Kə̀fàʼ 18

Pôl ə zù nàʼà ntwùm ə̀ Kə̀zə̀ a Kolìn

1Pôl kə ŋwò tsə anə inaʼ i Atèns zù a inaʼ i Kolìn. 2U zù kway yə̀ wê Dzû ùlìy wìy awote ghu kə twoŋə nə a də̀ Àkwilà, u kə fyi nəniy a mbwòʼ ə̀ Pontùs nə̀ ù bvwami kwùlì ŋwò bə̀ kə a inaʼi Italì, nə̀ wiy we izəd i kə də nə̀ à də̌ Plìsilìyà. I kə də̀ ghi aŋwòə Klòdiyùs, dòŋ kə Lûm kìy kə tsày lâŋkìy nə̀ aghê Dzû àdzə̀m ŋwô fyi a Lûm. Pôl ŋwò tsə ani zù kòʼ ghu. 3Pôl ə dòʼò awote fàʼà fwumə nə̀ ghu aŋwòə u kə də̀ wù wə̀ ù kə bwukə tsə̂ nəniy ùmfwùə#18.3 Ndzòʼò ùfwùə wə ghu kə taw bwukə tsə̂ ghu fwìy kə anə gùw tə tə nyàm wiy, kyilə ùkhiy ate ani zwe ufânyiə wiy ighəd anə yiə yə Àkwilà kə faʼà nəniy we nə̀ Plìsilìyà. 4Ntsukə mə̀ zwaa mìy ìndzə̀m, Pôl kə zè tsə̀ a ndàw kə̀dzəŋə. U zè tyi dziy ayiə â àghě Dzû nə̀ àghù yə̀ ghu də wày aghee Dzû, ani zəŋi tsə nə̀ ghu bɛmə kə â Zə̀kìy.

5Abù Silàs ŋwò tsə nəniy a Mèsèdonìyà nə̀ Timotì bù kwùm tsə a Kolìn bù kway bə̀ Pôl, Pôl nìy kə soŋə fə we ani nàʼà ntwùm idzoŋə yìy awò àghě Dzû, tyi dzìy yə̀ sòʼò a ghu nə̀ Yesù də̀ wù wə̀ Zə̀kìy sûw kyili na nə̀ ù dòʼò kə̀dòŋ. 6Abù ghu kwuni twe màʼà ayiə we à dziy yiy, dzày sòʼò ayiə àbɛbə azòŋə we, u bwoʼ màʼà tsə̀ bvû kə̀ kə kə də anə ndzwu tə we awote anə inaʼ, ani dè tsə awò ghu nə̀ mfə̀m ə̀ Kə̀zə̀ yìy limə ghu. U dzày tsə a ghu nə̀, “Abu Zə̀kìy nyiə̀ gha nə̀ mfəm, wo kam kiy way ate. Mə ŋwô tsə nyiə mə zû akə̀lə̀ àghù yə̀ ghu də wày dzə aghee Dzû.” 7Yəə Pôl dzày mâ tsə nəniy ayiə yə, u dyaŋi ŋwò zù a ndàw wù wə̀ izəd yiy kə də nə̀ à də̌ Taytùs Dzustùs wə̀ ù kə fwùlə̀ tsə nəniy iwe yiy nə̀ Zə̀kìy. Ndàw we kə kwùlì də̀ kə akə̀lə̀ ndàw dzəŋə kə ghee Dzû. 8Klipòs, ù kə də̀ nəniy tuw kiy a ndàw dzəŋə kə ghě Dzû, u zuw tsə ayiə yə Pôl niʼà nəniy, u bɛmə kə Kəzə̀ nə̀ isəd i ndaw i we yiy. Ndə̀mə̀ àghù a Kolìn ə zuw tsə sòʼò ntwùm ə̀ Kə̀zə̀ yə̀ Pôl niʼà nəniy, ghu bɛmə â Zə̀kìy, nìy kə mwi m-à-zə̀.

9Nə̀ ntsukə tə̀liy tiy, Mwe ə̀ mbyi ə dzə̀ŋì yə̀ nə̀ Pôl anə udzɛ̀mə̀ dzày yə̀ awe nə̀, “Kəə wò nə̀ tsəŋə, i niʼa yə ntwum yə, kə̀ doʼò dzə̀ moŋ, 10aŋwòə mə də nə̀ wò. Wè lìy kì mwàm dzə̀ wày wô, ù zəŋi wô nə̀ ìyiə ibɛb ìliy yiy. Ndə̀mə̀ àghù fə anə inaʼ yə̀ də̀ aghû yam.” 11Pôl dòʼò kə̀ŋə̀m nə̀ boʼ kiy a Kolìn nə̀ ù tyiə dè kə ntwùm ə̀ Kə̀zə̀ awò àghě ghè yə̀.

12Abù Galìyò kwoʼ kə anə ndàŋə̀ kə̀dòŋ a mbwòʼ ə̀ Àkayà, ŋgəd tə aghě Dzû yə̀ ghu kə də nəniy awote a Kolìn ə bù kwi kə Pôl nìy zù nə̀ we a ndàw ìsaʼà yìy ani zù saʼ we. 13Ghu dzày tsə nə̀, “Wù wə̀ zəŋə nə̀ aghê si fwulə Zə̀kìy anə ayiə ŋwò yiy nə̀ àwày dzə ani yiə yə ulàŋ u ŋgàŋ wìy dzîy nəniy.”

14Yəə Pôl dziy bvwami dzə̀ŋi fyi bə̂, Galìyò ə dzày yə̀ â aghê Dzû yìy a ghu nə, “Abu ghǎ mə̀ fə̀ dzìy nə̀ wù zə̀ zəŋi iyiə ìliy moo nə̀ ù zəŋi iyiə ìbɛbə yiy anə làŋ kə ŋgàŋ, Mə mə̀ zuw kəli bə̀ ghà. 15Yəə ghà kwuni mâŋ bə̀d nəniy ayiə yiy, nə̀ àzəd yiy, nə̀ àyiə ulàŋ ghii wiy, byay yə̀ nənìy nə noŋə̀ ghà. Mə saʼa dzə̀ wày ndzoʼò iyiə yiy yəə à də̌ ìyiy.” 16Abù ù dzày mâ tsə nəniy ayiə yə, u dzwùm ŋwò fyi ghu a ndàw ìsaʼ i ghè yə̀. 17Ghu dzə̀m ə kwi tsə ŋgə̀d ə̀ ndàw dzəŋə kə ghě Dzû ù lìy wìy, ghu kə twoŋə nə̀ à də̀ Sòstên, bwad we, anə sə kə ndàw ìsaʼ yə̀. Galìyò ə kə̀ kwuni dzây nəway iyiə yiy ate.

Pôl dzwoŋi zù a Antìyòk a mbwòʼ ə̀ Silìyà

18Pôl dòʼò ndə̀mə̀ ntsukə nə̀ àghě Kə̀zə̀ yìy a Kolìn. U dzày tsə â ghu nə̀ ghu dòʼò kədzôŋ, dyaŋi nìy kə kəmfə̀n ŋwò dàŋ fyi yə̀ a mbwòʼ ə̀ Silìyà, we nə̀ Àkwilà nə̀ Plìsilìyà. Â we ani ŋwò tsə a Sìŋkliyèl, ù kə kwam tsə dzə̀ kə̀tuw aŋwòə ù kə tɛb na â Zə̀kìy nə̀ ghe nî zəŋə ghii. 19Ghu zù kwùm tsə a Efesùs, Pôl na səə tsə Plìsilìyà awote nə̀ Àkwilà, dyaŋi zù tsìy nyi yə̀ a ndàw dzəŋə kə ghě Dzû, tyi dzày ayiə awote awò aghě Dzû. 20Aghee ghà yə̀ mee a we nə̀ ù dzə̀ dòʼò tsə nə̀ ghu, u kwùni twe yə̀ â ghu. 21U dzày tsə a ghu nə̀ “Ghà doʼò kədzôŋ, abu Zə̀kìy bɛmə nə̀ mə bû dzwoŋi, mə kî kàmə̀ bè ŋwò.” U dyaŋi nìy kə kəmfə̀n ŋwò dàŋ yə̀ a Efesùs.

22Abù ù zù kwùm tsə a Kàsalìyà, u zù dyaŋi a Yèlusalèm, twoŋə zuw yə̀ àghê ndàw Kə̀zə̀ yə̀ awote, tsiy zù dyaŋi a Antìyòk. 23Anə yiə yə̀ Pôl dòʼò tsə nəniy ndə̀mə̀ ntsukə awote, u ŋwò tsə zù a mbwòʼ ə̀ Gàlatìyà nə̀ a mbwòʼ ə̀ Fligìyà, bwìy twoŋə zuw yə̀ aghû yə̀ tsə̀təndii tə Yesù awote anə ndə̀mə̀ tə̀lòʼo, fày kə sòʼò ghu nə̀ ghu kəli tsə ibɛmə ìtaw yiy.

Àpolòs kə nàʼà ntwùm ə̀ Kə̀zə̀ a Efesùs nə̀ a Kolìn

24Wè Dzû ùlìy wìy kə də̀ awote a Efesùs ghu kə twoŋə izəd yiy nə̀ a də̀ Àpolòs, ù kə fyi anə inaʼi Àlèzandà. U kwu dzwàb ani dzày ayiə. U də̌ nə̀ ù mə ŋge zwiʼi ŋwàʼà k-a-zə̀ kìy. 25Ù maa ŋge zwiʼi kəli dzələ tə Mwe ə̀ mbyi tiy. U dzìy ayiə nə̀ fòŋə̀ we idzə̀m. Ayiə yə̀ ù kə dzîy nəniy kwùmə̀ yə̀ nə̀ Yesù, a kə də̀ tsitsi. Ù kə kwuni bvwami kwu kə ntwùm ə̀ Dzwan kə niʼà nəniy kwùmə̀ yə̀ nə̀ ìnìy i mwi m-à-zə̀ mìy. 26Àpolòs kə dzìy ayiə a ndàw dzəŋə kə aghě Dzû anə fòŋ ìtaw yìy. Abù Àkwilà we nə̀ Plìsilìyà zuw tsə nəniy yə ù tyi dê ayiə yiy ate â àghù yìy, ghu nìy zù nə̀ we a ndaw ghu, tòʼò kàm tyi dê tsə we nə̀ àyiə yə Zə̀kìy liə nə̀ aghee ki zəŋə. 27Àpolòs ə zəŋi kə fòŋə we ani zù a Àkayà. Aghee Kəzə̀ yìy twà yə̀ kə̀ ŋwàʼà awò àghě ndàw Kə̀zə̀ yə̀ a Àkayà dzày tsə ate nə̀ ghu ki ŋgwam na dzwâb tsə we. Abù Àpolòs zù kwùm tsə nəniy, u ŋge fày aghû yə̀ ghu kə bɛmə nəniy Zə̀kìy, aŋwòə Zə̀kìy kə ŋge dè ghu nə̀ fòŋə̀ ìdzòŋə̀ yìy anə yiə yə ghu bɛmə nəniy â Yesù Kə̀litò. 28U ŋge bə̀d àyiə nə̀ àghě Dzû, u dè fyi kə anə ŋwàʼa k-a-zə̀ an-a-ne nə̀ Yesù də̌ wù wə̀ Zə̀kìy sûw kyili na nə̀ ù dòʼò kə̀dòŋ.

Currently Selected:

Kə̀fàʼ 18: isu

Highlight

Compare

Copy