Rɔmɛri̧ 10
10
1Nyîn nírí̧, hɛ̧ ka mi zi a ɓil law ní too, ka gɔ́ŋ Gáŋvbôn ɓay tûl a Juyífri, ɓá kú ziŋ pɛ̧́na. 2Katína, mi tu ɓá kú erú ka zína mambá ɓay a Gáŋvbôn, dáy zínáké zi niŋ ka ŋgboro a hɛ̧túna nyá. 3Ɓayhí̧lé, kú zi tu ŋgboro a sí̧, Gáŋvbôn ɓá njukuri tɛ̧́ njuku a ndárákéri a mbɛlɛ́ yá, dáy a zi ɓay kú tɛ̧́ njuku a ndárákéri ka ŋgboro a hɛ̧túna kuriri. Nǎŋnɔ́, kú zi zibɔʼɔ a péna a ndáráké a Gáŋvbôn nyá. 4Ɓayhí̧lé, Kiris gí kɔ́rɔ́ péna a sáŋna, ɓay a njukuri too ka láɓulaw, Gáŋvbôn ké ɓá kuriri tɛ̧́ njuku a ndárákéri a mbɛlɛ́.
Pɛ̧́na ɓá ɓay a njuku too ka láɓulaw hí̧ Gáŋmbây
5Mɔyíze ɗé sé tûl káwa a ndáráké, ka gí ka ŋgboro a sáŋna ɓá: «Njuku too ka tɔ́ŋ nzáʼapéna a sáŋnari̧ ɓá béláké, i ziŋ káwa ka ŋgboro a sáŋnakéri.» 6Dáy, hɛ̧ ka kɔ́ káwa a ndáráké ka ŋgboro a láɓulaw, kú sa ɓá: «Mɔ́ ná sa a ɓil lawɔ́ ɓá: A gé e he sé nûnalê lé?» (Zi ɓay a sa ɓá, ɓay a ɗere Kiris). 7Malé: «A gé e ɗere sé táʼa tísiri lé?» (Zi ɓay a sa ɓá: Ɓay a ɓá Kiris uru a ɓil a hûlri). 8Dáy a̧hí̧ kú sa sé tûl káwa a ndáráké lé? Ɓá: «Ɓayké zi ɗí kuu mɔ̌ nyá, ké e a ɓil nzáʼa rá̧ ɓil lawɔ́.» Ɓaykénɔ́, ɓá ɓay a láɓulaw, a rú tɔ́ʼɔy. 9Mɔ̌ mí sa ka nzáʼa a mbɛl a njukuri ɓá Zezú Kiris ɓá Gáŋmbây, rá̧ a mí láɓulaw ka lawɔ́ too ɓá Gáŋvbôn toma nɛ́ a bazeŋ a hûlri, mɔ e pɛ̧́na. 10Ɓayhí̧lé, a ɓil law pé ná láɓulaw, pé a tɛ̧́ njuku a ndáráké a mbɛl a Gáŋvbôn, nǎŋnɔ́ ka ŋgboro a nzáʼa, pé ná sa láɓulaw a manárí̧ pé a ziŋ pɛ̧́na. 11Ɓá báŋké nɔ́ ka Mbété sáy: «Njuku too ka láɓulaw hí̧ Kiris, sɔ̧rɔ̧ tí ŋgbá nɛ́ nyá.» 12A goló, wála zi tí a ɓil a Juyíf, rá̧ njukuri ka zi tí ɓá Juyífri yáy yá. Kú erú kuriri too, Gáŋmbây mbêw yáŋ, ka hí̧ bélahɛ̧ a mɛ̌ri̧ hí̧ njukuri too ka vbí nɛ́y. 13Ɓayhí̧lé kú sa: «Njuku too ka e ɗí rɛŋ a Gáŋmbây, e ziŋ pɛ̧́na.»
14Dáy a̧ní, kú e ɗí njuku a kú zi láɓulaw hí̧ nɛ́ nyáy lé? Malé a̧ní, kú e láɓulaw hí̧ njuku, a kú zi láɓay a mɛ̌ nyáy lé? Malé, ka ŋgboro a sí̧ rá̧, kú e láɓay a mɛ̌, ka njuku mi zi gí saɓay a mɛ̌ hí̧ kuriri yáy lé? 15Malé, a̧ní njukuri e saɓay a mɛ̌, a kú mí zi pé kuriri ɓayké yáy lé? Ɓá báŋké ka ɗé ka̧n ɓil Mbété ɓá: «Belkóna mambá, bɔʼɔ a njukuri a gí tɔ́ʼɔ Bélaɓay!» 16Dáy, tí ɓá njukuri too, pé láɓulaw sé tûl Bélaɓayké yá, ɓá báŋké nɔ́ ka porofɛ́t Ezayí sáy: «A gé láɓulaw sé tûl ɓay ka rú tɔ́ʼɔy lé?» 17Nǎŋnɔ́, láɓulaw gí ka ŋgboro a lá Bélaɓay a kú tɔ́ʼɔy, a Bélaɓayké a ná láy, saɓay sé tûl a Kiris.
18Dáy, mi sa ɓá: Bélaɓayké wá, Juyífri zi lá yá lé? Katína, kú láɓayké kɔ́! Ɓayhí̧lé, Mbété sa ɓá:
«Kɔ́ŋ a kuriri gbé ma tísiri too,
rá̧ ɓay a kuriri ka̧ kɔ́rɔ́ tísiri too.»
19Dáy mi vbí ɓáy ɓá: Njuku Izirayɛ́lri, zi lá ɓil ɓayké yá lé? Katína Mɔyíze tí sa kɔ́, ɓá Gáŋvbôn sa ɓá:
«Mi e uru sɛ́rɛ a wǎyri, ka ŋgboro a njukuri, ka zi tí ɓá gbát njukuri yáy, mí e uru hɛ́rɛ a wǎyri, ka ŋgboro a njukuri ka zi tí ka hɛ̧túna nyáy.» 20Dáy porofɛ́t Ezayí lé sa kɔ́, ɓá Gáŋvbôn sa ɓá:
«Njukuri ka zi ɛ́ mí nyáy, pé e ziŋ mí,
Mi tɔ́ʼɔ mûn ní hí̧ njukuri, ka zi vbí mí hɛ̧ bɔʼɔ mbêw yáy.»
21Dáy, ɓay ka kó gun Izirayɛ́lri ké sa ɓá:
«Nâm too, mi ndara ndɔ̂ʼɔ ní
sé ŋgboro a njukuri ka zi lá nzáʼa yá rá̧ njuku kpútûlri.»
Currently Selected:
Rɔmɛri̧ 10: pnz
Highlight
Copy
Compare
Share
Want to have your highlights saved across all your devices? Sign up or sign in
© 2023 CABTAL
