Atos 25
25
Paulo Hanjitlu César Rexyawakapa Piranapni
1Hiyáhoni wale tshijne rapokatka Festo tshinkaluru. Waneya map-hohne hiknohinixka Cesareia poktshi ruchpajyatka Jerusalém nwaka hyatka.
2Waneya tsrukakalune sacerdote-ne hiyrunu judeu-ne chefe-tene hinkakletlu Paulo pirana. Hjihyehitluna Paulo.
3Ranjitluna Festo hyokanaxyawakaplu Paulo Jerusalém nwaka, klu tshinanu wanna hichinikanretlu Paulo ruylaxyawakluna hatnuya.
4Seyni Festo hihitna wane htshinna:
— Cesareia poktshi rutukawa Paulo hiyrunu xekoyaka nsatkapanu Cesareia nwaka.
5Waneya wane htshinna Festo:
— Hitshitanna satkaka hixa chefe-tene himotsaxyawakapno wjihyehixyawakaplu Paulo Cesareia poktshiya. Wetanu ho rawyahe jikolukanuru ho hike.
6Waneya ho oito ho dez hohne Jerusalém poktshi rutukatka Festo waneya Cesareia nwaka hyatnaka. Wale prika rawapakjixlu Paulo, jemahchinikanyehixikowaka yehi htuplakanata Festo.
7Waneya rapojinixka Paulo, judeu-ne Jerusalém hichpajikatshine sajruklu Paulo waneya hyopkakna hweyawyehitluna seyni hike himukata hekhiretlu halikakni htshinyehixyawakluna.
8Waneya Paulo wan-tshina hihretna:
— Hike nmajnakowaxyalu Moisés yonreru, hi koxa Hoyakalupjiko hi koxa ptowru yine towutatshri César yehiya.
9Waneya judeu-ne hpoyikowkajyawakapa tshinanu Festo hepomhalu Paulo:
— Pixlahe haluka Jerusalém nwaka pyiywakapa njemahchinikanyehixyawakapyi xyekaka tshinanu?
10Waneya Paulo wan-tshina:
— Romano-ne hoji sreta nyopkaka hjemahchinikanyehixyawakapnona klu tshinanu numukata hijhahchinikanyehletka hewiya. Seyni hike hektutu nkamhiyna judeu-ne, pix-koxa himatlu halikaka ntshina.
11Pa hixanu nmajnakowaxikmaklu hinanchitkaluruya hipuktshi hijhatshri hi nanjitlu niwejyawakapa seyni hweyaxiniklunnona hike himukata wannamyo henekletno. Hiyáhoni naluklu César tshinkaluru rujhahchinikanyehixyawakapno ho napnokatjewhe ho hike.
12Waneya Festo hiynumsatna ruykotjene waneya wane htshinru Paulo:
— Panjitlu César pexyawakapa wale tshinanu César yehi potuko pyanu!
Festo Hinkajyawaklu Agripa Tshinkaluru Paulo Pirana
13Pa hohnetnakni phuru Agripa tshinkaluru hiyrunu hhanunro Berenice tshinkaluro Cesareia poktshi hapoka rapyehixyawakaplu Festo.
14Pimri hohnekaka wan-rutukatkana waneya Festo hinkaklu phuru Paulo pirana, wane htshina:
— Hewi rawa satu jeji Félix hiknokamtanru hostutkaluru.
15Jerusalém poktshi napkapinixka tsru hixikatshinwa sacerdote-ne hiyrunu judeu-ne tsrukakalutene hinkakno Paulo pirana. Hjihyehitluna Paulo. Ranjitnona ruylaxikolupa.
16Seyni nuhitna: Romano-ne hi hasruhlu preso rutakhapkaxyawakaplu satu yineru kjihyehrewaklerune jihyehre hma muhitkonuklunuwa.
17Waneya nyi judeu-ne hapojinixka Cesareia poktshi hi nkahwakachata seyni wale prikako yine jemahchinikanyehixikowaka yehi ntuplatatka waneya ntomhakjixatkalu xye jeji.
18Waneya rapojinixkana hkamnitjene hyopkakna waneya hjihyehitluna Paulo seyni hikeni tsru jikolukanuru pirana rukchijyaluna Paulo, hi nixahchinikanuxyawaka pixka rixa pupjereta.
19Seyni satu hjihyehixikolu tsonu rukchijyaluna Paulo wannako royakalutna pirana tshinanu hiyrunu satu hipnatshri Jesus pirana hkochtsheka seyni Paulo wan-tshina xye hipnatshri hima riwekatnaka.
20Seyni hi nukchikahchinikanuta hanu nixa himatletanru xye pixkalutu pirana hiyáhoni Paulo nepomhatka: Hi he Jerusalém nwaka paluka yaleta pjemahchinikanyehitko xye pjihyehixikolkaka tshinanu?
21Seyni ranjitlu César rujhahchinikanyehixyawakaplu hiyáhoni nimretjixatkalu haté César yehi nyokanaxiniplu hohne.
22Waneya phuru Agripa wan-tshinatkalu Festo:
— Hitamka koxa haluka jemletlu xye jeji.
Waneya Festo wan-tshinru:
— Haté hehe, yetshikawa pjemanru.
Festo Hinkakatnaklu Agripa Piranapni
23Hiyáhoni wale prika Agripa hiyrunu Berenice tsru hpohirewleyma rimapokanna. Jemahchinikanyehixikowakapji hjihlokna soldado-ne chefe-teneyma hiyrunu tsrukakalune poktshi towutatshineyma. Waneya Festo tomhakjixatkalu Paulo.
24Festo wan-tshina:
— Phuru Agripa hiyrun-koxa hixa ptowrunekhi hixayma hapatjetatshine, hetanru xye jeji. Judeu-nerune ptowruneka, hewi hwatshine haté Jerusalém hwatshine koxa wale pirana hinkakatkano. Hsaplewyehitluna ruylaxikowakapa.
25Seyni nimaxinixkalu hike tsru jikolukanuru hkamhatka ruylaxikolupa hiyrun-koxa waleko hanjitlu César rexyawakapa, nuchinikanuwata nyokanaxyawakaplu.
26Seyni hi nimata hanhe nixa yonreyehitanru Paulo tshinanu César nwaka nyokanreru. Hiyáhoni hewi nanikatkalu hix-yehiya, pix-yehiya potuko phuru Agripa pepomsaxyawaklu waneya numukata pa pirana yonrexinri.
27Klu tshinanu nkahwaklu hi kihleru hostutkaluru César yehi hyokanatkoklunu munkaklewyehitkotu klu potu hjihyehixika.
Currently Selected:
Atos 25: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
