Atos 22
22
Paulo Hihitna Hjihyehitjene Piranapni
1— Jejine, nomolene, tsrune koxa hyijnakotanunno xawakni nunkaklexinwa hix-yehiya.
2Hjeminixkaluna judeu tokanu riynumaxyana, potshkepotukna. Wane htshina Paulo:
3— Hita judeu-no Tarso poktshi Cilícia tshijne hwatshri hajerno seyni halikaka hewi Jerusalém poktshiya ntseruwniya Gamaliel hasrukanruno. Wale hasrukatkano ptowru pirana wutsrukatenni yonreru pirana hiyrunu nomkahpotutlu Hoyakalu hixa pixka ptowrunekhi hewi hwatshinhi.
4Hita, Paulo-no, kamnijekanatna Cristo halixatshine ruylaxikowakapna. Nkachitna jejine, suxon-koxa waneya kapna nyochmakna.
5Tsru sacerdote hiyrunu judeu-ne tsrukakalutene ptowruneka himukata hiphujtaletlu halikaka pirana ntshinyawaka klu tshinanu wanna yonawahlotekaka nyoptotatka Damasco poktshi hajene judeu-ne yokananwakaxikolu. Wane nixa hapoklexyalu Damasco wane hajene nkachixyawakapa Jerusalém nwaka nanijyawakna hostutkalune rapnokatkonna.
6Waneya hanikaj-hohnetkani hatnu hapo nyapamtawa Damasco-stsitkano. Waneklukawa potuko tsru katalu tenhohne hichpajikatshri hatawnayehitno.
7Nyawnatka tshiji, nyijnakotlu satu tokantshi wla-tshinatshri: “Saulo, Saulo, haklu tshinanhe pkamnitno?”
8Waneya nepomhalu: “Katyihe pixa Tsru Hixikatshriwayi? Ruhitatkano: “Hita Jesus-no pkamnijetanruno.”
9Nimotsatanune koxa hetlu katalu hiyáhoni hpikna seyni hi hjemluna niynumsatjeru tokantshi.
10Waneya nepomhalu: “Klu pothe nkamhanu, Tsru Hixikatshriwa?”
— Waneya Tsru Hixikatshriwa wan-tshinno: “Ppalnanutka Damasco nwaka pyanu. Wane punkajiko nalukleru pkamhinripa.”
11— Wale tsru katalu tshinanu hi netanatka, hike potuko. Wale tshinanu nimotsatanune hkanojimtnona waneya Damasco napokatka.
12Hiyáhoni wane rawakanata satu jeji Ananias tshinkaluru, Moisés yonreru pirana homkahitatshrini wale. Judeu-ne Damasco hajene ptowruneka kahwakpiratlu Ananias.
13Ananias yanwakatno, hitastsi hyopkaka waneya wane htshinno: “Nomole Saulo, petanutnaka.”
— Waneklukawa potuko netatnaka waneya netatkalu Ananias.
14Waneya wane htshina: “Wutsrukatenni Hoyakalute nuretatkayi pimaxyawakaplu waleko ralujyawaka hiyrunu pexyawakaplu Jesus Potukalu hiwakatletatshri.
15Klu tshinanu ptowru yineru puphujtaxinri ptowru petanru pirana pyijnakotanru pirana koxa pjemyawaklu htokanu Jesus namaya.
16Ha xawakni, kluhe pkahwakjeta? Ppalnanu, p-batiza-tkotka, pmunanhanru Tsru Hixikatshriwa Hoyakalu ruknojyawakaplu pektunu.”
17— Waneya Jerusalém nsatojinixka, nanjihohnekanatawa Hoyakalupjiya netlu satu hetkaluru Hoyakalu pixkonu tshinanu.
18Netlu Tsru Hixikatshriwa Hoyakalu hita riynumata: “Pchiretanu. Jerusalém puchpajini klu tshinanu wane hajene hi halixanyi hita pirana punkaklexinipa.”
19— Waneya wane ntshinru Tsru Hixikatshriwa Hoyakalu: “Tsru Hixikatshriwa Hoyakalu, wanna himatlu hanjihohnewakapjikaka nujhajekanaxyana, kapna nyochmakjekanatna haté nkotshipjekanatna pixa Cristo-yi halixatshine.
20Hiyrunu puphujtatjerni Estêvão ruylaxinruna hit-koxa wane hwakanata. Nukchikhihlenutlu wan-rixyawakluna. Hiylalewatatshine mkalu ninota.”
21— Waneya wane pnute Tsru Hixikatshriwa Hoyakalu wan-tshinno: “Pyanutka, howuk-tshijne nyokanatanyi judeu mixkane tskalaya.”
Hi Hkotshipjetluna Paulo Klu Tshinanu Romano-nerni Piranapni
22Hyijnakokanatluna haté wale tokantshi htshinini waneya hsaplewpotutna waneya wane htshinna:
— Wan-hixatshri yineru xye tshijne hnikaxika klu tshinanu hi rumukata hiwekleta xye tshijiya.
23Hsaplewjetna hkowchomkatna hiyrunu ruknopxepahitluna tshiji pahi. Rahnannuna.
24Waneya soldado-ne pohire yokanatna soldado-ne Paulo ranijyawakna soldado-nepji. Waneya hkotshipjexikowaka hyokanatluna klu tshinanu raluk-himatletlu klu tshinanu wan-rixa saplewjeryehitluna.
25Seyni rostukanatawaluna soldado-ne, Paulo wan-tshinru satu soldado-ne pohire wanestsi hwatshri:
— Pumukathe kotshipjeretluhe satu jeji romano-neru mjihyehitkotu?
26Waneya xye hjeminixka soldado-ne pohire, hyatka soldado-ne pohire runkakapa, wane htshinru:
— Pimatluhe klu pkamhinri? Xye jeji romano-nerni.
27Waneya soldado-ne pohire yanwakatlu Paulo wane htshinru:
— Punkakanno, halikaklahe pixa romano-neryi?
Waneya ruhitlu:
— Hehe!
28Waneya soldado-ne pohire wan-tshina:
— Tsru tiyiro nwenuta romano-neru nixyawaka.
Seyni Paulo wan-tshina:
— Hita wane tshijiko nmatuxya.
29Waneklukawa potuko hsaletjenemka hitspalamtatka. Hiyáhoni hpikpotuthonuka soldado-ne pohire klu tshinanu rali hosturetatkalu Paulo klu tshinanu romano-nerni wale.
30Waneya soldado-ne pohire haluk-himatletlu halikaka klu tshinanni hjihyehitluna judeu-ne. Hiyáhoni wale prika htowutna tsru hixikatshinwa sacerdote-ne hiyrunu tsrukakalune judeu-ne ptowruneka rapatjexyawakna. Waneya hkochpirokatkalu rostuxikolu waneya wanna hoji sreta ranikatkaluna Paulo.
Currently Selected:
Atos 22: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
