Romanos 13
13
Cristo Halixatshine Hijhalu Tsru Hitakkalune Hyijnakoxyawakna
1Ptowrunek-yijnakotanna tsru hitakkalune. Klu tshinanu hi rawa yine hitakleru seyni Hoyakalu hitaklerupkani. Tsru hixikatshinwa ptowrunekni Hoyakalu hitakanune.
2Hiyáhoni hitakkalune kamnitatshine Hoyakalu halujyawak-koxa hkamnitna. Katukta wan-hixa rukolujinwa.
3Hektutu kamhatshri tsonu pikanna tsru hitakkalune seyni kihleru kamhatshine hi pikanna. Tsru hitakkalune hmaluka pikletkanuklunupa, kihleru hkamhanu. Waneya tsru hitakkalune himalwutanhi.
4Klu tshinanu walekni Hoyakalu towutle kihleru hexikolupa. Seyni pmajnakowaxini, ppikanu. Klu tshinanu hitakkaluryi pixa papnokaxikowaka. Walekni Hoyakalu towre hektutu kamhatshine hapnokaxikowakapa.
5Wale tshinanu hixa hijhalu tsru hitakkalune hyijnakoxyawaka. Hi hapnokaxikolu hkahwakpiraxyawaka tshinanu tsonu hyijnakotanna seyni hihchinikanu himaxyalu hanur-potni kihleru tshinanu.
6Hiyáhoni wale tshinan-koxa xye tshijne yokanatatshri koxa hwenutanu klu tshinanu Hoyakalu halujyawaka hkamhajetna tsru hitakkalune. Ruslahpotutanruna Hoyakalu kamrure.
7Katukta h-deve-tanu hwenutanru. H-deve-xinru xye tshijne tsru hitakkalune hijhawenuyehixikolu, hwenutanru. Hkahwakpiratanna kahwakpiratkalune ptowruneka.
Pimrine Wixyawaka Piranapni
8Hike yineru h-deve-tanu tiyiroya seyni deve-tatshinephi hamotkakleya. Katukta hamotlu rimwastsireru romkahitlu Moisés yonreru pirana psoluka.
9Klu tshinanu yokanruru yonatkaluru wan-tshina: “Hi pimopatlewatanu, hi puylalewatanu, hi ptshowhuwatanu, hi ksotanuhopyi”; xye yokanrukaka hiyrunu hixo pimri yokanru wane htshina seyni waneru satu yokanru xye ptowruka yokanruru; wane htshina: “Pamotanru pimwastsitanru pixnanuko pixka.”
10Klu tshinanu katukta hamotanru rimwastsitanru hi psojikna himtukanru. Hiyáhoni pimwastsitanru pamoxyawaka poyahokaklu Moisés yonreru pirana psoluka.
Hi Wumnanhinri Kihleru
11Hiyáhoni wan-hixanu klu tshinanu hipapkolutkani hiyojyawaka klu tshinanu hi howukatkalu wiwekkajikolu, wehalixletka hohne pnute.
12Hatatjewa hoyetshno nikawnapiratatka, hohi hi howukatka. Hiyáhoni wuknokanru mapchahawaka kamrure seyni wkochtshekanru wyahotkakapre katawaka wyahotkajyawakpatka.
13Katawaka pixka wixa yanretanu kihleru xako wkamhanu. Hi himri ptowru hixatshri womkahitanu, hi suxohewluko, hi patewahonutshiko, hi yanhakakluko, hi sotanuhonutshiko womkahitanu.
14Seyni Wutsrukate Jesus Cristo wutajinwa. Hiyrunu hi wujhanru wimane halujyawaka wkamhiywaka.
Currently Selected:
Romanos 13: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
