Filipenses 2
2
Cristo Jeji Pixka Rixnawa Seyni Ptowru Potuko Pnute Tsruyni Wale Piranapni
1Hiyáhoni hapnanuhchinikanru hwini Cristo tshinanu hiyrun-koxa hepixikolu ruchinikle tshinanu, hiyrun-koxa pa hchinikanurutu Cristo Hiwejikaluruyma hiyrun-koxa hichinikkaklu, hetwamonrewlu hixkakluko hwini,
2numuwle hpoyahokakanu, walerutu hchinikanu hixa hichinikanretleru hiyrunu walerutu hichiniklewlu himwatshinephi pa hchinikanurune hixini. Satupka chinikantshi himwatshinephi.
3Hike hkamhanu hixako halujyawakacha. Hike hkamhanu halixkotachaxikatshinwa hixyawakapa. Seyni malixkoxikatshinepwahi. Satkaka kahwakanru pimrine wale yohnik-hijhakalune rixyawakna.
4Satkakhi hixa hi hixa halukleru tsonu hislahanu seyni pimrine halukanru koxa hislahanu.
Cristo Pixka Wixa Masatlexinwa Piranapni
5Waneyaphi walerutu chinikantshi Cristo Jesus himwaleru chinikantshi pixka.
6Ptowru hohnekananuko Hoyakalu pixka potuko rixatka seyni hi ruchinikanretlu Hoyakalu pso tsru hixikatshriwa rixyawaka muchotkotmakni.
7Seyni wale nanwaka hichokajnawa. Towutlu hyoptokajnawa. Yineru yáholu rixnawa.
8Yineru yáholu rakanhiyatka waneya hmasaxnawa. Kajnaklu Hoyakalu halujyawaka haté cruz rupniyatka.
9Hiyáhoni xye tshinanu Hoyakalu tsru potu rutaklu. Hiyrun-koxa renekhiwakatlu ptowru potuko hhiwaka tsrurutka.
10Hiyáhoni Jesus hiwaka tshinanu ptowruneko himathet-hitsrukateta waneya hyoptsojityehitluna, tenhohne hajenkaka, xye tshiji hajenkaka, tshij-hitok-hajenkaka koxa.
11Ptowru yinerunru pejnu hiphujetanru Tsru Hixikatshriwani Jesus Cristo. Hoyakalu Hirtshi himalwuxikolupa.
Cristo Hayinetene Katalu Pixkalune Piranapni
12Hiyáhoni nuchinikanune potuko, hita hyijnakjekanata hix-yehi nwakanaxini pixka. Xawakni hijhakalur-potu hyijnakoxyawakno namoka pchinik-koxa. Hiyáhoni pnute hya kamhaletanru Hoyakalu halukanru tsru hislahleyma kahwakpirlu koxa haté hpoyahokakanru hiwekle.
13Klu tshinanu Hoyakalukni hix-yehi kamrurewaxikatshri, halujyawakaplu hiyrun-koxa hkamhiywakaplu wale halujyawakako.
14Ptowru potuko hkamhanu muhjekkakanunephi myanhakakanunephi.
15Waneya wan-hixinipa, hike mixkanephi, powrahchinikanunephi, Hoyakalu whenenhi potukalunephi hewi tshijne hajene mpotukane, pupjetatshine tskalaya. Wanna tskala katahirine hatawnatshine pixka hixatshinephi, tenhohne hajene pixkalunephi.
16Hiweklu pirana himretatshinephi waneyakni numukata halixkotletanhi Cristo hapojini hohnepa tshinanu. Klu tshinanu ruphujetanru nma mahijeru kamrurewlexyawakanpatka.
17Pa katako nuylatko nohraha hiyokanu henekachalu pixkalutupni, hixa halixle tshinan-koxa Hoyakalu renekachatko. Waneya wan-rixinipa numuwatanu hiyrun-koxa numumuwatanhi.
18Waneko pixka hixanu hixa. Himuwatanu hiyrunu himumuwatanno.
Timóteo Hiyrun-koxa Epafrodito Tshinkalune Piranapni
19Tsru Hixikatshriwa Jesus halujinipa Timóteo tshinkaluru chinpotukawa nyokananwakatanhi, hixa pirana nimaxyawakapa kihle hchinikanu nixyawakapa.
20Klu tshinanu hewi hi rawa satu yineru hita pixka hixahchinikanutatshri seyni wale tsonni. Hixa ruslahyawakpotu ruchinikanretatka halikaka.
21Klu tshinanu pimrine ptowruneka wannako ralujyawaka tsonu ruchinikanretatkana seyni Jesus Cristo halujyawaka hi ruchinikanretatkana.
22Seyni hixa himathexyawakaplu halikak-potu rixyawaka. Satu whentshi ruruyma kamrurewatatshri pixka rixa kamrurewleta hitayma kihle piranalu potuko hiwekkaklewatatshri piranaya.
23Hiyáhoni xye naluka yokanrenwakatanhi nexinwatshi hanu nixko hita.
24Tsru Hixikatshriwa Hoyakalu napohchinikanuta hixa nwaka nyiywakapa xekoyaka hit-koxa.
25Hiyrun-koxa nukchikhihlenutlu Epafrodito tshinkaluru nsatkakanwakaxyawakaphi. Waleni nmoletanru Cristo tshinanu, nepire nkamrureya Cristo tshinanu hiyrun-koxa niyahotkakjetanruni Cristo piranaya. Hixa yokanatanruni wale hita nmahaxinri tshinanu repixyawakapno.
26Klu tshinanu ralukpotutlu hixa ptowruneka rexyawakapa. Hiyrun-koxa hkojwakahchinikanutatka klu tshinanu hix-hima jempiranyehitatkalu hyeyixyawakatka.
27Halikaka hyeyixakanatakmaka, psokaklu rupniywakatka. Seyni Hoyakalu hetwamonutlu hiyrunu hi wale tsonu retwamonuta seyni hit-koxa. Hiyáhoni tsru wamontshi potuko hi raluk-hekhiretno.
28Hiyahokni nyokanpirahapkatlu Epafrodito hixa nwaka, hixa hexinpatkalu hpoyikowatanutnaka hiyrunu hit-koxa nutuk-wamonuwletanutka.
29Hiyáhoni Tsru Hixikatshriwa Cristo tshinanu hyoptotanru tsru poyikowluyma. Xye jeji pixkalune hkahwakpiratanu.
30Klu tshinanu Cristo tshinanu hkamrurewaxyawaka tshinanu psokaklu rupniywaka. Kyowikowaka rutajnawa hita repixyawaka hixa mumukatanutu tshinanu.
Currently Selected:
Filipenses 2: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
