Romanos 9
9
Hoyakalu Hiyrunu Yine Malixlena Piranapni
1Cristo himatlu halikaka pirana ntshina. Hi nweyawata. Nohchinikan-koxa hiphujtatno Hoyakalu Hiwejikaluruya hi nweyawata.
2Wane nixa. Nwamonuwpotuta. Katshino hajno ptowru hohnekananuko.
3Repixkamkana nomolene hitamka hiknokakjixinwa Cristo yehiya, nonerune nomane nmoletshine tshinanu.
4Wannani israel-nerune Hoyakalu nurrene hiwhenene rixyawakna. Hoyakalu hoyaknu hetatshinetka hiyrunu wale ptowruka Hoyakalu hinkaklexyana himwatshinetka. Hoyakalu henekatkana Moisés yonreru pirana hiyrunu Hoyakalu rimalwuxyawakna renekna. Waneyna Hoyakalu hinkaklexyana.
5Hitsrukatshinnixkani wannani Cristo molennixkani himaneyna. Waleni Hoyakalu ptowru potuko towutatshri. Himalwutkalurni wale ptowru hohnekananuko mnikawnakatupni. Amém.
Hoyakalu Ptowru Potuko Towutatshri Rixyawaka Piranapni
6Himka hmahijer-tokanutatka Hoyakalu israel-nerune tshinanu. Seyni hi ptowru israel-nerune Hoyakalunerune potuko hixnawa.
7Hiyrun-koxa hi ptowru Abraão-ni klopichane halikaka Hoyakalu whenene hixnawa klu tshinanu Hoyakalu wan-tshinru Abraão-ni: “Piklopichane potuko Isaque klopichanepni ntshina hinkaklexyawakatkayi pixka.”
8Hiyáhoni hi ptowru Abraão-ni klopichane Hoyakalu whenene hixnawa. Seyni Hoyakalu whenen-potuko wannakni wanna ptowruneka Hoyakalu whenenepa Hoyakalu Abraão-ni hinkaklexinritka.
9Hoyakalu wan-tshina hinkakletniru Abraão-ni: “Rapokpapkoluxinipa nsatokanu waneya Sara jeji matkakanu.”
10Hiyrunu hi wale tsonupni seyni Rebeca wuhenetanna hepi, pa hirupkana, waleni wutsrukatni Isaque-ni.
11-12Waneya hi hmatutawana hepi mturune seyni Hoyakalu wan-tshinatkalo Rebeca: “Hepurtshi towutanru tsrujru.” Hiyrunu mturune hi kihleru hi hektutuko hkamhawana. Seyni Hoyakalu wan-tshina hnurrerupni waleko ralukanru hnurrene rixyawakapna. Hnuretka klu tshinanu Hoyakaluko tomhanru, hi jejiko hkamrure tshinanni.
13Wane htshinyawaka yonatkaluru: “Jacó namota seyni Esaú nahnanuta.”
Hoyakalu Hetwamonrewle Piranapni
14Hanhe wtshinanu xye tshinanu? Hoyakallahe mpotukatu? Hike, hikeklu!
15Klu tshinanu Hoyakalu wan-tshinru Moisés: “Nepixanru katuktako naluk-hepixleta hiyrunu katuktako naluk-hetwamonreta, netwamonutanru.”
16Hiyáhoni Hoyakaluko nuretanru katukta raluk-hetwamonreta. Waneya Hoyakalu nuretanrupa hi yine kamrure hi yineru halujyawaka tshinanu.
17Hoyakalu tokanu yonatkaluru wan-tshinru Faraó Egito pohire: “Xye tshinanu nutakyi phuru pixyawaka, npixkonu nuphujetanru pixa tshinanu hiyáhoni nhiwaka pohitko psol-tshijneyako.”
18Hiyáhoni Hoyakalu hetwamonutlu katukta raluk-hetwamonreta seyni katukta raluka chikhajiwkakleta, hchikhajiwkaklu.
Hkamhaleru Hi Hallitanru Hoyakalu Piranapni
19Hiyáhoni satu wan-tshininno: “Klu tshinanhe hkahekwuna? Kathe himaletlu Hoyakalu halujyawaka?”
20Seyni pixa yineruchayi. Hanhe xawaka pixa kahekletlu Hoyakalu? Hachhaji kamhakaluru hi kaheklu hkamhakjeru wane htshinyawaka: Klu tshinanhe wane pixa kamhaletno? hi htshina.
21Hi he rumukata kkamhakleru wale jpako kamhalexyalu satu kihleru, satu hektutu?
22Wan-rixa Hoyakalu. Rahkalene ralpokohnaputatka ramhiywakapna Hoyakalu tsru hakotlu rixachakananyehitna klu tshinanu Hoyakalu haluk-hekhirexnawa hjihekannu, yine himukata hetlexyawakaplu hpixkonu.
23Hkahwakhohnekanatna Hoyakalu yine, retwamonre yoptotatshinepa tshinanu rekhixyawakna royaknu tsrur-potuko tshinanu. Nyi yine Hoyakalu halpokotatka royaknu yoptotatshinepa.
24Nyi yine htshanixlene hixakni. Hi judeu-nerune tsonni seyni judeu mixkan-koxa htshanixatka Hoyakalu.
25Wane htshina yonawahlo Oseias-mta: “Wanna nonerune mixkanekananu, nonerune ntshinanna. Hiyrunu nma mamotakanatanutu nalukanru ntshinanru.”
26Mitshikananu wla htshinanwakatka: “Hixa hi nonerunhi seyni wanepnawaka Hoyakalu Hiwekatshri whenene htshinkona.”
27Hiyrunu Isaías-ni wla tshinanwakatna israel-nerune, hipokananu wane htshina: “Yáholu hixpotpakhi, ksatuji mar powha hwatshri pejnuphi seyni satkaka tsonu hiwekkakko.
28Klu tshinanu Tsru Hixikatshriwa Hoyakalu hi hix-hohne hkahwakanu hkamrure psoluka ralixyawaka seyni hnikathapkatanru.”
29Wane potuko htshinnitka Isaías-ni: “Tsru Hixikatshriwa Hoyakalu ptowru potuko himukatatshrini, hma mixetkanumka satkaka klopicha waneyamka Sodoma, Gomorra poktshinni pixka hixatshinemkapwu.”
Hoyakalu Potukatanune Hoyakalu Halixatshine Piranapni
30Hiyáhoni kluhe raluka tshinreta? Wla htshina, judeu mixkane hi hijhakanatlu Hoyakalu potukaxyawakna wanepnawaka hpotukatkana ralixlena tshinanu.
31Seyni israel-nerune yahot-homkahretmakluna Moisés yonreru pirana hpotukaxnamkawana Hoyakalu yhaleya seyni hpupjetna.
32Haklu tshinanhe wan-rixna? Klu tshinanu hi halixlu hmunanhatkana hpotukaxyawakna seyni rujhaluna Hoyakalu yhaleya hpotukaxnawakwana Moisés yonreru pirana romkahre tshinanu phutna. Hiyáhoni rutspetluna sotlu hitspetkaluru pixka.
33Wane htshina Hoyakalu tokanu yonatkaluru: “Sião poktshi nutakanru sotlu hitspetkaluru, sotlu yawnakaklewatatshri seyni xye sotlu munanhatshripa hi hmahijerutanu.”
Currently Selected:
Romanos 9: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
