Roman 12

Ba mbənə ubeni Kristo umbi jəg itəni fey

1Umbuŋ unya, ayə boʼo ubugə inen kwi, numugə Nwiye diri ngwa, mbən naʼa injən inyo abú uŋwən nə aghəy ifaʼ zənə amə ikay, imə uzayn uzayn nu umi wuʼ. Zəŋ amə inji zənə ikoʼoro kwi mbən ki wumine Nwiye. 2Ka mbən beni ngwən nə unó mbənə ba ungɨŋ isəg mə aghəy. Asɨmə mbən sayn kwi Nwiye beŋe ngwən anji zənə u naʼa ikono fey inen, da mbən kyay anó zənə u kabay. Anigə mbən kyay unó mbənə amə umbi chuŋ, mbən kyay u mbənə u wuʼi nibi kyay u mbənə ukoʼoro.

3Numugə Nwiye si aghəy ichuŋ iniŋ, ayə ghayn abú ba ujum injən kaʼa kwi, ka ukono ma kwi yə chigə mugə u məŋi, asɨmə wa feyn feyn kono anó da inyo ma akə inji zənə ikoʼoro. Wa feyn feyn kono aba akə iji zənə Nwiye naʼa ibeni fiŋ abú uŋwən. 4#1Ko 12.12Mba kyay kwi nyə̂ inyo yə nə usin nanaʼ, asɨmə cha usin nyə̂ inyo jum mə faʼa uma aba afaʼa feyn. 5Amə ichin ichin, ka nə ba mə naʼa, mba mə nyə̂ inyo feyn numugə ba nə akə bumi nə Kristo. Wa feyn feyn amə aba akə nyə̂ inyo ba jum. 6#1Ko 12.4-11Ba yə nə ineʼe ikudikud akə nji zənə Nwiye aghəy ichuŋ ina. Uneʼe wa moʼ bə mi mə zəw ukən Nwiye yə ghayn, u ghayn akə inji zənə ibeni fiŋ ma tey. 7Uneʼe wa moʼ bə mə kwi u faʼa, uŋwən faʼa. Uneʼe wa moʼ bə mə kwi u taʼa ba, uŋwən taʼa. 8Uneʼe wa moʼ bə mə kwi u zi ikay abú ba, uŋwən zi. Uneʼe wa moʼ bə mə kwi u naʼa aghəy abú ba, uŋwən fiʼe ubugə. Uneʼe wa moʼ bə mə kwi u tumə ba, u tumə akə fiŋ jum. Uneʼe wa moʼ bə mə kwi u aghəy chuŋ abú ba ingəʼ, u aghəy nigə ni iwuʼi.

9Mbən wuʼe ba akə itən fiŋ jum. Mbə bana unó iboŋ, iyimi anó ni aghəy ichuŋ iku igun. 10Mbən wuʼ umbən unya nə itən fiŋ jum. Mbən wumine umbən unya anji zənə mbən mə wumine itən inyo. 11Ka mbən bó ngwən imə faʼa abú Nwiye, mbən sayn Azugə Nwiye nyi ungɨŋ itən fiŋ aghəy kwi mbən faʼa akə ikay. Mbən faʼa abú Asɨyisəg akə itən fiŋ jum. 12Mbən wuʼe ngwən da unó mbənə mbən niŋi ikono igun, Mbən yimə fiŋ akə umaʼ ujum mbənə mbən mə zəw ingəʼ nibə chaʼara Nwiye akə umaʼ ujum. 13Mbən ghaba u aghəy mbənə umə inen inaʼ abú ba Nwiye mbənə cha u aghəy abú úŋwən. Mbən num ba isoʼ ungɨŋ itən na nji chuŋ. 14#Mat 5.44; Luk 6.28Mbən zi aborobod igun ba mbənə umə nwini itən inya ughəw. Mbən zi mə aborobod akə ma indon. 15Mbən wuʼe ngwən nə ba mbənə umə wuʼe uma, nibi idey nə ba mbənə umə idey. 16Mbən chomo akə anó feyn nə umbən unya. Ka mbən mə komo ngwən iguwə, asɨmə mbən ni bumə nə ba kukuŋe. Ka mbən kono ngwən kwi mbən yə nə iwe chigə ba ujum.

17Ka mbə wiy ngwən ibɨy akə ibɨy, asɨmə mbən num amaʼ ni aghəy amə unó mbənə ba ujum mi kyay kwi amə unó chuŋ. 18Mbən aghəy unó ujum izən kwi mbən yə chomo akə aborobod nə ba ujum. 19Umbuŋ uzi nu awuʼi kwaʼa ingəʼ, ka mbən mə iwiyə ngwən unó, asɨmə mbən sayn anó ni iwiy anó abú Nwiye, damugə ayə ungɨŋ Aŋwaʼanayn Nwiye kwi, Asɨyisəg ghayn kwi, “Amə umugə mi iwiy. A yi iwiy.” 20Asɨmə, “injəy bə sə zaŋa abú ungwə wa bana, naʼa aghəy jəgi abú uŋwən, adoʼ bə zom abú uŋwən, naʼa aghəy moʼ abú uŋwən unugə. Ngwə bə aghəy nigə, indere atəw yi ibiya uŋwən. 21I beni ayə kwi anó iboŋ moʼ chigə ayə, asɨmə chigə unó iboŋ nə ichuŋ.”

Currently Selected:

Roman 12: NGI

Highlight

Copy

Compare