Filipenses 4
4
1Hiyáhoni nmoletanune Cristo tshinanu, nuchinikanune, namotpotuthi. Hixa poyikowkakjetno. Nalixkowata hixa tshinanu. Hiyáhoni xawakni poyehi yopkaklephi halixlu Tsru Hixikatshriwa Cristo-ya.
Hiykolukaka Piranapni
2Nanjithi hixa Evódia, Síntique tshinkalone pa hchinikanuronephi Tsru Hixikatshriwa Cristo-ya.
3Hiyrun-koxa nanjityi pixa nepiryi, pepixyawakapna nyi hepi suxone nepixjerone kihle piranalu potuko hiwekkaklewatatshri piranaya. Hiyrun-koxa Clemente hiyrunu pimrine nikamrurewatanune pepixanu, hiweklumta hitakhiwakatkalunetka.
4Himuwhohnekanatanu Tsru Hixikatshriwa Cristo-ya. Hiyrunu wane ntshinanutnaka, himuwatanu.
5Kchinikanurunephi ptowru yine tshinanu. Klu tshinanu chinpotukawa runanu Tsru Hixikatshriwa Cristo.
6Hikeko hkojwakahchinikanuxinwa seyni ptowru potuko hanjihohneru hanjixinriya poyahnutleyma hinkakanru Hoyakalu hanjitanrukaka.
7Waneyakni hapnanuhchinikanru Hoyakalu henekachalewle ptowru potuko yine himatjemle pnuterutu hinothajitanhi, rinotahchinikanutanhi Cristo Jesus tshinanuya.
Rixa Hichinikanuwlexyawaka Yineru Piranapni
8Hiyahokni nmoletanune Cristo tshinanu hanurni halikakalutu, hanurni kahwakpiratkaluru, hanurni wane potuko hixatshri, hanurni powralu, hanurni kihleru, hanurni kihle piranyehimenu, wan-rixini kihleru, himalwutkalurni, xye pirankaka hichinikanretatshri.
9Hyijnakotanrukaka, hetlerkaka, xyekaka nasrujikolkaka nasrujyatkahi hkamhanu. Waneyakni Hoyakalu wapnanuhchinikankakjeru hixaymapa.
Paulo Poyahnuxyawakna Yine Piranapni
10Numuwpotuta Tsru Hixikatshriwa tshinanuya hixa hichinijyawakpatnakno xye yrunu. Hix-hohne hixa hi himukatatka seyni xawakni hixa hichinijyawakno pirana pohiwpotutatka.
11Seyni wla ntshina hi nmahaxinri tshinanni. Klu tshinanu nasruhatkalu npoyahnuxyawaklu kluneruktako nexini.
12Nimatlu nmahaxinri, nimatkoxlu npohirewaxinri. Xye hasruklu nasrukka hanuruktako tshinanu ho jinanno ho natshno ho hixoyno ho nmahaxya seyni kihle hchinikanukno.
13Nmixkotjeru tshinanu ptowru potuko numukata.
14Seyni kihleru hkamha hepixyawakno nsalewninriya.
15Hixa Filipos poktshi hajenhi himatlu mitshikananu kihle piranalu potuko hiwekkaklewatatshri pirana nehinkakletletka Macedônia tshijne nuchpajinixka hike Cristo halixatshine hapatjetatshinkaka hepixno. Seyni hixapka hepixno tiyiroya, henekachaxyakakno.
16Klu tshinanu Tessalônica poktshi nwakanaxini hi pa katapka tsonu seyni hepi kata hyokananwakatno nmahaxinrikaka tshinanu.
17Himka nujhalu nenejikolu. Seyni naluklu hixa tsru potuko kihleru hapatjehnapuxikowaka, hixa kamrurkaka kihleru tshinanu.
18Ptowru potuko waneyno xawakni haté rixeta. Hike nmahaxya klu tshinanu Epafrodito tshinkaluru hanijyano hixa yokanatanru. Hixa henekachale henekachlu pixkalutni, kihlephalu phamluhalo pixkalutni, Hoyakalu hikchikhihlenutlu, poyahnutkalurni Hoyakaluya.
19Noyakalute hikchijinhi ptowru hmahaxinri waleko hpohirewnale royaknu yehi hwatshri Cristo Jesus tshinanuya.
20Hiyáhoni xawakni Woyakalute Hoyakalu, Wuru himalwutkaluru ptowru hohne mnikawnakatupni. Wan-hixkalurupyi.
Hichiniklewlu Piranapni
21Halikanna wanna ptowruneka Hoyakalunerune Cristo Jesus tshinanuya. Cristo tshinanu wmoletanune, hitaymalune hichinikhi.
22Ptowruneka hewi hajene Hoyakalunerune ralikanwakathina. Hiyrun-koxa César-pji hajene halixatshine halikanwakathi.
23Nanjitlu Wutsrukate Jesus Cristo henekachle hihlenu hixa ptowrunekhi tshinanupa.
Currently Selected:
Filipenses 4: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
