyi tswi bə̀ anə imwà ìsoŋə̀ yìy an-a-byiwuŋ azoŋə̀ mìə̀. 7Mə bvə̀ tswi tsə ambvə̀dintsə, zuw dzə̀ ìlìy yìy ì bəbə bə̂ nəniy awò mìə̀ nə̀, ‘A Sôl, a Sôl! À də̌ kiə̀ wò khu nəniy miə nə̀ ùtswə̀d wìy ə?’ 8Mə bəb tsə nə̀, ‘A Mwe, wò də̀ ndiə?’ U dzày tsə awò mìə̀ nə̀, ‘Mə də Yesù wà inaʼi Nazalèt wə̀ wò khu nəniy miə nə̀ utswə̀d wìy.’ 9Aghû yə̀ mə kə də fwumi nəniy nə̀ ghu, ghu kòʼ yə kaʼì tə̀ mwà fyi tswi bə̂ nəniy azoŋə̀ mìə̀, kə̀ kwuni zuw dzə̂ nəway dzə̀ yə̀ ì kə dzəŋə̀ nəniy. 10Mə bəb tsə awe nə, ‘A Mwe ə̀ mbyi, mə də ani zəŋi yə̀ mə̀yə?’ Mwe ə̀ bə̀lì kə â mìə̀ nə̀, ‘Ŋwòə kə idoŋ wò nyi yə̂ anə inaʼ i Dàmaskòs, ghu ki bû dzây bə̂ àyiə yə wò kwu nəniy ani zəŋi.’ 11Kaʼì tə ghè tə̀ kə ŋge mwà ŋwò tə zəŋi miə mə kàm way ani kòʼ tə̀loʼo. Aghû yə̀ mə kə də nəniy nə̀ ghu, ghu kwi tsə miə anə ukwe, tàlì nyi yə̀ nə̀ mìə̀ anə inaʼ i Dàmaskòs.

12Wè lìy kə də̀ awote anə inaʼ ghu kə twoŋə nə̀ à də̌ Ànàniyàs, ù kə fwùlə tsə̀ Kə̀zə̀ nə̀ fòŋ ə̀ we idzə̀m, zəŋə sòʼò à yiə yə ulâŋ u Kəzə̀ wìy kə dzîy nəniy, u bù ani bù kòʼ mìə̀. Aghee Dzû yə̀ ghu kə də nəniy awote, ghu ŋge nyiə̀ tsə̀ we nə̀ ŋkwiʼi miy. 13U zù bù təmi kə akə̀lə̀ miə̀, dzày tsə nə̀, ‘Àzə̀ wam Sôl, wò kwu ani kaʼ tsə nyiə ani kàm kòʼ tə̀loʼo.’ Mə bvami kaʼ təŋ tsə kə anə sòŋə fə ghè fə ani kòʼ tə̀loʼo. 14Ànàniyàs dyaŋi dzày tsə awò mìə̀ nə̀, ‘Zə̀ kə nə̀ nə̀ tě ŋgàŋ asəsə mə wò sây nə̀ wò kəli tsə àyiə yə fòŋə̀ ìghe liə. Ù mə sày sòʼò wô nə̀ wò doʼò wè kə̀fàʼ ə̀ we wə ù də nəniy tsitsi. Wò zuw soʼò dzə̀ we. 15Wò kwu ani dzày yə̀ fyiə kə wò kòʼ nəniy nə̀ àyiə yə wò zuw awò aghè dzə̀m. 16Wò lyimə kə kiə̀ nyiə̀ yə? Ŋwòə kə idoŋ, tə̀ ghu nyiə̀ wò nə̀ mwi m-à-zə̀ mìy, wò nyiə̀ yə̂ ùwè niə̀ â Yesù, wò gwùŋì yə̂ soʼò awò Zə̀kìy tə̀ kə sûw maʼà ìbɛb yiə̀.’ ”

Mwe ə̀ mbyi kə dzày nə̀ Pôl nàʼà ntwùm ə̀ ìdzoŋə̀ yìy â àghù yə̀ ghu də wày aghee Dzû

17“Abù ayiə yə̀ tsìy ŋwô tsə nəniy, mə ŋwò zù dzwoŋi anə inaʼ i Yèlusalèm. Ntsuk ù liy, mə gwùŋì a ndàw Kə̀zə̀, Zə̀kìy dè bə̀ àyiə awò mìə̀. 18Mə kòʼ yə̀ Mwe ə̀ mbyi, u dzày bə̀ â mìə̀ nə̀ ‘Zə̀àŋi zəŋi yə wò fyi ŋwô a Yèlusalèm. Aghê ghè yə̀ liə dzə̀ wày ani zuw ayiə yə wò dziy dzây awò ghu kwùmə̀ yə̀ nə̀ mìə̀.’ 19Mə bə̀lì kə a we nə, ‘A Mwe ə̀ mbyi, ghu kwu dzwàb ŋwô nə̀ mə̀ kə zè tsə̀ anə ndaw tə udzəŋə tələ, mə kwi, bwalə tsə̀ àghù yə̀ ghu kə bɛmə nəniy â wò. 20Soŋə fə ghu kə wiy maʼa tsə nəniy Stifə̀n wə̀ ù kə niʼà nəniy ntwum yiə̂, mə kə də̌ awote nə̀ ùwe nam wiy, tòʼò kyalə àghù yə̀ ghu kə wiy maʼà nəniy we. Mə kyìŋì sòʼò ndzwu tə ghù yə̀ ghu kə wiy nəniy we.’ 21Mwe ə̀ mbyi bə̀lì kə â mìə̀ nə̀, ‘Ŋwòə yə mə kî kwu ani twum zù này wò akə̀lə̀ àghù yə̀ à də wày aghê Dzû.’ ”

22Ŋwàâ kə ghù kə̀ ə zwuli kə àyiə yə ghii Pôl dzày mà tsə. Ghu ŋwò bvuʼi fyi kə məmbòŋ idoŋ nə̀ “Wiy màʼà nənìy wù wə̀, ù kə̀ kpe dzə̂ ani dòʼò utaw.” 23Ghu tsə̀ŋ kwu kə ani bvuʼi məmbòŋ, tsoʼo kə tə̀ndzwu fyɛbə idoŋ, dzə̀ ə̀ kə tə̀zuub wàŋə̀ fyiə kə idoŋ ani dè tsə nə̀ ghu kə ŋə̀mə̀ nə̀ fòŋ tìy. 24Wè kə̀tuw anə aghě Lûm ə tsày yə̀ kə̀làŋ awò wù kə̀tuw anə aghè ulàŋ a Lûm nə̀ ghu nîy zû nə̀ Pôl a ndàw ntsaʼ, ghu zû bwad we ani kaw kəli fyi kə nə̀ à də̌ kìə̀ aghû yə̀ si bvoʼə nəniy mbòŋ mìy kwùmə̀ yə̀ nə̀ Pôl. 25Abù ghu kwû na tsə nəniy we ani bwad, Pôl kwuni dzày yə̀ awò wù tə̀sǔgôʼ ùnè wə̀ a we nə̀, “Lâŋ kìy də ŋwô nə̀ a bwad wè Lûm nə̀ a kamə kaw kəli fyiə kə ù zəŋi bɛb ə̀?”

26Abù wù kə̀làŋ wə̀ zuw tsə nəniy ayiə yə ghii, u zù akə̀lə̀ wù kə̀làŋ ùnè wə̀, bəb yə̀ a we nə, “Wò zəŋə kìə̀ ghii? Wù wìy də̌ wè Lûm.”

27Wù kə̀làŋ ùnè wə̀ zù akə̀lə̀ Pôl bəb yə̀ a we nə̀, “Wò də̌ wè Lûm yə̀?” Pôl bɛmə kə a we nə, “Ìny, mə də wè Lûm.”

28Wù kə̀làŋ ùnè wə̀ ə dzày tsə nə̀, “Mə kə tsə ndə̀mə̀ ùkhiy ani bù dòʼò tsə wè Lûm.” Pôl ə bə̀lì kə a we nə, “A kwuni bû miə, təli wam nə̀ zə̂ wam, ghu də aghê Lûm, mə də wè Lûm.”

29Aghû yə̀ ghu kə dziy bəb ayiə â Pôl, ghu bwad soʼò we, ghu dyaŋi ŋwò soŋ fyi yə̀ ibàm. Itsəŋi yiy kwi Wù kə̀làŋ ùnè wə̀ yəə ù kəli fyi kə nə̀ ghe fə̂ kwi kwù na yə̀ wè Lûm anə təntsaʼ.

Ghu nìy zù nə̀ Pôl a ndàw ìsaʼà yìy

30Wù kə̀làŋ ùnè wə̀ kə ba liə ani kəli tsə fyiə kə aghê Dzû yìy kə dziy nə̀ Pôl zəŋi bɛb ŋwô. Tswutswu wə̀, u dzày yə̀ nə̀ ghu nìy fyi bə̀ Pôl a ndàw ntsaʼ, zè ŋwò tsə təntsaʼ azoŋə̀ we. Dòŋ kə̀ ə twoŋə dzəŋə na bə̀ ŋgəd tə aghè àlwaʼa tiy nə̀ àghě ndàw ìsaʼ a yìy à dzə̀m. U nìy bə̀ Pôl, təmi na bə̀ we anə səsə kə ghù yə̀.

Currently Selected:

Kə̀fàʼ 22: isu

Highlight

Compare

Copy