Filipenses 1
1
Paulo Yonre Halixatshine Filipos Hajene Tshinanu
1Hita Paulo-no hiyrun-koxa Timóteo Jesus Cristo towrenwu yokanatlo twu yonawahlo ptowruneka Hoyakalu hayinetene Filipos poktshi hajene tshinanupa. Jesus Cristo-ymalune tshinanupni. Hiyrun-koxa wyokanatlo twu yonawahlo halixatshine hapatjetatshine kosekatshine hiyrun-koxa halixatshine hepixatshine tshinan-koxa.
2Hoyakalu henekachale hihlenu yoptotatshinephi, kihlehchinikanurunephi Wuru Hoyakalu tshinanu hiyrunu Wutsrukate Jesus Cristo tshinanuya.
Paulo Hanjihohneyehixyawakna Filipos Hajene
3Ptowru katako hixa nuchinijini Hoyakalu nimalwuta.
4Hiyrun-koxa ptowru katako nanjihohneyehixinhi numuwa hanjihohnerejeta,
5hixa hepixle tshinanu kihle piranalu potuko hiwekkaklewatatshri piranaya, mitshikanan-hohne Filipos poktshi nwakanaxini haté xawakni.
6Xye nimata. Hoyakalu yinuwaka kamhaletlu satu kihler-kamrurtshi hixa hiwekleyma, hnikata kamhaletanru haté hnikaxinpotúkolu Cristo Jesus hapojinri hohne potuko.
7Hixa ptowrunekhi nuchinikanretahohnejeta. Kihleru wane nixa hichinikanretlexyawakhi klu tshinanu hixa nitsaklawnakjenhi xye kamrurtshi honukla Hoyakalu henekatkano. Hixa haté xawakni wan-hixjetno yahmaklu preso nutakka hiyrun-koxa wan-hixjekanatno mkachitkotu nixjekanaxini. Waneklu papko hike himaletakanatno kihle piranalu potuko hiwekkaklewatatshri pirana nimatshwahyawakapa hiyrun-koxa npoyehiwkajyawakpotuplu.
8Klu tshinanu Hoyakalni nuphujtatjeru, hi nweyawata wane ntshininhi hixa nuchinijyawaka tsru potuko Cristo Jesus hchinikanu hichpajikatshrini.
9Nanjitlu Hoyakalu hixa himukata pnute hya hichinikanretlexyawakaplu himatkalewlu halikakalutuya hiyrun-koxa psoluka himathetlewluya,
10hpoyaho himatlexyawaklu hnurexyawaklu kihler-potuko. Waneyakni ptowru Hoyakalu malukanutuko hiyrunu patewahonutshi hi hix-yehi rukchijinru Cristo hapojinri hohnepa.
11Waneya hixa hiwejinri katsepopatkalu ptowru chinikantshi kihleru, Jesus Cristo tsonu hakanikleru, ralixkoxikolupa hiyrunu rimalwuxikolupa Hoyakalu.
Paulo Preso Hitajikolu Cristo Tshinanu Piranapni
12Cristo tshinanu nmoletanune, naluklu hixa himaxyawakaplu niknohjerkaka napyehitjerkaka repixyawakaplu kihle piranalu potuko hiwekkaklewatatshri pirana hinkajikolupa.
13Klu tshinanu xye tshinanu soldado-ne phurupji hinotatshine ptowruneka hiyrunu pimrine hewi hajene ptowruneka himatlu Cristo towreru nixyawaka tshinanu kapna nyochmakka.
14Kapna nyochmajikowaka tshinanu hixolune Wutsrukate Cristo tshinanu wmoletanune mixkowahchinikanutatka runkaklexyawakluna halikakalutu tokantshi hike hpikna.
15Halikakni satkaka hinkakletlu Cristo pirana hahxale tshinanu tsonu hiyrun-koxa hyanhakleyma tshinanu. Seyni pimrine kihle hchinikanuruneko hinkakletlu Cristo pirana.
16Nyi wan-rixna klu tshinanu ruchiniknona. Klu tshinanu rimatluna xye kamrurtshi renekno Hoyakalu kihler-potuko tokantshi hiwekkaklewatatshri pirana nimatshwahyawakapa.
17Pimrine hahxatatshine hi runkakletluna kihle piranalu potuko hiwekkaklewatatshri pirana hkamhiywakapna. Seyni wannako raluklerna rujhana. Wanna kahwaklu pnute rixa salewnakakletnona hewi kapna nwakako pchini.
18Hiyáhoni klunerni? Hikeni. Xye tsonupni. Numuwata hiyrunu numuwatanu han-hixatshriktako hinkaklewatatshri ho hixachatatshrini ho halikakalutni, Cristo hinkakletpiranaxikolni.
19Klu tshinanu nimatlu hixa hanjihohnere tshinanu hiyrun-koxa Hiwejikaluru Jesus Cristo hepixle tshinanu nuchotko.
20Nalukpotutlu hiyrun-koxa nkahwakpotutlu hikekni nipatewatanu seyni ptowru hohneruka xawakni potuk-koxa halikakalutu pirana hi nmayxakanu. Cristo pohixikolupa hita nomane tshinanuya ho niwejinri ho nupninriyapa.
21Klu tshinanu hitaya kluneruktákoni kihleru niwejyawaka? Klu tshinanu niwejini Cristo tshinanu niweka. Seyni nupnini waleni kihler-potuwa hitaya.
22Xye nomane riwejinipatshi pnut-potu hkamhanru kamrurtshi. Hi nimata nurpotutlu halikakalutu.
23Klu tshinanu hepi hchinikanno. Nalukpotutmaklu nupnale Cristo nwaka nwinripatka klu tshinanu walekni kihler-potuko.
24Seyni nomane niwejinriwa hijhakalur-potni hixa tshinanu.
25Ha nimatlu niwekanu hixa ptowrunekhi nimwinripa. Pnute hya halixletanu hiyrunu himuwaxinripa halixleya.
26Hiyáhoni hix-yehi napojinpatnaka pnut-potu hixa halixkotletko Cristo Jesus hetanuya hita tshinanu.
Pa Hchinikanurune Rixna Halixatshine Piranapni
27Hiyáhoni xawakni hixa hixjexyawaka hiwejinriya rujhalu kihle piranalu potuko hiwekkaklewatatshri pirana, Cristo pirana kamhakjixle pixka hixyawaka. Waneyakni netapiniphi ho nmetapkanuklunuphi waneya hixa pirana njeminipa poyehi halixle hixyawaka htshinikowaka pa halukalutu pa hchinikanurutu kihle piranalu potuko hiwekkaklewatatshri pirana halixlu yapretak-hepixletatshinephi.
28Hi psojikna hpikanna hkamnitjene. Seyni tsru hchinikanurunephi. Waneyakni rimathetanna ramtakanna halikaka seyni hixa hiknohatshinephi halikaka. Hiyrunu Hoyakalukni hixa hiknohkakjeru.
29Klu tshinanu hixa henekka xye halukkaluru Cristo tshinanupa seyni hi koxa wale tsonu halixyawakapni seyni wale hikolukle tshinan-koxa hsalewnakakko.
30Hix-koxa rawya walerutu yahotkaklu hetyehixyano nyahotjekanatanru hiyrunu haté xawakni koxa nyahotjetakowalu hjempiranyehixyano nwiya.
Currently Selected:
Filipenses 1: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
