Kə̀fàʼ 17

Utwə̂d wìy kə fyi nə̀ Pôl a Tèsàlonikà

1Pôl kə ŋwò tsə a Filìpî we nə̀ Silàs tsìy yə̀ dzəd anə inaʼ i Àmfipolìs nə̀ ìnaʼ i Àpòlonìyà bù kwùm tsə anə inaʼ i Tèsàlonikà anə lòʼo kə ndàw dzəŋə kə ghě Dzû yìy kə də nəniy ate. 2Pôl ə zù awote ani zù fwùlì Kə̀zə̀ anə yiə yə ù kə taw zəŋə tsə nəniy. U nìy kə ntsukə mə̀ zwâ mìy inti nə̀ ù tsə̀ŋə zè tyi dè kə ayiə â ghu anə ŋwàʼà k-a-zə̀. 3U tyi dè àyiə awò ghu ani zəŋi tsə tə̀ ghu zuw kəli tsə nə̀ wù wə̀ Zə̀kìy kə sûw kyili na nə̀ ù dòʼò kə̀dòŋ, ù kə kwu ani bù fii, ù zɛmə̀ dzwoŋi bə̀ sòʼò anə ipfə. Pôl dzày yə̀ sòʼò aghu nə “Yesù wə̀ mə niʼà ntwùm ə̀ we yiy fə â ghà, à də wù wə̀ Zə̀kìy sûw kyili na nə̀ ù dòʼò kə̀dòŋ.” 4Aghee Dzû àliy yiy bɛmə ayiə yə Pôl kə dzày nəniy, ghu ghè yə̀ təm fwumi bə̀ Pôl we nə̀ Silàs ani fàʼ fàʼ k-a-zə̀. Ndə̀mə̀ àghù ghu də wày aghee Dzû, nə̀ iyəŋi àsoŋə̀ aliy yiy ghu bɛmə sòʼò ntwùm ə̀ ì ghè yə̀.

5Ŋgəd tə ghee Dzû tə̀liy tiy kə kwuni kwu kəghòʼ anə ayiə ghè yə̀. Ghu twoŋə bə̀ àghě taw utuw wiy na yə̀ ghu anə tə dzə̀lə nə̀ ghu kaʼ tsə utswə̂d anə inaʼ. Ŋgəd tə liə nə̀ ghu mə sê zû Pôl we nə̀ Silàs akə̀lə̀ ŋwàâ kə ghù kə̀ kə kə fwoə nə̀ fòŋ tìy. Ghu ŋwò kə zù a ndàw Dzasə̀n ani zù kwi Pôl we nə̀ Silàs. 6Abù ghu də kə̀ kwuni kôʼ dzə̀ nəway Pôl we nə̀ Silàs awote, ghu kwi tsə Dzasə̀n nə̀ àghě Kə̀zə̀ aliy yiy sè bù nə̀ ghu asə̀ ŋgəd tə inaʼ tiy, bvoʼə bə̀ mə̀mbòŋ dziy tsə nə̀. “Aghû yə̀ mə kaw na utswə̂d wìy anə mbyi idzə̀m, ghu mə bù sòʼò fə anə inaʼ i ŋgàŋ. 7Dzasə̀n ndòʼò ŋgwam na tsə nəniy ghu a ndàw we. Ghu dzə̀m mə zaʼ lâŋ kə Kaʼisà kìy, anə yiə yə ghu dzîy nəniy nə̀ dòŋ kə̀ liy kiy də ŋwô, ghu twoŋə nəniy nə̀ à də̀ Yesu.” 8Abù aghû yə̀ nə̀ ŋgəd tə inaʼ tiy zuw tsə nəniy ayiə yə ghii, fôŋ tìy ŋə̀m này yə̀ ghu ghii. 9Ŋgəd tə inaʼ tiy dzày yə̀ nə̀ Dzasə̀n tsə ukhiy wə aghê tsə̌ nəniy ani kwùm ŋwò fyi ghu ate a ndàw ntsaʼ we nə̀ àghè liy yə ghu kə bɛmə nəniy Zə̀kìy. Abù ghu tsə tsə dzə̂ ukhiy ughè wə̀, ghu dyaŋi nyəli màʼà ghu, ghu ŋwò.

Ndə̀mə̀ àghù a Bèliyà kə bɛmə kə ntwum yə Pôl kə niʼà

10Aghee Kəzə̀ yìy kə nìy kə Pôl we nə̀ Silàs, twum zù ghu a Bèliyà nə̀ ntsukə tə ghè tə̀. Abù ghu zû kwûm tsə, ghu zù dyaŋi a ndàw dzəŋə kə aghě Dzû. 11Aghê Bèliyà yìy kə ŋge kwu ighaa ani zuw ntwùm ə̀ Kə̀zə̀, tsìy fyi aghee Tèsàlonikà. Ghu ndòʼò màʼà tsə iwee ani zwuli ntùmə̀ ìdzòŋə̀ yìy. Ghu tyoŋə ŋwàʼà k-a-zə̀ ntsukə idzə̀m ani tòʼò kaw fyi kə nə̀ ghu kôʼ nə̀ ayiə yə Pôl we nə̀ Silàs dzìy nəniy â ghu à də̀ kə ŋwô àyiə àsoŋə̀ yə̀. 12Ndə̀mə̀ aghě Dzû yìy ə bɛmə kə ntwùm ə̀ ìghè yə̀. Aghû yə̀ ghu kə də wày aghee Dzû, iyəŋi àsoŋə̀ yìy nə̀ iŋə̀mə̀, ghu bɛmə kə sòʼò ntwùm ə̀ ìghè yə̀. 13Abù ŋgəd tə ghě Dzû tə̀ ghu kə də nəniy Tèsàlonikà zuw tsə nəniy nə̀ Pôl mə nàʼà ntwùm ə̀ Kə̀zə̀ a Bèliyà, ghu zù awote kaw tsə utswə̂d. Ghu zəŋi tsə nə̀ ŋwàâ kə ghù kə ə kaʼ yə ani ŋə̀m nə̀ fòŋ tìy azoŋə̀ Pôl we nə̀ Silàs. 14Aghû yə̀ ghu kə bɛmə Zə̀kìy, ghu dyaŋi twum ŋwò yə̀ Pôl nə̀ ù zù anə iŋgwùŋə i dzwî. Silàs ə kwuni dòʼò sə tsə kə a Bèliyà we nə̀ Timotì. 15Iŋə̀mə̀ àliy yiy zù dzəŋi nə̀ Pôl, zù kwùm tsə anə inaʼ i Atèns. Yəə ghu dziy dzwoŋi bû a Bèliyà, Pôl twum tsə ghu nə̀ ghu dzây yə̂ nə̀ Silàs we nə̀ Timotì nə̀ ghu zəaŋì kway bə̂ ìghe a Atèns.

Pôl zù nàʼà ntwùm ə̀ Kə̀zə̀ a Atèns

16Yəə Pôl sì lyimə nəniy Silàs we nə̀ Timotì a Atèns, fòŋ ə ŋge ŋə̀m we anə ayiə yə ù kə kôʼ nəniy aghee ŋge fwulə̀ nəniy mwòʼo miy awote anə inaʼ. 17À yù də̀ ighe ù kə kwi tsə nəniy dzəŋə kiy a ndàw dzəŋə kə aghě Dzû nə̀ àghě Dzû yìy, nə̀ aghù yə̀ ghu də wày aghee Dzû ghu kə bɛmə nəniy Zə̀kìy. U kwi sòʼò kə̀dzəŋə ntsuk indzə̀m anə lòʼo tə aghê kə dyoʼò tsə̀ nəniy ate, nə̀ àghù yə̀ ghu kə bwîy tsìy nəniy. 18Aghê liy yiy ghu kə dzwùmə̀ nəniy wù wə̀ ghu kə twoŋə nə̀ à də̌ Epìkolùs.#17.18 Epìkolùs kə də̌ wù wə̀ ù kə tyi dê nə̀ wù kwu ani fàʼ yə̀ ìyiə yə ù kwu nəniy nə̀ i kî nyiə̀ ŋwò we nə̀ dwiʼi kiy. Nə̀ àliy yiy ghu kə dzwùmə̀ wù wə̀ ghu kə twoŋə nə̀ à də̀ Zenò#17.18 Zenò kə də̌ wù wə̀ ù kə tyi dê nəniy nə̀ aghee kwu ani kəli tsə ani kwù tə̀fòŋ, ghu ki zəŋə yə soʼo ayiə yə fôŋ tə ghu tiy dzîy nə̀ à də̌ ìdzoŋə̀ yìy moo ìbɛbə yiy. ghu kaʼ yə̀ ani bə̀d àyiə nə̀ Pôl. Àliy yiy bəbə nə̀, “Wù ù dê ùwè wə̀ ba dziy ndzòʼò ìlyàʼì ì gha yiy?” Àliy yiy bə̀lì kə nə̀, “Ù nyə̀ ni dziy ayiə kwùmə̀ yə̀ nə̀ ùzə̀ ù ŋwô wìy.” Ghu kə ghi dzày tsə aŋwòə Pôl kə niʼà ntwum kwùmə̀ yə̀ nə̀ Yesù nə̀ a àyiə yə aghê nî zɛ̀mə̀ dzwəŋə nəniy ate.

19Ghu nìy bù nə̀ Pôl anə ndàw ìsaʼà yìy, ghu kə twoŋə nə̀ à də̌ Àlìyopagùs, dzày tsə a we nə̀, “Dzày bə awò ghə̀d, ghè liə ani kəli ayiə àfyiə yə wò tyi dê nəniy. 20Ghè zuw ayiə liy yiy wò dzìy nəniy nə̀ ghè kamə zuw kôʼ dzə̂ nəway, ghè liə ani kəli tsə nə̀ ayiə yə̀ myìŋə̀ nə̀indiə.” 21(Aghê Atèns àdzə̀m nə̀ àghě nàʼà tə̀ ŋwô tə̀ ghu kə muə nəniy awote, ghu tòʼ liə ani zwulə ayiə àfyiə yiy, dzìy yə̀ sòʼò àyiə àfyiə yə ghu zuw nəniy.)

22Pôl ŋwò təmi kə anə sə kə ghě Atèns, dzày tsə nə̀, “Aghee Atèns, mə mə kòʼ nə̀ ghà fwùlə̀ lelê tə uzə̀. 23Yəə mə bwîy tsîy yə̂ nəniy anə inaʼ ghi, mə kôʼ yə̂ loʼo tə̀ fwulə tə ghà kwu nəniy. Mə mə̀ kòʼ sòʼò loʼo kə̀ fwulə kə̀liy kiy ghà twâ na nəniy awote nə̀, ‘Awò Zə̀ kə̀ a də kwu way.’ I dê tsə nə̀ ghà kwu ŋwô nə̀ zə̀ kə̀liy kiy də ŋwô. À də̌ we mə dziy dzày bə̂ àyiə nyiə awò ghà kwùmə̀ yə̀ nə̀ we. 24Ù də̌ Zə̀ kə̀ kə kə bwam nəniy byiwuŋ kiy nə̀ mbvə̀dintsə kiy, nə̀ ùfyiə wə ate ùdzə̀m. Ù də̀ Mwe ə̀ mbyi. Ù mùə̀ dzə̀ way anə ndaw tə aghê bwam kə nəniy. 25Ù bòʼò liə dzə̀ wày nə̀ wù lìy fày we anə fyiə kə̀li kiy. À də̌ we ù nyìə̀ nəniy imuə̀ yìy nə̀ zuuk tiy awò ufyiə udzə̀m, nyìə̀ sòʼò ufyiə ùliy wə ùdzə̀m u də nəniy fə anə mbyi. 26Zə̀kìy kə zəŋi tsə aghee mbyi yə àdzə̀m abidzəmə̀ wù ùmòʼ ù kə bwam kə nəniy. U zəŋi tsə nə̀ ghu muə̀ doʼò yə̂ anə lòʼo tədzə̀m anə mbyi. Ù ma kwu byay na zìì bə̀ nə̀ soŋə fə ghu nî byikə bə̂ nəniy ghu ate zù kwùm nə̀ soŋə fə ghu nî pfə ate, nə̀ loʼo tə ghu nî kwu ani mùə̀ ate. 27Ù kə ayiə yə ghii zəŋi nə̀ ghu ki kaw bə̂ ìghe. Abu ghu kaw bə̂ ighe, ghu ki kôʼ ìghe. Zə̀kìy kwùlì də̀ kə akə̀lə̀ ŋgàŋ, kə kə̀ doʼò nây yə̂ dzə̀, 28anə yiə yə wù lìy kə dzây tsə nəniy nə̀,

‘Zə̀kìy mə nyiə̀ ŋgaŋ nə̀ daʼa kiy ani muə, nə̀ ani bwìy tsə̀, nə̀ ani dòʼò aghù yə̀ ŋgà də nəniy ghu.’

À bvami də̀ ayiə yə aghê u ŋwàʼà àliy yiy twâ na nəniy nə̀ ‘Ŋgà də sòʼò awa we.’

29Yəə ŋgà də nəniy awa Kəzə̀ yìy, ŋgà kə moʼò dzə̀ nə̀ ù də̀ yəə mwòʼo mə ghu bwam fyi kə anə ufyiə ùtsə ùsoŋə̀ wə̀ ghu zəŋə nəniy ukhiy wiy ate, moo ufyiə ùtsə ùmwaa wiy, moo mwòʼo fə ghu zəŋi fyi kə nəniy anə atay. Zə̀kìy way dzə fyiə kə̀li kiy ghu zəŋi nə̀ àwo. 30Səsə, Zə̀kìy kə nìyzə̀ ŋwò ibɛb i ghu yə̀ ghu kə zəŋə nəniy ndzòʼò àyiə yə̀ ghi, aŋwòə ghu kə kwu dzə way ayiə yə ghu kə zəŋi nəniy. A kwuni bû nyiə̀, ù dzìy nə̀ aghě dzə̀m anə nàʼà tə̀ dzə̀m kwu ani kyemì ŋwò kə anə ayiə ghu àbɛbə yiy, ghu bû akə̀lə̀ ìghe. 31U mə sày na tsuk fiy ani saʼ aghê dzə̀m ate anə mbyi anə isaʼ i tsitsi yiy. Ù sày na Yesù nə̀ ù nî saʼ isaʼ i ghè yə̀. Zə̀kìy mə dè sòʼò tsəe kiy awò àghè dzə̀m ani dè tsə nə̀ Yesù kpe ŋwô ani saʼ, anə yiə yə ù zɛ̀m kə nəniy Yesù ate anə ipfə.”

32Yəə aghû yə̀ zuw tsə nəniy Pôl dzày tsə nəniy nə̀ Zə̀kìy kə zɛ̀m kə Yesù anə ipfə, ghu àliy yiy kaʼ yə̀ we ani tsoʼ. Àliy yiy mee a we nə̀ “Ghè kî wòə̀ liə ani zuw fwuli ayiə yə wò dzìy nəniy.” 33Pôl dzày tsə ghii dyaŋi ŋwò fyi tsə awote a ndàw kə̀dzəŋə. 34Aghê liy yiy bɛmə kə â Yesù, ŋwò dzwùmì yə̀ Pôl. Wù ùmòʼ anə aghě ghè yə̀ ghu kə bɛmə nəniy, à kə də̌ Dàynasùs, ù kə də tsə nəniy wù ù saʼà wìy a ndaw isaʼà yə̀ ghu kə tyoŋə nə̀ à də̌ Àlipagùs. Wìyəŋi ùlìy kə də̀ sòʼo ate izəd i we yiy kə twoŋə nəniy nə̀ à də̌ Dàmàlîs. Ndə̀mə̀ àghè liy bɛmə sòʼò awò Yesù.

Currently Selected:

Kə̀fàʼ 17: isu

Highlight

Compare

Copy