Efésios 4
4
Cristo Mane Psojitenwu Hiyrunu Pa Hchinikanurunwu Wixyawaka Piranapni
1Wale tshinanu, hita Paulo-no, kachitkalurno klu tshinanu Nutsrukate Jesus Cristo nomkahita, nanjithi hiwekan-xako Hoyakalu halujyawak-potuko homkahitanu htshanixikowaka.
2Ptowruko hi halixkoxinwa, mayohonephi, hwachatanu xako. Hichinikkakanu hekhikakanu hixkakluko. Hiyáhoni hixkakluko hepixkakanu.
3Ptowru potuko himukaxyawaka hixanu pa hchinikanurune hixyawaka, pa neru rixkakanwu Hoyakalu Hiwejikaluru pa hchinikanurune wixini.
4Cristo mane satupkalu hiyrun-koxa Hoyakalu Hiwejikaluru satupkalu. Wkahwakleru hiwejikaluru hike rixiniko mnikawnakatupa Hoyakalu tshanixlewle satupkalutu.
5Wutsrukate satupkalu, halixlewlu koxa satupka, h-batiza-xikowak-koxa satupka.
6Hiyrun-koxa Hoyakalu satupkalu hixa halixatshinwu hiru, ptowru potuko towutatshrini, ptowru halixatshri pnute hya kamrurewlexyalu, ptowru halixatshri hitokote hwatshritkani.
7Hixa satkaka yoptotlu himatkalnutshi renekachale hiwekkaklewatatshri psolukatka reneksaxyawakatkawu satkakwu Cristo henejyawu psolukatka.
8Wane htshina yonatkaluru halikakalutu mitshikawlur-pirana: “Teno potu ratskotatka. Kachitkalune hkosekamta, Yine reneka renekachaxikolna.”
9Kluhe raluk-tshinreta “ratskoxyawakatka”? Wla raluk-tshinreta mitshikananhapka hserpika tshiji nwaka, tshiji hitokot-potuko rapkapa.
10Hiyáhoni serpikatshri, walekatkani tenhohne potuko yatshritka, tenhohne pnut-potu hwatshri hyatka, psoluka mal-hohnewak-potuko htsepota.
11Walekatkani henekachalkaka reneksatna yine. Reneksatkatkana nuretkalune rixyawakna, pimrine reneksata Hoyakalu tokanu hinkakletatshine rixyawakna, pimrine reneksatna Hoyakalu tokanu jinkakletaklerune rixyawakna hiyrun-koxa reneksatna halixatshine hinotatshine rixyawakna hiyrunu pimrine reneksatna hapatjetatshine kosekatshine rixyawakna.
12Xye hkamha ralpokoxyawakna hinerune ptowruneka Cristo halukanru hkamhiywakna. Wan-rixna, Cristo mane hkamhapotuxyawakapna htserutahchinikanuxikowakapna Cristo piranaya.
13Hiyáhoni hixa ptowrunekwu wan-hixatshinwu wapkapanru pa hchinikanurutu wixyawaka walixle Jesus Cristo-ya hiyrun-koxa wimatjempiranyehitanru Hoyakalu whene pirana. Wan-hixatshine tsrune hixinwa Cristo piranaya klu tshinanu wtseruwnanu haté Cristo yáholu potuko wixinwa.
14Hiyáhoni hi mturune pixka wixanu walixinpatkalu Hoyakalu pirana. Mtser-halixlene ruwchiwchikak-honuka hiyrunu pnuko hanikkalunetkani hihchinikanuyna weytshi hasruklewatatshineya. Nyi yokwirewlu hasruklewatatshine walekni hitseklu pixkalutu mtser-halixlene hpupjehapokajyawakapna.
15Hi wan-hixahchinikanutanu seyni halikaka pirana wunkakletanu wekhixyawakapna wamotlene. Hiyáhoni wujhanru wtseruwna halixlexyawaka ptowru piranako Cristo tshinanuya. Cristo honukla jiwtshi. Walekni Cristo halixatshine hapatjetatshine kosekatshri.
16Walekni haptowru mankaklewatatshri. Himane psojitkaka rapatjeta pa manepka hkamhiyatkalu. Hiyáhoni Cristo mane psojitkaka yokakkalunwu. Satkaka psojite hepixka. Cristo pixkonu tshinanu. Hiyáhoni satkaka mantshi psojite Cristo halukanru hkamhini htserutlu Cristo mane. Wuchinikle tshinanu wtserutlu Cristo mane.
Herotu Wiwejinri Cristo Pixkonu Tshinanu Piranapni
17Hiyáhoni Wutsrukate Jesus hiwaka tshinanu wane ntshina hiykolethi: Hi malixkane pixka hixa hiwekletanu, klu tshinanu wanna mahijeru hichinikanuwleta.
18Halikakalutu tokantshi hi rimatjemna. Hi rawyana hiwejikaluru Hoyakalu henejyamkana klu tshinanu mimatjemkan-potukni hiyrun-koxa hchikohajiwatna.
19Hi rimat-patewatna. Wannako henejnawa ptowru hektutu hkamhiywakna hiyrun-koxa ptowru mpowratu romkahitna.
20Seyni hi xye pirana pixka hixa himatjemletanutkalu Cristo pirana.
21Halikaka hjempiranyehreru Cristo hasruklewle wane potuko hixa hasrukletka halikakalutu tokantshi Jesus-ya.
22Hiknokanru xako mitshikananu hixjekanaxyawaka hixako halujyawaka, walekni himtukjekanathi sotanuhonutshi yokwire tshinanu.
23Hihchinikanu hiyrunu hiwejinri koxa herotexiko.
24Herotu yineru hitajinwa, xye herotu yineru Hoyakalu yáholutkani. Rekhitka satu hiwejikaluru halikakalutu potukalu hiyrunu Hoyakalu halukanruko rekhitka.
25Hiyáhoni xawakni hi hweyawatanu. Seyni hixa satkaka hijhalu halikakalutu pirana hinkajyawakna Cristo tshinanu hmoletanune. Klu tshinanu hixa ptowrunekwu Cristo mane psojitenwu.
26Hjihekanuwaxini hi hitshitanru jhekantshi himtujyawakaphi. Hiyrunu hi jihekanuwatatshinekhi rimxijini tkatshi.
27Hi pchinhohnejijiko henekanru tsru kamtshi hixa hyokwijexyawaka.
28Katshowhurukananu hi wane pnuteko htshowhuwatanutka seyni hkamrurewatanu. Waleko himyoya kihler-kamrurtshi hkamhanu hkayaxyawakapa. Wan-hixatshri himukata hapikletanna mahaxikatshine.
29Hi satukna tokantshi hektutu himtuklewatatshri hyanumaxini seyni kihleru tokantshi halukkaluru, tseruwaka hchinikanrewatatshripa tokantshi tsonu hyanumaxini. Yijnakotatshine hepixatshri tokantshi yanumaxiko.
30Hi hwamontakanru Hoyakalu Hiwejikaluru. Klu tshinanu Hoyakalu Hiwejikaluru himaxikolexikalunhi. Hoyakalununhi hi ruknokanhi haté rapojinipa hiweklu hohne potuko Hoyakaluyma.
31Hiknokanru ptowru hchikohajiwaxinri, ptowru himtuwnalu jhekantshi, ptowru sapletshkaka, ptowru heyiklewlu, ptowru hixatshri hahnantshi hiknokanu.
32Seyni hichinikanuwyehkakanu. Hetwamonkakanu. Hixkakluko hamtakahchinikankakyehitanu hektutuya Hoyakalu hiknokhektunuxyawakhi Cristo tshinanu pixka.
Currently Selected:
Efésios 4: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
