Roman 5

Anó ni itəm ikoʼoro ifigi Nwiye

1Numugə Nwiye beni kwi mba təm ikoʼoro anjim ibeni fiŋ, anigə mba yə akə aborobod nə Nwiye anjim Yeso Kristo ungwa Asɨyisəg. 2Anjim umugə mba beni uŋwən, mba si nibi nyi ungɨŋ ichuŋ zənə mba mə awu ungɨŋ akinine. Anigə mba komo iguwə iniŋi ita ikono kwi mba yi chomo ni Nwiye ungɨŋ iwumini ma. 3Ka di ma nigə, mba yə nibi komo iguwə da nji zənə mba zəw ingəʼ damugə mba kyay kwi izəw ingəʼ yi ghəy kwi mba yimə fiŋ. 4Iyimi fiŋ yi ghəy kwi mba mə nə ichomo chuŋ, ichomo chuŋ yi ghəy kwi mba mə nə ikono kwi Nwiye yi ghəy anó zənə u kaʼa. 5Ka ba numugə mba siy ikono, cha imi chigə ma ibuw damugə Nwiye si tey kwi yə wuʼe ngwa anigə yə si zi iwuʼi ungɨŋ ita fiŋ anjim Azugə zayn zayn zənə u naʼa ina.

6Amaʼazənə mba mə́ ibó, amaʼa koʼ anigə Kristo ku igun utəw ba mbənə cha mbə́ mə́ wumine Nwiye. 7Ayə ka abú wa kwi uku igun atəw wa ŋunə u təm ikoʼoro, ka ba kwi wa moʼ yə awu umə yimə fiŋ iku igun utəw ba chuŋ. 8Nwiye tey kwi yə wuʼe ngwa numugə amaʼazənə mba mə ghəy unó iboŋ, Kristo ku da umba utəw. 9Anjim anəm zənə Kristo tu da umba utəw, mba təm ikoʼoro ifigi Nwiye. Yə ghəy kwi ka Nwiye sɨy ma itəm nə umba. 10Mba mə ba bana Nwiye anigə yə si ghəy ngwa akə uzi ma anjim iwu ŋwə̂ ma. Akinine nu mba mə uzi Nwiye, itəni Kristo yi ghəy kwi mba duw angəʼ. 11Ka ba nigə, mba yə nibə komo iguwə da Nwiye anjim Asɨyisəg Yeso Kristo. Uŋwən ghəy mba mə uzi nə Nwiye.

Ikyabay akə Adam nə Kristo

12Anji zənə unó iboŋ zaʼa ungɨŋ isəg anjim wa feyn, iwu nibi zaʼa anjim unó iboŋ, anigə iwu zaʼa abú ba jum damugə ba jum ghəy anó iboŋ. 13Unó iboŋ sí məŋi ungɨŋ isəg ki Nwiye sə naʼa unoʼo. Cha umə taŋa uma unó iboŋ asin zənə cha unoʼo awu. 14Inoʼ akə ama Adam iŋu pey akə amaʼa Mose, iwu mə tumə isəg. Yə mə tumə nigə iŋu pey igun ba mbənə cha mbə́ ghəy uma unó iboŋ numugə Adam ghəy. Adam amə azəŋ abú wa ŋunə yə́ mə́ ŋu zaʼa.

15Asɨmə cha uneʼe ŋunə Nwiye naʼa mə ma ichin ichin, damugə uneʼe ŋunə Nwiye naʼa abú wa cha yə mə ma ni unó iboŋ Adam. Amə asiʼ kwi, anjim unó iboŋ wa feyn, ba nanaʼ ku. Asɨmə ichuŋ Nwiye naʼ chigə anigə yə naʼ abú ba nanaʼ anjim ichuŋ wa feyn, nu amə Yeso Kristo. 16Cha uneʼe ŋunə Nwiye naʼa chomo ma nə ghəy zənə yə ghəy kwi wa feyn gow anó. Nwiye sob usaʼa igun igow unó wa feyn, anigə izi usaʼa igun ba jum. Asɨmə uneʼe ŋunə Nwiye naʼa nu yə zaʼa anjim ifana unó nanaʼ, ghəy Nwiye beni kwi ba təm ikoʼoro. 17Amə asiʼ kwi, iwu mə tumə isəg ujum igun unó iboŋ wa feyn, nji amə nibə asiʼ kwi ba mbi jəg ichuŋ nanaʼ nibi jəg uneʼe ŋunə u ghəy kwi mba təm ikoʼoro ichomo ikay itumə isəg ujum anjim wa feyn nu amə Yeso Kristo.

18Akə inji zənə anó iboŋ wa feyn zi usaʼa igun ba jum, amə nigə unó chuŋ wa feyn nu u təm ikoʼoro, ghəy ba jum təm ikoʼoro nibi ghəy ba jum jəg itəni. 19Anji zənə anjim izəw wa feyn ghəy ba nanaʼ ghəy unó iboŋ, amə nibə anjim mugə wa feyn mə iwumini, nu ba nanaʼ mi təm ikoʼoro. 20Unoʼo zaʼa ighəy kwi unó iboŋ naʼ. Asɨmə, asin zənə unó iboŋ mə naʼa, ichuŋ Nwiye yə naʼa chigə. 21Umugə unó iboŋ mə tumə isəg anjim iwu, amə nigə ichuŋ Nwiye mə tumə isəg anjim mugə ba təm ikoʼoro. Zigə ayi ghəy kwi, ba jəg itəni nu cha imi noʼo mey anjim Yeso Kristo ungwa Asɨyisəg.

Currently Selected:

Roman 5: NGI

Highlight

Copy

Compare