Rɔmɛri̧ 9
9
Gáŋvbôn rá̧ njukuri a ké ten kuriri
1Mi sa gbátɓay ka rɛŋ a Zezú, mi zi kúŋɓay yá, kɛrɛ a mǐ ka ŋgboro a Têm Pukí tu ɓá, mi sa gbátɓay. 2Law ní mbá ka lawyíra mambá rá̧ lawséna dát. 3Ɓayhí̧lé, ŋgboro mí erú hí̧ mí, mi zi ɓá hɛ́rɛ a Gáŋvbôn ké ɗere kɔ̧ tûl ní, a mí wal há̧na kuu Kiris, ɓay tûl béla a nyîn nírí̧, njuku nzáʼaɓay a mǐri̧. 4Kú kaw ɓá gun Izirayɛ́lri, ka Gáŋvbôn ten kuriri ɓá gun a mɛ̌ri̧, ka tɔ́ʼɔ kuriri hɔ̧́na mɛ̌, a ŋgá̧nzáʼa kuu kuriri, a hí̧ kuriri sáŋna, a tɔ́ʼɔ kuriri ŋgboro ɗél nɛ́, a hí̧nzáʼa hí̧ kuriri. 5Kú kaw ɓá gun zîi a zîiri, ŋgboro a sɛl î̧n ka ku mbuŋ Kiris rúy, mɛ̌ ka kaw tûl hɛ̧ too. Ɗéla ké hí̧ Gáŋvbôn dát! Amɛn!
6Hɛ̧ nɔ́ tɔ́ʼɔ ɓá, ɓay a Gáŋvbôn, zi tí ka nɛ́rɛ̧ nyá yá. Ɓayhí̧lé a ɓil gun Izirayɛ́lri too, a kú mbuŋ kuriri, zi kaw ɓá gbát gun Izirayɛ́lri too yá. 7Rá̧ gun a Abarahamri̧, kú zi kaw ɓá gbát gun a mɛ̌ri̧ too yá. Ɓayhí̧lé, Gáŋvbôn sa hí̧ Abaraham ɓá: «Ka ŋgboro a Izák, pé mɔ́ e ziŋ gunri̧, ka mi hí̧nzáʼa hí̧ mɔ́y.» 8Zi ɓay a sa ɓá, tí ɓá gun mbuŋa ka ŋgboro a hay mûn, pé kaw ɓá gun a Gáŋvbônri̧ nyá, ɓá gun mbuŋa a ŋgboro a hí̧nzáʼa a Gáŋvbôn, pé kaw ɓá gbát gun a Gáŋvbônri̧. 9Ɓayhí̧lé, Gáŋvbôn hí̧nzáʼa a sa ɓá: «Mi e regí ka mbimbɔ̂m a fal, a ɓil nâm ɓá báŋa a nɛ́ lé, Sára wûny a mɔ̌, e mbuŋ gun wɔ̧rɔ̧́njuku.»
10A féké ɓáy, ɓá mbêwké kɔ́ kuu Rébéka, ka mbuŋ gun sére hí̧ zîi a manárí̧ Izák. 11Kú pa̧n mbúŋ gunkéri yá ɓáy, rá̧ ɓay kú niŋ hɛ̧ a béláké malé hɛ̧ a belyáké yá. Dáy, hɛ̧ ka Gáŋvbôn tí mɔny a lawɛ́, ké niŋ ɓá báŋké a ɓil ten hɛ̧ a mɛ̌, táŋ ew tûl péna niŋa a njuku, dáy ɓá a ɓil zína a njuku ka ɗí hɛ̧, 12ké sa hí̧ Rébéka ɓá: «Gáŋnjuku gun e kaw ɓá njukupéna a nyîn nɛ́.» 13Ɓá báŋké nɔ́ ka ɗé ka̧n ɓil Mbété ɓá:
«Mi zi Zakob, dáy a fɔny Esawu.»
14A̧hí̧ ná e sanáké lé? Gáŋvbôn, zi tí ɓá njuku a ndáráké yá lé? Bɔʼɔ mbêw yá! 15Ɓayhí̧lé Gáŋvbôn sa hí̧ Mɔyíze ɓá: «Mi kósêe a njuku, ka mi zi kósêe hí̧ nɛ́y, a niŋ lawbéla hí̧ njuku, ka mi zi niŋ lawbéla hí̧ nɛ́y.» 16Nǎŋnɔ́, zi tɔ́ŋ zína a njuku malé péna niŋa a njuku yá. Ɓá ka ŋgboro a Gáŋvbôn mbêw yáŋ, ka kósêe a njukuy. 17A ɓil Mbété, Gáŋvbôn sa hí̧ mbây Farawôŋ ɓá: «Mi ɓá mɔ́ kaw mbây, ɓay tɔ́ʼɔ kpɔ́ŋa a mǐ hí̧ mɔ́, rá̧ ɓay a kú tu rɛŋ ní lá tísiri too.» 18Nǎŋnɔ́, Gáŋvbôn kósêe a njuku a ké ziy, a kpúlaw a njuku a ké zi kpúnákéy.
Hɛ́rɛ rá̧ kósêe a Gáŋvbôn
19Há̧na, mɔ e sa hí̧ mí ɓá: «Ɓayhí̧rá̧ Gáŋvbôn nzaʼa kuu manárí̧ ɓáy lé? A gé tí niŋ hɛ̧ ka Gáŋvbôn zi yá lé?» 20Dáy, mɔ̌, mɔ́ ɓá gé rá̧ a manyɓay kuu Gáŋvbôn lé? Íri e sa hí̧ njuku ka mbó nɛ́ ɓá: «Ɓayhí̧rá̧, mɔ́ mbó mí nǎŋ lé?» 21Njuku mbóhɛ̧ e niŋ hɛ̧ a ké zi too ka siri pɔ̂ny. Ka siri pɔ̂ny a mbêwké nɔ́, ké zi lé, ké e mbó íri a lâʼa sêe dawá malé ké e mbó íri a lâʼa sêe baaké.
22Dáy, Gáŋvbôn mí zi ɓay a ké tɔ́ʼɔ hɛ́rɛ a mɛ̌ rá̧ kpɔ́ŋa mɛ̌, dáy a ikilawɛ́ ɓá ŋgɛ́rɛ́ké sé tûl a njukuri ka ma hɛ́rɛ a mɛ̌y, a ka kaw ɗɛ́ŋ ɓay a ɓɔ́lay, a̧hí̧ ná e sánákéy lé? 23A ké mí zi ɓay a ké tɔ́ʼɔ hɛ̧zíŋa a hɔ̧́na a mɛ̌ kɔ́, sé ŋgboro a njukuri a ké kósêe a kuriri, ɓayhí̧lé ké tí mɔny kuriri ɗambɛl, ɓay a kú ziŋ káwa a ɓil hɔ̧́na a mɛ̌, ná e sá ɓá a̧hí̧ lé? 24Nǎŋnɔ́ ké ɗí nárí̧ tí ɓá a bazeŋ a Juyífri mbêw yáŋ nyá, a ɓil a njukuri ka zi tí ɓá Juyífri yáy kɔ́. 25Gáŋvbôn sa a ɓil mbété a Ozé ɓá:
«Njukuri ka zi tí ɓá njuku a mǐri̧ yáy, mi ɗí kuriri, ɓá njuku a mǐri̧,
a njukuri ka mi zi, zi kuriri yáy, mi e ɗí kuriri ɓá njuku zína mǐri̧.
26Rá̧ gel a kú sa hí̧ kuriri ɓá: “I zi tí ɓá njuku a mǐri̧ nyáy,”
a goló nɔ́, kú e ɗí kuriri ɓá gun a Gáŋvbôn a ndísɛ̌ʼɛri.»
27A porofɛ́t Ezayí, a gelé, vbá̧nzáʼa sé tûl a gun Izirayɛ́lri ɓá: «Gun Izirayɛ́lri, kú mí zi lé kú ŋgɛ̧́ ɓá báŋa sikɔʼɛrɛ ka gbaŋ mbii lúkí, ɓá njukuri tɛ̧́w yáŋ a ɓil a kuriri, pé e ziŋ pɛ̧́nay. 28Ɓayhí̧lé, hɛ̧ ka Gáŋmbây sáy, ké e niŋáké too ɓá gánáké ka tísiri.» 29Ɓá báŋké ka porofɛ́t Ezayí tí sa ɗambɛl ɓá:
«Gáŋmbây ka niŋ tísiri rá̧ nûnalê, mí zi hí̧ nárí̧ gunri̧ nyáy,
ná e kaw ɓá báŋa pû Sɔdɔ̂m,
a rekaw mambɛ̧́nɛ́ kuu Gɔmɔ̂r.»
Izirayɛ́l rá̧ pɛ̧́na ka ŋgboro a láɓulaw
30A̧hí̧ ná e sanáké lé? Njukuri, ka zi tí ɓá Juyíf yá, ka zi ɛ́ ŋgboro káwa a ndáráké a mbɛlɛ́ a Gáŋvbôn nyáy, ké ɓá kuriri tɛ̧́ njuku a ndárákéri a mbɛlɛ́ ka ŋgboro a láɓulaw. 31Dáy a gun Izirayɛ́lri, kuriri ka ɛ́, káwa a ndáráké a mbɛl a Gáŋvbôn, ka ŋgboro a sáŋnay, zi ziŋ ka̧ gel ka sáŋna zi ɓay a ɓá kuriri sérúy yá. 32Ɓayhí̧lé? Izirayɛ́l zi ɛ́ ŋgboro káwa a ndáráké ka ŋgboro láɓulaw yáy, kú kɛrɛ ɓá kú e ziŋ ka ŋgboro a péna niŋa a kuriri. Nǎŋnɔ́, kú ɓɛ̧ bɔʼɔ a kuriri ka tûl «saw ɓɛ̧na», 33ɓá báŋké ka ɗé ka̧n ɓil Mbété ɓá:
«I kó, mi e ɓá ka̧n pû Siyɔŋ, saw ɓɛ̧ bɔʼɔ a njukuri,
gáŋ saw ka ɓá njukuri lé,
dáy njuku ka láɓulaw hí̧ nɛ́, tí ziŋ sɔ̧rɔ̧ nyá.»
Currently Selected:
Rɔmɛri̧ 9: pnz
Highlight
Copy
Compare
Share
Want to have your highlights saved across all your devices? Sign up or sign in
© 2023 CABTAL
