Romanos 16
16
Paulo Hichiniklewle Satkaka Roma Poktshi Hajene Tshinanu
1Nunkakhi kchinikanro wimole Febe Jesus tshinanu, Cencreia Cristo halixatshine hapatjetatshine tskala kamrurewaxikatshroni.
2Hyoptotanro twu wimole Wutsrukate Jesus tshinanu, wane potuko raluk-hixleta Hoyakalu kotspalatanune. Hepixanro xako psoluyako talukanru klu tshinanu hixo yine tepixatka wala hiyrunu hit-koxa tepixatka.
3Priscila hiyrun-koxa Áquila nuchinika nepirene nkamrure Jesus Cristo tshinanu.
4Hi hipuktshiko hpikatkana hita tshinanu. Hiyáhoni npoyahnutna seyni ptowruneka Cristo halixatshine hapatjetatshine xkehkaka judeu mixkanetka koxa poyahnutna.
5Hiyrun-koxa nalikanna Cristo halixatshine wannapji hapatjexikatshine. Puchinikkakanru nimatletler-potuko Espêneto tshinkaluru. Walekatkani mitshikananu Cristo halixatshritka Ásia tshijneya.
6Nalikanro Maria. Hixa tshinanu tkamrurewpotutatka.
7Saprikkaklu henekanna Andrônico hiyrunu Júnia tshinkaluru ntshijne hajene, hitayma preso hwajekanatatshine. Rimatyehitkanna nuretkalune tskala. Hi nalixawalu Cristo wanna hali halixletatkalu.
8Nuchiniklu Amplíato tshinkaluru, nimatletler-potuko Wutsrukate Jesus hiwakaya.
9Hiyrunu Urbano tshinkaluru nuchinika wepire Cristo kamrure tshinanu hiyrun-koxa nimatletler-potu Estáquis tshinkaluru.
10Nalikanru Apeles tshinkaluru, hixo kata ralixle rekhipotuta riwekle tshinanu. Nuchiniklu Aristóbulo tshinkaluru hiyrun-koxa rayinetene.
11Saprikkaklu ntshinanwakatlu Herodião tshinkaluru judeu-neru ntshijne hajeru hiyrunu nomolene Cristo tshinanu Narciso tshinkaluru hayinetene saprikkaklu nenekanna.
12Nalikanna Trifena tshinkaluro hiyrunu Trifosa tshinkaluro Hoyakalu kamrure kamhatshrone, hiyrun-koxa nalikanro nimatletlero nuchinikanro potuko Pérsides tshinkaluro, wala koxa Tsru Hixikatshriwa kamrure kamhatshro potukni.
13Saprikkaklu ntshinanwakatlu Rufo tshinkaluru, jmerpotlu Hoyakalu kamrureya hiyrun-koxa hsaprikkakanro Rufo hinro, walakni hislahno hatewa toturutkano.
14Nalikanna Asíncrito tshinkaluru, Flegonte tshinkaluru, Hermes tshinkaluru, Pátrobas tshinkaluru, Hermas tshinkaluru hiyrunu wanna ptowruneka wannaymalune.
15Saprikkaklu ntshinanwakatlu Filólogo tshinkaluru, Júlia tshinkaluro hiyrunu Nereu tshinkaluru hiyrunu himole suxo, hiyrun-koxa Olimpas tshinkaluru hiyrunu wanna ptowruneka wannaymalune Hoyakalu kotspalatanune.
16Halikkakanu hixa satkakhi Hoyakalu hichiniklewleya. Ptowruneka Cristo halixatshine hapatjetatshine xkehkaka halikkakanu Cristo-ya.
Paulo Hiykoxyawakna Cristo Halixatshine Piranapni
17Nanjithi nomolene, hi hetachatanna yine hixa halixle kotspalapiratatshine hixa halixle kojwakatshine, pnuko hixa hasruklewletatshine hi hixa hasruklewle pixka rixa hasruklewletna. Hi xako wannayma hyanjetanu.
18Klu tshinanu wan-hixatshine hi Cristo Wutsrukate romkahitna seyni wannako hisatna romkahitna. Kihle tokanna kihler-pirana htshinyehitna yine hike muslahkane hyokwihchinikanuxyawakapna.
19Ptowru yine jempiranyehitlu hixa pirana. Hix-hima hamotpotutlu hiwekkaklewatatshri pirana hiyáhoni hixa poyikowkakno. Naluklu jimatkaleru hixyawaka kihleruya seyni hi hektutu himatkalewyehitanu.
20Hiyrun-koxa Hoyakalu wapnanuhchinikankakjeru, xekoyaka hallitanru Satanás-pni. Hixa hakakanru. Nanjitlu Hoyakalu, Jesus Cristo hihlenu himatkalewkakanhi.
Paulo Hepirene Hichiniklewle Piranapni
21Timóteo, nepire halikhi. Hiyrun-koxa Lúcio, Jasão, Sosípatro tshinkalune nonerune halikhi.
22Hita Tércio-no, Paulo yonawahle kamhatshrino halikhi Tsru Hixikatshriwa Cristo hiwaka tshinanuya.
23Nwapjijetanru Gaio tshinkaluru hiyrunu Cristo halixatshine wimapatjetanune halikhi. Erasto tshinkaluru, xye poktshi tiyirote hislahatshri, halikhi. Hiyrun-koxa Cristo tshinanu wmoletanru Quarto tshinkaluru halikhi.
24Nanjitlu Wutsrukate Jesus henekachale hihlenu hixa tshinanupa. Amém.
Paulo Hoyakalu Himalwuxyawaka Piranapni
25Wuya wimalwutanru Hoyakalu! Wale himukata halixkaklepotuthi hixa, halixlewluya Jesus Cristo pirana, kihle piranalu potuko hiwekkaklewatatshri pirana, nunkakletleru tshinanu. Waleni halikakalutu pirana phujetanuru hix-hohne potuko mitshikananu yohimakanatkaluru pirana.
26Seyni xawakni, hipirana halikakalutu phujewak-potuko rapokatka Hoyakalu tokanu hinkakletatshine yonre tshinanu. Hiyrun-koxa Hoyakalu mnikawnakatuko towutlu rimaxikowakatka ptowru tshijneya, ralixko hiyrun-koxa romkahitko ptowru yineya.
27Hoyakalu satupkalutu, ptowru potuko himatjematshrini, himalwutkalurupni ptowru hohne mnikawnakatupni Jesus Cristo tshinanu. Seyoka.
Currently Selected:
Romanos 16: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
