Atos 26
26
Paulo Hinkaklexnawa Agripa Yehiya Piranapni
1Hiyáhoni Agripa wan-tshinatkalu Paulo:
— Pumukata hinkakletlexnawa.
Waneya Paulo romukamyota hyinuwaka yanumletatka.
2Wane htshina:
— Phuru Agripa, npoyikowata pihoji sreta nyopkajyawaka nunkaklexinwa ptowru pirana judeu-ne jihyehixyano.
3Klu tshinanu pixa himatyehpotutlu judeu-ne hixannu hiyrun-koxa klu pirana rimaletkakjetna hiyáhoni nanjityi puhle yijnakoleyehixyawakno.
4Judeu-ne ptowruneka himatyehitno nmatureyakawa. Rimatna nmatureyakawakananuko ntshijne potuko Jerusalém poktshi nwajekanata.
5Wanna himatakanatatkalu hiyáhoni ralujinipna rumukata hinkakletyina neyinuwaklekananuko fariseu-ne kihleru nixapa, hiyrunu fariseu-ne homkahpotutlu judeu hoyakalute.
6Hiyáhoni hewi nyopkaka klu tshinanu nkahwakjetlu Hoyakalu hixa kojiretlexyawaknina wutsrukatenni mitshikawni.
7Ptowru nonerunkaka hohi hoyetshno Hoyakalu hichinikanretatshine hiyrun-koxa hkahwakjetluna hyoptoxyawakapluna xye hkojirexikolna. Phuru Agripa, xye kahwakaluru pirana tshinanu judeu-ne jihyehjetno.
8Haklu tshinanhe hixa, judeu-nhi, kahwaklu kyapreru rixyawaka halixyawaklu Hoyakalu himukata hiwekkakletna hipnatshine?
Waneya wane pnute htshinatkana Paulo:
9— Hit-koxa wane nixahchinikantapatka ptowruka nyahot-kamhaleta nkamnixyawaklu Jesus Nazaré hajeru.
10Hiyáhoni wane potuko nixpatka Jerusalém poktshiya. Tsru hixikatshinwa sacerdote-ne hitshitno preso nutajyawakna hixolune potukalune Jesus halixatshine. Waneya ruylatkoklunutkana hit-koxa hikchikhihlenutlu wan-rixikowakanna.
11Hix-hohne potuko napnokatatkana ptowru hanjihohnewakapjikakaya haté nyapretakatkana ralixlena ruchoxyawakna. Nahkatkana haté pa poktshikaka napkapa napnokaxyawakapna.
12Wale tshinanukni pa kata Damasco nwaka nyatka, tsru hixikatshinwa sacerdote-ne yokanatno tsru hitakkaluru rixkaknona.
13Waneya, Phuru, hanikaj-hohnetkani hatnu hapo nyapamtawa netlu katalu tenhohne hichpajikatshri. Tkatshi mero pnute hatajniru. Xye katalu hatawnayehitno nimotsatanune koxa ratawnayehita.
14Waneya hixa ptowruneka tshiji yawnamtatka. Waneya tokantshi njema, judeu tokanu riynumaxyano, wla-tshinatshri: “Saulo, Saulo, haklu tshinanhe pkamnitno? Pkamnijetno seyni halikaka pumtukachaxnawa.”
15— Waneya hita Paulo-no hihitlu: “Katyihe pixa Tsru Hixikatshriwayi?”
— Waneya ruhitatka Tsru Hixikatshriwa: “Hita Jesus-no pkamnijetanruno.”
16Ppalnanu pyotunotanu xako! Nnuretyi ntowreru pixyawaka hiyrunu ptowru yineru puphujtaxinri ptowruka petanru haté ptowruka nekhixyapyi. Wale tshinanu nyanwakatatkayi xye hohne.
17Nkochpakanyi pa hohne judeu-myoya hiyrun-koxa judeu mixkanemyoya. Wanna yehi nyokanatanyi
18pumrekhakajyawakna rumukata hichpaklexyawakna mapchahawakaya katalu romkahixyawakapna hiyrunu Satanás towre ruchpajyawakna Hoyakalu romkahixyawakapna. Waneya ralixlena tshinanu rektunna ruknojikona hiyrunu Hoyakalu nuretanune rixyawakapna.”
19— Hiyáhoni, Phuru Agripa, hi nmajnakowaxyalu hetkaluru tenhohne hichpajikatshri.
20Seyni Damasco poktshi hajene hapka nunkaklexyalu xye pirana waneya Jerusalém poktshiya wane pnute Judeia tshijne psoluyaka haté judeu mixkane tskalaya nunkaklexyalu. Nunkakna rehchinikanuxinripna rektunna tshinanu Hoyakalu yehi hsatojinripna hiyrunu hkamhiywakapluna kamrurtshikaka rekhixnawakapwana rehchinikanutatkana.
21Wale tshinanukni judeu-ne kachitno Hoyakalupjiya hiyáhoni raluk-hiylaletnona.
22Seyni Hoyakalu hepixatkano hiyáhoni hewi nyopkaka xawakni nunkajyawakapna ptowru yineruka, tsrukakalune yanachalune koxa, netanru pirana psoluka. Seyni Moisés-ni hiyrunu tokantshi hinkakletatshinni tshinyawakna hinatshripa tokanu tsonu ntshina hita:
23Cristo haluka salewnaleta hiyrunu walepni mitshikananu yotunotatshripa hipnatshine tskalaya, katalu pixkalutu rekhixyawakapna judeu-ne hiyrunu judeu mixkane.
Festo Hiynumaxyalu Paulo Piranapni
24Waneya Paulo hinkaklexnawa seyni Festo tsru htokanu wane htshinyalu:
— Paulo, pixlahe hipukalewatatka? Tsru pimatkallahe himtukatkayi?
25Seyni Paulo wan-tshinru:
— Kchinikanuru Festo, hi nupukalewata. Ntokanu halikakni hiyrunu hpoyaho himatjemletlu.
26Klu tshinanu Phuru Agripa, pimatlu xyekaka hiyáhoni numukata phujewaka hiynumsaletyi. Hita nkahwaklu pimatyehitlu xyekaka klu tshinanu hi kahnete poktshi kamhikalurni xye.
27Phuru Agripa, palixluhe Hoyakalu tokanu hinkakletatshinni tokanu? Nimatyi palixyawaklu.
28Waneya Phuru Agripa wan-tshinatkalu Paulo:
— Psokakno puykoxyano tshinanu halixatshrino.
29Waneya wane htshina Paulo:
— Nanjitlu Hoyakalu ho xawakni ho howukchinipa pixa hiyrun-koxa xawakni nyijnakotjene ptowruneka hita pixka rixyawakapna Jesus Cristo halixatshinepni seyni corrente mostutkonepni.
Paulo Ruchotkamka Seyni Ranjitlu César Rexyawakapa Piranapni
30Waneya rali wan-tshinrexinixkalu xye pirana, Phuru Agripa, Festo, Berenice hiyrunu wannaymalune ptowruneka palnatka.
31Waneya ruchpajinixkaluna wanna riynumsakakna wannakakluko waneya wane htshinna:
— Hike hkamha xye jeji ruylaxikowakapa hi koxa hkachixikowakapa.
32Waneya Phuru Agripa wan-tshinatkalu Festo:
— Xye jeji ruchotkamka seyni ranjitlu César hjemahchinikanyehixyawakaplu.
Currently Selected:
Atos 26: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
