Efésios 6
6
Paulo Hiykotna Tsrune Hiyrunu Mturune Ruykoxyawaka Piranapni
1Whentshinhi Wutsrukate Cristo homkahitatshine hixyawaka tshinanu hixa hijhalu hirtshine hyijnakoxyawaka klu tshinanu xyeni kihleru wan-hixyawaka.
2Pyijnakotanru puru, punro. (Xye yonatkaluru yokanatkaluru mitshikananu hinkakletkaluru.) Runkakletluna kihleru hakanhayehixyawakapna kajnako rixyawakapna.
3Kihle hixinripa. Hohiweklu hixinripa.
4Hiyrun-koxa hixa hirtshinhi hi himtuwnakakanna hwuhenene seyni hislahanna, htseruwnakakanna Wutsrukate Cristo haluklewleya hiyrun-koxa Cristo hiykolewleya.
Hiykolu Ktowutlewakleru Tshinanu Hiyrun-koxa Kkamrurewaklerune Tshinanu Piranapni
5Towrertshine xako yijnakotanna htowutjene xye tshijne hajene. Hkahwakpiratanna htowutjene hiyáhoni hyijnakotanna ptowru potuko hjemleru. Wane potuko hixatshinephi kihle hchinikanuphi hatatjewa Cristo towutanunhi.
6Hi htowutjene hetanu tsonu kajnakophi hyokwijechaxyawaka tshinanupna htowutjene seyni Cristo towrene hikahwajinwa hiyáhoni psoluka hihchinikanu mixkonuyma hkamhanru Hoyakalu halujyawaka.
7Kihle hchinikanurunhi kamrurewatanu hatatjewa hi yine towutlenhi seyni Wutsrukate Cristo towutlenhi.
8Hichinikanru xye, satkaka yineru, yáholu towrertshi ho mtowutkotu seyni hyoptotanru hkamrure wenru Tsru Hixikatshriwa Hoyakalu henekanhi hkamhiniplu ho kihleru ho hektutu.
9Hixa ktowutaklerunhi waneko pixka hixanna hkamrurewkakjetanune. Hi hyanhakkakanna htowrene. Seyni hichinikanru xako hixa tsru hixikatshinwahi hiyrun-koxa hixa towrertshine hitsrukate satupkalu Hoyakalu tenhohne hajeru. Payakalunephi Hoyakaluyma.
Kamtshi Kamnirewle Wuknojyawaka Piranapni
10Hiyáhoni xawakni hixkolunephi klu tshinanu Wutsrukate Cristo-ymalunwu hiyrunu hpixkonu wmixkotjeru tshinanu.
11Ptowruk-xako hyochmakanu hinokakoklunu himaletyehitjerupa Hoyakalu henekanhi hixa himukata poyehi yopkakle hixyawakapa, tsru kamtshi kakonre hixa hma kachixyawakanupa tshinanu.
12Klu tshinanu wkamnitjene hi yinni kahiturune, hi kahrahalune seyni wkamnitjene wannakni kamtshine hmuhlenuymana xye psol-hohneko yapatshine hiyrunu tsrukakalune, tsru hitakkalune, malehohnewaka hwatshine tsru pixkontshiyma yine yokwijpiratatshine, kamtshi yokwijpiratwu towutlewpiratatshineya.
13Hiyáhoni ptowruko hyochmakanu hinokakoklunu himaletyehitjerupa Hoyakalu henekanhi hixa himukata hiknohletanru hektutu pa hohne hinyehitjerupa tshinanu. Hkamnitkoklunupa hixa himukata poyehi yopkakle hixleta haté rasujinipa hkamnitjeru hpaklu yopkakletanutshi.
14Hiyáhoni xawakni chikpok-yopkaklerunephi. Halikakalutu pirana halixpotutanu wan-hixini hostuptshijitkalunhi pixka hixatshinetkahi. Potukalunephi hatatjewa statshi hislahatshri hitakastatka.
15Kihle piranalu potuko hiwekkaklewatatshri pirana hapnanuhchinikankaklewatatshri tokantshi hpoyehixinwa hiyáhoni hatatjewa hislahjixitjeru hyochmakka.
16Hiyrun-koxa ptowru hohneruka hiyrunu ptowru papkoluko halixpotutanu wan-hixatshri hatatjewa katshralu himaletapichpata ranikamta pa myoya. Hiyáhoni hixa himukata hiwakletlu ptowru hatatkaluru katshralkaka Satanás yokananwakaxyahi.
17Hoyakalu henekanhi hiwekkaklewatatshri hyoptotanrupa wan-hixatshinhi hislahjiwutjeru hitakatshinhi. Hiyrun-koxa Hoyakalu tokanu hanikanu Hoyakalu Hiwejikaluru henejyahi waleni hatatjewa yohlolewapi hkachimta.
18Xye ptowruko hkamhanu hanjihohneruya Hoyakalu hanjitanu repixyawakaphi. Hanjihohnetanu hi hituk-hanjihohneretanu. Hoyakalu Hiwejikaluru kosekle homkahitanu hanjihohneruya. Hi himnanhanu. Hi hihrokanu hanjihohneruya. Hanjihohneyehitanna Hoyakalu halixatshine.
19Hit-koxa hanjihohneyehitanu, nunkaklewaxini, Hoyakalu henektokanuxyawakapno hiyrun-koxa nunkaklewaxini nma pijyawakanupa, nunkakle pirana rimatjemikowakap-koxa kihle piranalu potuko hiwekkaklewatatshri pirana npohitakanatanru pirana.
20Kihler-potuko tokantshi hiwekkaklewatatshri pirana pohitatshrino yahmaklu kapna nutakka. Hiyáhoni hanjihohneyehitanno phujetanuwaka potuko ntshina hinkakletlexyawakaplu hiwekkaklewatatshri pirana rixpiranaxyawak-potuko.
Haliklewlu Piranapni
21Wuchinikanru wimole Tíquico tshinkaluru Wutsrukate Cristo kamrurewyehitatshri halikak-potuko. Wale hinkakanhi hita nopirana hixa himaxyawakaplu hanu nixa.
22Wale tshinanukni wale nyokananwakathi hixa himatpiranyehixyawakapwu, hma kojwakahchinikanuxyawakanupa wipirana tshinanu.
Paulo Kihler-pirana Ranjiyehitna Éfeso Hajene Piranapni
23Nanjitlu Wuru Hoyakalu hiyrun-koxa Wutsrukate Jesus Cristo renejyawakaphi, hixa moletkakatshinhi, kihlehchinikanu rixkajyawakaphi hiyrun-koxa hamotkajyawakapa hixa satkakhi hiyrun-koxa pnut-potu Hoyakalu halixyawaka nanjita renejyawakaphi.
24Hiyrun-koxa nanjitlu Hoyakalu, Hoyakalu hihlenu renekachale renejyawakaphi hixa ptowrunekhi Wutsrukate Jesus Cristo hichinikhohnekanatatshinephi.
Currently Selected:
Efésios 6: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
