Colossenses 1
1
Hichiniklewlu
1Hita, Paulo-no, Jesus Cristo nurrerno, Hoyakalu halujyawakako tshinanu, hiyrun-koxa wmoletanru Cristo tshinanu Timóteo tshinkaluruyma,
2wyonatlo twu yonawahlo, hixa Hoyakalu hayinetene Colossos poktshi hajenhi tshinanu. Hixa wmoletanunhi Cristo tshinanu kalixaklerunhi Cristo-ya. Hoyakalu henekachale hihlenu yoptotatshinephi, kihlehchinikanurunephi Wuru Hoyakaluya.
Paulo Poyahnuxyawaklu Wanna Halixle Piranapni
3Ptowru katako wanjihohneyehixinhi wpoyahnutlu Hoyakalu Wutsrukate Jesus Cristo hiru.
4Klu tshinanu wjempiranyehitlu hixa halixle pirana Jesus Cristo-ya. Hiyrun-koxa wjempiranyehitlu ptowruneka Hoyakalu hayinetene hichinikjexyawaka pirana.
5Wan-hixjeta halikakalutu tokantshi tshinanu hix-yehi rehapokletka kihle piranalu potuko hiwekkaklewatatshri pirana, hjempiranrerutka walekni hkahwakleru himlujikolu tenhohneya.
6Xye tokantshi hix-yehi hapokatshritka ptowru tshijne hapokatshritkani. Xye tokantshi ptowru yineru tserutahchinikanutatshrini, hix-koxa htserutahchinikanjeta himatjeminixkalu Hoyakalu hihlenu hixa tshinanu halikak-potu piranaya heyijnaklekananuko haté xawakni.
7Xyekaka pirana Epafras tshinkaluru hasrukle tshinan-koxa hixa himatpiranatatkalu. Xye jeji wepirni, wuchinikanretanruni hiyrunu hixa tshinanu Cristo towrerni halikakalutu potu.
8Wale koxa hinkakwu hichinikjexyawakwu Hoyakalu Hiwejikaluru pirana tshinanu.
Paulo Hanjihohneyehixyawakna Colossos Hajene Piranapni
9Hiyáhoni xawakni xye ptowruka tshinanu hi wutuk-hanjihohneyehrethi. Hixa pirana wejemle haté xawakni wanjijetlu Hoyakalu himatkalnutshi hixa htsepoxyawaka wale halujyawaka pirana, ptowru potuko himatkalewleya hiyrunu himatjemlewleya Hoyakalu Hiwejikaluruya.
10Waneyakni hixa himukata kamhaletanru Hoyakalu halujyawaka hiyrun-koxa Hitsrukate Hoyakalu hiwaka himalwutko hixa hixjexyawaka tshinanu. Tseruwnatshinephi ptowru potuko kamrurtshi kihleruya hiyrunu tseruwnatshinephi Hoyakalu himatyehipotuxyawaka.
11Nanjitlu Hoyakalu hmixkoxikowakapa hihchinikanu Hoyakalu hoyaknu mixkonuymako hixa himukata hakotlewleta ptowru mchiretannutshiyma, poyikowluyma.
12Hiyrun-koxa himalwutanru Wuru Hoyakalu wpoyahokakjeru wtsaklawkakjeru ptowru potuko ralpokleru rayinetene tshinanu Hoyakalu pohirewaxyawaka katawaka hwiywaka.
Cristo-ni Hoyakalu Yáholu Piranapni
13Hoyakalu kochpakwu mapchahawaka kachrewleya waneya ranikatkawu hikeni kaheknanuwlu Hituru ramotleru potuko pohirewaxyawaka wwiywakapa.
14Jesus hraha tshinanu wkachikanatjeru yehi wuchoxikatka hiyrun-koxa walekni wektunu hamtakahchinikankakatshri.
15Hoyakalu metkotu ruphujewnakakatka Cristo-ya. Cristo mitshikananu wuhenetkaluru ptowru hiyakotkaluru pnute.
16Klu tshinanu Cristo-kni ruyakoxika ptowru potuko tenhohne hajeru, tshiji hajeru, hetkalurkaka hiyrunu metkotkaka, hitakkalurkaka hiyrunu tsrukakalune hetkalurkaka ho metkotkaka. Ptowru potuko hiyakotka Cristo tshinanuya hiyrun-koxa walenu rixyawakapni.
17Ptowru potuko hiyakotkaluru pejnu pnut-hohne hwatshrini Cristo. Hiyrun-koxa wale tshinanukni wan-rixa ptowru potuko.
18Cristo mane pixkalune, Cristo halixatshine hapatjetatshinetka yokanatatshrini Cristo jiwtshi pixkalutni. Walekni himane hiwekle heneklewatatshri. Walekni mitshikananu hipuktshi yotunoxikatshri hiyáhoni ptowru potuko hitsrukatekni wale.
19Hoyakalu hikchikahchinikanuxnawa Cristo hoho rawinripa psoluka rixannu.
20Hiyáhoni xawakni Hoyakalu nurehchinikanuxnawa ptowru potuko wale nwakako hsatkapkajyawakapa hituru hraha hiyokkaluru tshinanupa. Hoyakalu whene cruz rupniywaka tshinanu Hoyakalu hihlewahchinikanyehitlu ptowru potuko ho tenhohne hajerkaka ho tshiji hajerkaka.
21Mitshikananu hixa howuka hwakanata Hoyakalu nwakaya. Hiyrun-koxa hektutu hixa kamhajekanatanru tshinanu hiyrunu hektutu hichinikanretjekanatanru tshinanu hixa kamnijekanatlu Hoyakalu.
22Seyni xawakni waleko hisretlu hsatkakatkahi, hituru hipnale tshinanu. Hiyáhoni Hoyakalu himatletatkahi wale nwak-potuko ranijyawakhi potukalunephi, hike mixkanephi, hike hikolukanunephi wale hetanuya.
23Halikakni hixa halixle hijhalu poyehiru hoho rutajikowaka, hma kowchojikowakanupa hixa halixle. Hi hitneprikkajinwa kahwakachaluya kihle piranalu potuko hiwekkaklewatatshri pirana hyijnakotanrutka xye tshijne psoluka yapiranatatshrini. Hitni Paulo-no xye pirana jinkakletaklerno.
Paulo Kamrure Halixatshine Hapatjetatshine Tshinanu Piranapni
24Npoyikowata klu tshinanu xawakni numukata salewnaletanu hixa tshinanupa. Nomane salewaklu hepixa nikatletlu Cristo salewnale Cristo halixatshine hapatjetatshine Cristo mane-ne tshinanupa.
25Cristo halixatshine hapatjetatshine kamrurewjexikatshrino Hoyakalu nurexya tshinanno xye tsru hitakkaluru renejyawakapno hixa tshinanupa, nepixyawakhi. Wan-rixno Hoyakalu, htokanu psoluka ruphujetkotka.
26Xye pirana honukla mitshikananu mimatakanatkotu mitshikawa hohneko Hoyakalu yohimakanatanru pirana yine tshinanu ptowru hohnekananuko seyni xawakni ruphujetlu xye pirana rayinetene tshinanu.
27Klu tshinanu Hoyakalu nurehchinikanuxnawa rimatkajyawakapna rayinetene rimaxyawakapluna royaknu pirana tsru potuko ptowru yine tshinanupa piranni. Cristo hixa hitokote hwatshritka piranni xye. Hiyáhoni hixa himukata kahwakletlu Hoyakalu hoyaknu hyoptoxyawakapa.
28Hiyahokni ptowru potuk-yine wunkakjetlu Cristo pirana. Satkaka yine wuykojeta, wasrukjetna satkaka ptowru himatkalewluya. Wumukaxyawaka wixa hanikletanna yine ptowruneka Hoyakalu hoji sreta tsru halixlerunepa Cristo Jesus-ymalune.
29Wale tshinan-koxa nkamrurewpotuta, nyapretaklewata. Numukata kamhaletlu xye Cristo himukatle tsru potuko tshinanu nmixkotjeru.
Currently Selected:
Colossenses 1: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
