Roman 6

Mba si ku da unó iboŋ anigə mba yə ikay

1Mba si ghayn kwi ingiya? Mba waʼa ŋuw imbey ni ghey unó iboŋ da ichuŋ Nwiye kwey? 2Indəʼ! Mba si ku da unó iboŋ, mba mə ŋuw imbey imə aghəy unó iboŋ da ingiya? 3Cha mbə kyay kwi, u mba jum mbənə mba num une akə ukum Yeso Kristo mba ku nə uŋwən numugə mba num une? 4#Kol 2.12Mba ku utwayn ngwa nə uŋwən anji zənə mba num une da anji zənə mbə́ zəmə Kristo anjim iwumini mbaʼ anigə mba yi nibi yeŋ ungɨŋ itəni fey.

5Abə mə kwi mba si bumə nə uŋwən anji zənə mba ku nə uŋwən, anigə mba nibi bumə nə uŋwən akə inji zənə yə́ zəmə. 6Mba kyay kwi mbə́ si komo ita anun nyə̂ inyo azad abaʼaray nə uŋwən, da iniy nyə̂ inyo unó iboŋ anigə, cha mba mi gha chomo akə sob ungɨŋ unó iboŋ, 7damugə cha ikay abú unó iboŋ itumə wa ŋunə u si ku. 8Numugə mba si ku nə Kristo, mba beni kwi mba yi nibi chomo ikay nə uŋwən. 9Mba kyay kwi numugə Nwiye si zəmə Kristo, cha umi gha iku ama. Anigə cha ikay abú iwu igun ma. 10Iwu zənə yə́ kuw, yə kuw da iniyi ikay unó iboŋ ighari feyn. Anji zənə umi ikay, uyə ikay da ba u wumine Nwiye. 11Mbən nibi num kwi mbən si ku da unó iboŋ, asɨmə mbən yi ikay da iwumini Nwiye anjim Yeso Kristo.

12Ka mbən beni ngwən kwi unó iboŋ tumə itən nyə̂ inyo tənə imə kuw anigə ighəy mbən wumine unó iboŋ mbənə itən nyə̂ inyo mə fana. 13Ka mbən beni ngwən kwi injən asin inyo moʼ aghəy anó iboŋ nji ayi chomo nə aghəy faʼa zənə umə numə ighəy unó uzəg awu. Asɨmə mbən naʼa injən inyo abú Nwiye ni ba u si ku anigə umbə ikay. Mbən naʼa injən inyo abú Nwiye ni aghəy faʼa inum ighəy unó mbənə u koʼoro. 14Cha anó iboŋ mə ma nə ikay igun inen damugə cha ngwən aton unoʼo. Mbən yə aton ichuŋ Nwiye.

Mbən mə isob abú unó mbənə u təm ikoʼoro

15Asɨmə anó ingiya? Mba waʼa aghəy anó iboŋ damugə mba yə aton ichuŋ Nwiye akə ma aton unoʼo? Indəʼ! 16Cha mbən kyay kwi mbən bə naʼa inyo abú wa moʼ ni isob anigə mbən mə isob abú wa ŋunə mbən mə wumine? Anigə mbən mə isob abú unó iboŋ mbənə umə aghəy kwi ba ku kə isob abú iwumini zənə imə aghəy kwi ba təm ikoʼoro. 17Ayə naʼa yə beni ayə abú Nwiye kwi, mbən mə kaŋa beni isob abú unó iboŋ. Mbən si beŋe itən fiŋ ijum sə wumine amə unó mbənə Nwiye tey inen. 18Cha unó iboŋ nə anó moʼ ighəy nə umbən, anigə mbən si məŋi isob abú unó nu utəm ikoʼoro. 19Ayə nayn akə inayn ba inyoŋ atəw damugə mbən yə ibo anji zənə mbən si naʼa umbən usin inyo akə isob abú ufibiri unó foro abú unó iboŋ nanaʼ. Anigə akinine mbən naʼ umbən usin inyo akə isob abú unó nu u təm ikoʼoro da mbən mə ba nu uzayn.

20Amaʼazənə mbən mə́ isob abú unó iboŋ, amə́ cha anó moʼ inen ighəy nə anó zənə atəm ikoʼoro. 21Amə injim ingiya mbən jəgə akə unó mbənə mbən mə nə indiri atəw da úŋwən akinine? Inwi akə unó wu amə iwu. 22Akinine nu cha unó iboŋ nə anó moʼ ighəy nə umbən, mbən mə isob abú Nwiye. Injim zənə mbən mi jəg amə uzayn zayn anigə inwi amə itənə nu cha imi noʼo imey. 23Uchoʼo afaʼa akə unó iboŋ amə iwu, asɨmə uneʼe ŋunə Nwiye mə naʼa amə u təni nu cha umi noʼo imey akə inji zənə mba mə akə anó feyn nə Yeso Kristo ungwa Asɨyisəg.

Currently Selected:

Roman 6: NGI

Highlight

Copy

Compare