Filipenses 3
3
Mantshi Tsonu Mmunanhikowakanu Piranapni
1Hiyáhoni nmoletanune Cristo tshinanu himuwatanu Tsru Hixikatshriwa Cristo tshinanu. Halikakni hi nayoklu xye pirana nyonanwakaxyapatnakhi. Klu tshinanu hixa hihlenu hepixatshripni.
Cristo Pirana Minje Hasruklewatatshine Hislahinwa
2Hislahinwa wanna hektutu kamhatshine tshinanu. Hislahinwa wanna kawene hektune pixkalune tshinanu. Hislahinwa sustajmaneklerune tshinanu.
3Klu tshinanu halikak-potu jiprojhikatshinwahi hixa seyni hi judeu-nni. Seyni hixakni Hoyakalu kahwakpiratatshinwu Hoyakalu Hiwejikaluruya. Cristo Jesus munanhatshinwu tsru poyikowluyma hixni. Mantshi pirankaka tsonu mmunanhakanwu hixa.
4Seynimka hit-koxa himukata munanhaletlu nomane tsonu. Pimrinemka kahwajinwa rimwiywakluna satu pa hixanu hmunanhamanexnawakwa ha hitamka wane yohnik-hixa munanhalmanexinwa.
5Oito hohne rixinixka nmatuxinri njiprojhaptojimtatkatka. Israel-neru klopichno. Benjamim-nerno. Hebreu-potno hebreu-ne yehiya. Moisés yonreru piranaya fariseu-ne nixapa.
6Mixkotahchinikanrewlu pirana Cristo halixatshine hapatjetatshine nsaletjejekanatatka. Ha Moisés yonreru pirana potukalu hixkaklewatatshri pirana, hikemka nmayxajyatka.
7Seyni xye ptowruka nkaylerumkapa waleni nuknokachatatka Cristo tshinanu.
8Seyni halikak-potu Cristo nkayaxyawakapa tshinanu ptowru potuko hiknokachatkaluru nikahwakatka wale kachrijrutkani kihler-potuko Nutsrukate Cristo Jesus himatyehixikolu. Wale tshinanu namtaklu ptowruka hektutu, malukkotu nikahwaklu Cristo numukata yoptolexyawakapa.
9Cristo-ymalutu nixyawakapa hi hitako npotuknupni Moisés yonreru pirana homkahlu nma momkahixyawakanupa. Seyni npotukatjerni Cristo nalixle tshinanu, Hoyakalu potukaxyawaklu yineru halixlu tshinanu tsonu.
10Naluklu Cristo tsonu nimaxyawaka, Cristo yotunoxinri himukatle naluk-himatleta hiyrun-koxa hsalewnale yimatshri naluk-hixleta. Hiyrunu wale hipnale pixka nixikolupa.
11Waneyakni nkahwaklu hipuktshi tskala niwekkajikowaka.
Wumlujikolu Yoptotatshine Pixka Hixatshinepwu Piranapni
12Hi naluka wla tshinreta nalixatka ho nali potukatletkatka seyni nkosekakananumta, hanuktako numukata hwalexinri numlujikolu. Walekni Cristo Jesus hichinikanretanru hita hkayaxyawaka walenuko nixyawakapa.
13Cristo tshinanu nmoletanune, hi nkahwaklu nali yoptolexyawakatkalu numlujikolu. Seyni xye tsonu nkamhajeta. Natjiniyaka sreta nutaklu ptowruka niknohjerutka seyni nyapretaka hwapletanruni nkosekamxijeru.
14Nasukakananumta numukata hapoklexyawakaplu hasuklu hichinixyawaka numlujikolu nkayaxyawakapa. Waleni Hoyakalu tshanixle hiwekle hikeklu hohne mnikawnakatupni Cristo Jesus tshinanu.
15Hiyáhoni hixa ptowrunekwu tsru yinerunetkawu halixluya wujhatkalu xye chinikantshi. Seyni satkaka pnuko hixahchinikanuxini, xye chinikantshi mayxakle rimatjemkakanhi Hoyakalu.
16Seyni wapkapanrutka pixkalutu tshinanu wane potuko wya homkahretanru.
Cristo Cruz Rupniywaka Pirana Kamnitatshine Piranapni
17Nmoletanune Cristo tshinanu hixa mkoje yimanno. Hislahanunna pimrinni hixa Paulo-nwu pixka hixatshine. Wane pixkalune homkahitanu.
18Seyni rawna pimrine pnuko hixatshine. Hixo kata xye pirana nunkakatkahi. Xawakni xye pirana ntshinatnakhi ntshiyahleyma. Hiyáhoni wla pixka hixa hiwekletatshine Cristo cruz rupniywaka pirana kamnirewaxikatshinni.
19Nyini hamhikowaka yatshinepa. Royakalutnuna wannako himanna het-sotanuxyawaka. Kapatmenuruko ralixkojetna. Wannani xye tshiji hajeru tsonu hichinikanretatshine.
20Klu tshinanu hixapni tenhohne tshijne hajenepwu. Hiyrun-koxa wkahwakpotutlu wiwekkakjeru Jesus Cristo tenhohne hichpajikatshripa.
21Wale kachrijewnakakanru wimane hihrokakanatatshri, himat-nikawnatshri waleko himane hoyaknu pixka rixyawakapa. Wan-rixanu rumukatleyma hiyahokni rumukata ptowru potuko htowuxyawaka.
Currently Selected:
Filipenses 3: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
