Romanos 14
14
Hi Heyikanru Hmoletanru Jesus Tshinanu Piranapni
1Hihroka halixletatshri hjihlokkakanu hixa tskalaya. Seyni hi hihjekakanu wale hihchinikanu tshinanu.
2Satuko yineru ralixle tshinanu ptowru potuko hnika. Seyni satuko hihroka halixletatshri kasureru tsonu hnika.
3Katukta ptowru nikalu hnika hi heyikanru ptowru mnikole nikatshri. Hiyrun-koxa ptowru mnikole nikatshri hi hiykotanru ptowru nikalu nikatshri klu tshinanu Hoyakalu hi heyiklu.
4Han-hixatshriyihe pixa satu yineru towreru peyijyawaka? Waleko htowutjeru hetahchinikanutlu ho kihlerhe htowreru ho hektutrahe htowreru. Klu tshinanu Tsru Hixikatshriwa Hoyakalu towreru himukata hepixletlu htowreru kihleruya.
5Satuko yineru kahwakpiratlu satu hixatshri hohne seyni satutnaka kahwaklu ptowru hohne pixkakakluni. Hiyáhoni satkaka yineru hijhahchinikanutanu hanu potu rixahchinikanuta.
6Hiyáhoni katukta kahwakpiratlu satu hixatshri hohne Hoyakalu tshinanu wan-rixa. Hiyrunu katukta nika, Hoyakalu tshinanu hnika, klu tshinanu hpoyahnutlu Hoyakalu hnijitu tshinanu. Hiyrunu katukta hi ptowruka nika Hoyakalu tshinanu wan-rixa klu tshinanu Hoyakalu hpoyahnuta.
7Hi satukna towuxnawa riwejyawaka hiyrunu hi satukna towuxnawa rupniywaka.
8Wiwejini, Hoyakalu tshinanu wiwekanu. Wupninipa, Hoyakalu tshinanu wupnanu. Hiyáhoni ho wiwejini ho wupninipa Hoyakalununwu.
9Klu tshinanu Cristo hipna riwekatnaka rekhixyawakna hiwekatshinewa Tsru Hixikatshriwatni hiyrunu hipnatshinetka Tsru Hixikatshriwatni wale.
10Hiyáhoni klu tshinanhe pixa hikolukanuwnayehitna pimrine pimolene Cristo tshinanu? Klu tshinanhe peyiklu Cristo tshinanu pmoletanru? Klu tshinanu pa hohne Hoyakalu hetamayxaklerewatatshri sreta wyanu hixa ptowrunepnikwu.
11Klu tshinanu wane htshina Tsru Hixikatshriwa yonatkaluruya: “Wane htshina Tsru Hixikatshriwa, niwejyawaka tshinanu ptowru yineru yoptsojityehitanno hiyrunu ptowru yineru hiphujetanru Hoyakalu nixyawaka.”
12Waneya waneklupa ptowrunekwu hinkaklexinwa Hoyakalu yehiya.
Hi Pujrukkakanru Cristo Tshinanu Pmoletanru
13Hiyáhoni hi wane pnuteko heyikakanu hixkakluko. Seyni halikaka hijhahchinikanutanu hitspetkaluru pma mutakyehixyawakaplu Cristo tshinanu pmoletanru hma mujrujyawakanupa, hma majnakowaxyawakanupa.
14Jesus nalixyawaka tshinanu nimatpotutlu hikeni himtuklewachatatshri. Seyni katukta pa hixanu himtuklewatatshri rikahwaklu waneya waleko htshinanu rumtujnawa.
15Pkojwaka halixlexinri Cristo tshinanu pmoletanru nikluru tshinanu hiyáhoni hi puchinikanretlu Cristo tshinanu pmoletanru. Hiyáhoni hi hetachatanru hnijitu jijruk-halixletna yine Cristo hipnayehitanune.
16Hi pitshitanru kihleru pkahwakleru hektutu htshinikowaka.
17Klu tshinanu Hoyakalu pohirewaxyawaka hi niktshi ho hirkaluru tshinanni seyni halikaka kihlerukni, hapnanuhchinikanruni hiyrunu poyikowluni Hoyakalu Hiwejikaluru heneklewleni.
18Hiyáhoni katukta homkahjetlu Cristo xye chinikantshiya, Hoyakalu poyikowanwakatanru hiyrunu yine hikchikhihlenutanru wan-hixatshri.
19Hiyáhoni womkahitanru xako wale ptowruka hapnanuhchinikanru heneklewatatshri hiyrunu wujhanru hanu potu wumukata mixkotkakleta hixa satkakwu.
20Hi nikalu hikolukle tshinanu himtukanru Hoyakalu kamrure. Hikemkani nikalu tshipetkaluru seyni wpupjeta wnikanru tshinanu yineru wumtukahchinikanuxini.
21Hiyáhoni kihle koxlu hi nikaluko hnijyawaka, hi vinho-hako ruryawaka hiyrunu hi kluneruktako poyaho himtukahchinikanrewletatshri Cristo tshinanu pmoletanru tshinanuya.
22Nikalu hiyrunu hirkaluru pirana hanukta pixa hetletanru, waleni pixanu tsonni Hoyakaluyma. Yineru hkamhaleru kihleru hkahwajinri hi hkojwakahchinikanuxnawa seyni hpoyikowahchinikanuta.
23Seyni kojwakahchinikanutatshriko yineru nijinri, Hoyakalu yehi rukolujinwa nikatshri. Klu tshinanu hi ralixle tshinanu hnika. Klu tshinanu kluneruktako hkamha yineru hmalixlenuyma waleni hektuntshi.
Currently Selected:
Romanos 14: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
