Romanos 15
15
Cristo Wyimyawaka Piranapni
1Hixa hixkolunwu halixlewluya wujhalu wepixyawakna hihroka halixletatshritka hinolu ranijyawakna xye riwejinriyna. Hi wumukata hixako walujyawaka tsonu wuchinikanrexyawaka.
2Seyni hixa satkakwu wujhalu wimwastsirene wepixyawakna kihleruya, wtseruwnakakanna ralixleyna.
3Klu tshinanu Cristo hi wale nanwaka tsonu hichinikanrexnawa. Seyni wan-rixa Jesus htshinyawakakotnaka yonatkaluru potukalu, wan-tshinatshri: “Heyiklewlu htshina heyiklexyawakyina pixa, hita hoho rapoka htshina heyiklexyawakyina pixa.”
4Psoluka yonatkaluru potukalu pirana yonatka hixa wasrujikolu tshinanu ruchinikanuwkakwu wkahwakachaxyawakaplu Hoyakalu hihlenu hiyrunu repixlewle. Xye wukchika Hoyakalu tokanu yonatkaluru piranaya.
5Hiyáhoni Hoyakalu wmixkotjeru hiyrunu wpoyikotahchinikanutjeru hepixanwu pa hchinikanurunwu wixyawakapa hixkakluko, womkahixinri Cristo Jesus hixjexyawaka.
6Pa hchinikanurunhi pa tokanurunhi himalwutanru Hoyakalu, Jesus Cristo Hitsrukate.
7Hiyáhoni hyoptokakanu kihlehchinikanurunhi Hoyakalu himalwuxikolu tshinanu klu tshinanu wan-rixa yoptoletatkawu hixa Cristo.
8Klu tshinanu wane ntshinhi Cristo hepixatkana judeu-nerune rekhixyawakna Hoyakalu munanhakalurni klu tshinanu Cristo poyahokaklu wale pirana psoluka judeu-nerune hitsrukatenni Hoyakalu mitshi hinkaklexyanna.
9Hiyrun-koxa repixatkana judeu mixkane rimalwuxyawakapluna Hoyakalu retwamonre tshinanu. Wane htshina yonatkaluru potukalu: “Hiyáhoni nuphujtatanyi judeu mixkane yehiya. Pixa hiwaka nimalwutanu chikaltshiya.”
10Hiyrunu wane htshina: “Himalwutanru hixa judeu mixkanhi Hoyakalu nurreneyma.”
11Hiyrun-koxa wane htshina: “Ptowruneka judeu mixkane himalwutanru Tsru Hixikatshriwa Hoyakalu. Ptowru neruka himalwupotutanru Hoyakalu.”
12Hiyrunuko Isaías-ni wan-tshinni: “Runinipa satu Jessé klopicha hajerupa runanu judeu mixkane htowuxyawakapa. Hiyrunu wanna kahwaklerupni wale.”
13Nanjitlu Hoyakalu wkahwakleru hpoyikowkajyawakwu wajiya, wapnanuhchinikanuxyawaka walixle tshinanu. Waneya hixa kahwakachale pnute hya tseruwnaleta Hoyakalu Hiwejikaluru pixkonu tshinanu.
Paulo Hinkaklexyawaklu Waleko Hipirana Piranapni
14Nmoletanune walixle tshinanu, nimatlu hixa katseplu ptowru kihleruya hiyrunu katsepoyhi himatkalewlu hiyáhoni hixa himata hiykokaka hixkakluko.
15Seyni twu yonawahlo phujewaka nutaklu satkaka pirana wane nixa hichinikkaklethi. Phujewaka nutaklu klu tshinanu Hoyakalu henekno xye kamrurtshi nepixyawakhi.
16Cristo Jesus towrerno judeu mixkane nepixyawaka. Sacerdote kamrure pixka nixa hiyáhoni nkamrurni Hoyakalu pirana, kihle piranalu potuko hiwekkaklewatatshri pirana nunkaklexyawaka nkamhajeta. Wane nixa judeu mixkane henekachalune rumukata hixlexyawakapna Hoyakalu hikchikhihlenreru potukatlewatatshri Hoyakalu Hiwejikaluruya.
17Hiyáhoni Cristo Jesus nimwale tshinanu, npoyikowahchinikanuta nkamrure Hoyakalu tshinanu.
18Hiyáhoni hi npika hinkakletletanru wale ptowruka Cristo wan-rixa kamrureta hita tshinanuya. Walekni nunkakle hiyrunu nkamrure tshinanu wane nixkakna judeu mixkane Hoyakalu romkahixyawakna;
19himyekaklewatatshrikaka, hiyakolukaka hiyrunu Hoyakalu Hiwejikaluru pixkonu tshinan-koxa. Hiyáhoni ptowru poktshikaka nyapyawaka, Jerusalém poktshi haté Ilíria tshijne nali hinkakletlepotuxyatkalu kihle piranalu potuko hiwekkaklewatatshri pirana, Cristo pirana.
20Xyekni nalukleru potuko, nunkaklexyawaklu kihle piranalu potuko hiwekkaklewatatshri pirana ptowruchako hanucha hajenektako hi jemawalu Cristo pirana. Hi naluklu satu yineru hinkakanunetka nunkaklewyehixyawaka.
21Wane htshina yonatkaluru: “Munkaklewyehitkonewa retanruna. Mjemkanewa rimatjemanruna.”
Paulo Roma Poktshi Hajene Hichinijyawaka Piranapni
22Wale tshinanu hixo kata nimaletka hix-yehi nyinripa.
23Seyni xawakni hi nwiya kamrurtshi xye sretaya hiyrunu hix-hohne naluk-hapyehretmakhi.
24Hiyáhoni Espanha tshijne nyinpatka, napyehimtanhi. Naluk-koxa hixa hepixyawakapno Espanha nyiywaka, nali hetlexinpatkahi pchini tsonu.
25Seyni xawakni Jerusalém poktshi nwaka nyanutka nepixyawakapna Cristo halixatshine potukalune.
26Klu tshinanu halixatshine hapatjetatshine Macedônia tshijne hajene hiyrunu Grécia tshijne hajene hikchikhihlenutlu tiyiro renekachaxyawakna potukalune Jesus halixatshine hike mwikane Jerusalém hajene.
27Wannako hikchikhihlenutlu wan-rixyawakna. Seyni halikaka wanna hijhalu repixikowakna mahaxikatshine. Judeu-ne hapikatkana judeu mixkane kihler-pirana hiwekkaklewatatshri pirana. Hiyáhoni judeu mixkane hijhalu rimwalerna xye tshijne hijhikaluru rapijyawakna judeu-nerune.
28Seyni nali kamhalexinri xye, nali heneklexinipna wala tiyiro psoloka, hapatjetkaluro wanna tshinanu waneya Espanha tshijne nwaka nyamtanutka. Wane nyinpatka, netamtanhi.
29Nimatlu napyehixiniphi, Cristo hihlenu hepixlewatatshri psoluka nimapokanu.
Paulo Hanjitna Cristo Halixatshine Ranjihohneyehixyawakapluna
30Nanjithi nmoletanune, Wutsrukate Jesus Cristo tshinanu hiyrunu Hoyakalu Hiwejikaluru hichiniklewle henekachale tshinanu nanjipotuthi himanjihohnetanno Hoyakaluya.
31Hanjitanru Hoyakalu ruslahyawakapno malixkane yehiya Judeia hajeneya. Hiyrunu hanjiyehitanno nkamrure Jerusalém poktshi hajene tshinanu; hyoptotko nkamrure potukalune Jesus halixatshineya.
32Hiyáhoni wan-rixkoklunpatka napyehitanhi npoyikonuyma Hoyakalu halujinipa, napnanutanu hix-yehi napokamxinpatka.
33Nanjitanru Hoyakalu, wapnanuhchinikankakjeru hixayma hwajexyawakapa. Amém.
Currently Selected:
Romanos 15: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
