Atos 21
21
Tiro Poktshi Rapojyawaka Paulo Piranapni
1Wunhamxinixkana wane wuchpajya mar powha hanikajite hwatshijitatshri Cós hiwakatletatshri wyahapkata. Wale prika Rodes yopjewakle wutspaka waneya pnute wyatka haté Pátara poktshi wapoka.
2Wane wukchijyalo sato tsro kanawa Fenícia poktshi yamtatshro hiyáhoni wpokownatka pnute wyahap-hata.
3Waneya wali hichinhalexinixkalu Chipre tshijne wpastate sreta wiknohamxyalu waneya Síria nwaka wyamtatka. Tiro poktshi wutspakyehita klu tshinanu wane tkowunuxiko kanawa.
4Wale poktshi wukchijyana satkaka Hoyakalu homkahitatshine hiyáhoni pa semana wannayma wutukatka. Waneya wanna hiykotmaklu Paulo Hoyakalu Hiwejikaluruya Jerusalém hma yiywakanupa.
5Seyni rapojinixka wyinri hohne, wyatka. Waneya Hoyakalu homkahitatshine, hhanunronna koxa hiwhenennaymakananuko himotsatwu tsru poktshi malekate. Ksatu wnahlu wyoptsojixya hixa ptowrunekwu, wanjihohnetatka.
6Waneya wunhamxinixkana tsro kanawa wpokownatka. Hoyakalu homkahitatshine hsatokanwakatluna rawyawakna.
Cesareia Poktshi Rawyawaka Paulo Piranapni
7Pnute wyatka. Tiro poktshi wuchpajyatka Ptolemaida poktshi wapokatka. Wane wyoptoxyana pimrine Hoyakalu homkahitatshine, wannayma wutukatka pa hohne.
8Waneya wale prika wyatnaka Cesareia poktshi wapokatka. Waneya Filipe Hoyakalu pirana jinkakletaklerupji wjihloka wane wutukatka. Filipe satu Jerusalém Cristo halixatshine hapatjetatshine hepixatshrini pimrine jejineyma sete-tkana.
9Quatro whenru Filipe maklojine hinamtatshri pirana hinkakletatshine.
10Hix-hohne wane wwa waneya satu hinamtatshri pirana hinkakletatshri Ágabo tshinkaluru hapoka, Judeia tshijne ruchpajya.
11Waneya Ágabo hapokastsixinwu Paulo rostuptshijre hkochtsheka waneya waleko hijixi himyo koxa rostuxnawa waneya wane htshina:
— Wla htshina Hoyakalu Hiwejikaluru: Wla rixa hosturetanruna judeu-ne Jerusalém hajene xye hostuptshijru hitakjetatshri. Waneya judeu mixkane renekko.
12Waneya xye pirana wyijnakoxinixka, hixa hiyrunu wane hajen-koxa, hanjitlu Paulo Jerusalém hma yiywakanupa.
13Seyni Paulo hihitna:
— Kluneru tshinanhe htshiyahata, klu tshinanhe hwamonuwkakno? Hita halpokoxnawa nostuxikolupa seyni hi wale tsonu, nalpokoxnawa nupninripa Jesus Cristo hiwaka tshinanu.
14Hiyáhoni hi wumukata tshipetletlu wale tshinanu wutuk-kojiretletlu waneya wane wtshinru:
— Hoyakalu halujyawaka rixkotka.
15Wale hohnekaka hiknohinixka wuprukatka Jerusalém nwaka wyamta.
16Satkaka Hoyakalu homkahitatshine Cesareia hajene himotsamtwu. Ranikwuna Menasom-pji, wale Chipre hajeru, walepji wutukanutka. Mitshikawako ralixatkalu Hoyakalu pirana.
Jerusalém Rapojyawaka Paulo Piranapni
17Waneya Jerusalém wapojinixka Hoyakalu homkahitatshine yoptotwu. Hpoyikowpotutna.
18Wale prika Paulo hixayma hapaka Tiago wetapyawakapa. Cristo halixatshine hapatjetatshine kosekatshine ptowruneka wane hapatjexya.
19Waneya Paulo halikna wanna waneya runkakatkana psol-piranako Hoyakalu hixkajyawakna judeu mixkane waleko hkamrure tshinanu.
20Hyijnakoxinixkaluna hpoyahnutluna Hoyakalu waneya wane htshinruna:
— Petewa wimole, hi pejnu mil kananu judeu Cristo halixatshinetka hiyrunu wanna ptowruneka Moisés yonreru pirana homkahpotutatshinetkani.
21Wanna jempiranyehityi pasrukjexyawakna judeu-ne pa yine tskala hwatshine Moisés hiykole yonatkaluru pirana ruchoxyawakna haté pasrukjexyawakhimna hma jiprojhaptojimtawhenexyawakna hiyrunu hma kahwakpiraxyawakanruna judeu-ne hixjexyawaka.
22Hiyáhoni kluhe wixanu? Wanna himatanu punyawaka.
23Hiyáhoni wane pixanu wtshinyawakyi. Hewina quatro jejine Hoyakalu runkaklexyaluna rixannuna. Xawakni rujhaluna wane potuko htshinyawakna rixyawakna.
24Panikanna waneya wannayma powratlewlu pirana pixinwa. Wanna tshinanu pwenutanru jiwjirewatatshri ptowruneka pekhixyawakapa hi halikakni htshinanwakaxyawakyina hiyrunu pekhixyawakapna pix-koxa homkahitlu Moisés yonreru pirana piwekleya.
25Ha judeu mixkane Cristo halixatshine tshinanu wali yokanrenwakatna yonawahlo wan-tshinatshri: Hi hnikanru mayawletshicha henekkaluru nikalhitu, hi hihrahako, hi koxa hostuplatkalurniko hnikanu. Hiyrun-koxa hi hapoklewatanu.
26Hiyáhoni Paulo hiynumatna quatro jejine waneya wale prika wannayma powratlewlu pirana hpohixnawana. Waneya wane pnute Hoyakalupji hjihlokna runkaklexyawakapluna klu hohne hnikatanruna powratlewlu hohnekaka. Wale hohne rixinipa satkaka wanna hanikanru henekachalu hiylatkalurupa.
Hkachixikowaka Paulo Piranapni
27Waneya wale sete hohne nikawnapiraxini satkaka judeu-ne Ásia tshijne hichpajikatshine malixkane hetlu Paulo Hoyakalupji rawakanata. Waneya wanna jihekna hixolune yine Paulo tshinanu hiyáhoni hkachitluna Paulo.
28Hsaplewatna wane htshin-sapletna:
— Jejine, israel-nerune hepixanwu! Xyekni jeji ptowru poktshikaka yapatshri runkajyawakapna yine Moisés yonreru pirana wuchoxyawakapa, wimolene koxa wuchoxyawakapa haté xye Hoyakalupji wuchoxyawakapa htshina. Hiyrunu xawakni satkaka judeu mixkane ranika Hoyakalupji nwaka hiyáhoni rumtukachtaplu Hoyakalupji walenukotkani hikenutkani hiyrunu.
29Wane htshinatkana wanna klu tshinanu retluna Trófimo tshinkaluru Éfeso hajeru tsru poktshiya Paulo-ymalu. Wannamka kahwaklu Paulo hanikatkalu Trófimo tshinkaluru Hoyakalupji. Seyni hike.
30Waneya ptowru poktshi hajene jihekanuwatatka. Rasukamtna, hkachitluna Paulo waneya hkosemtluna Hoyakalupji malekate ranikluna. Waneya chinpotukawa ruchyatluna Hoyakalupji hiphaptotkaka.
31Waneya hixolune hiylapiraxinixkalu Paulo, romano soldado-ne pohire Jerusalém poktshi hajeru jempiranyehitlu tsru sejirtshi hakanhatka Jerusalém poktshiya.
32Waneya waneklu potuko wale pohire, soldado-ne chefe-tekaka hiyrun-koxa soldado-ne hmaklutene ranika waneya rasukanwakatna hixolune yine nwaka. Waneya hixolune hexinixkana soldado-ne rutuk-hiylakletluna Paulo.
33Waneya soldado-ne pohire yanwakatlu Paulo. Hkachitlu waneya rostukjixlu hepi corrente-tsaya. Waneya repomhayehitlu Paulo hiyrunu repomhalu kluhe hkamha wale.
34Pimrinkaka hixolune saplewata, satkaka pnuk-tshin-sapleta. Tsru saple tshinanu soldado-ne pohire hi himatyehitlu klukta hikoluklu. Wale tshinanu soldado-ne pohire towutna soldado-ne ranijyawakapluna Paulo soldado-nepji nwaka.
35Hatskowakastsi rapojinixkana soldado-ne rutjitluna Paulo hixolune jihekle tshinanu.
36Klu tshinanu hixolune yine homkahimtlu hsaplewatna wane htshin-sapletna:
— Hiylatanru xako! Hiylatanru xako!
37Waneya hyochmakpiraxinixkaluna Paulo soldado-nepji Paulo wan-tshinru soldado-ne pohire:
— Numukata hiynumletyihe?
Waneya soldado-ne pohire hepomhalu:
— Pimatluhe grego tokanu?
38Hi he Egito hajeryi mitshikawa pkamhalu tsru sejirtshi quatro mil jejine tshiji towutatshine kamnitatshine kosekatshriyi potshkewakaya?
39Seyni Paulo hihitlu wane htshina:
— Hita judeu-nerno Cilícia tshijne tsru poktshite Tarso tshinikowaka hajerno. Pitshitannotshi hixolune yine niynumatanu.
40Waneya soldado-ne pohire hitshitlu Paulo riynumsaxyawakna yine. Hatskowaka hyopkakatka Paulo waneya romyokatka potshke rixyawakna hixolune yine. Potshke rixinixkana hixolune Paulo hiynumsatna judeu tokanuya wane htshinna:
Currently Selected:
Atos 21: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
