Atos 20
20
Paulo Hapyehitatnaklu Macedônia Hiyrunu Acaia Tshijne Piranapni
1Waneya kojwawaktshi hiknohinixka Paulo tomhakjixna romkahitjene wale yehi hyiywakapna. Waneya Paulo rali tserutahchinikanrexinixkana runhatkana waneya hyatka Macedônia nwaka hyiywakapa.
2Waneya wale poktshi hyapamxinixka ruykotna hixolune Cristo halixatshine hixo pirana runkakna. Waneya Acaia tshijne rapoka wale.
3Wan-rutuka mapa ksuru. Ralpokoxinixka Síria tshijne hyiywakapa rimatyehitka satkaka judeu-ne haluka kachretlu. Hiyáhoni Paulo hichiniklu Macedônia hyapamxyawaka hsatojyawakapa.
4Ásia tshijne potuko rimotsatluna Sópatro tshinkaluru Pirro whene Bereia poktshi hajeru, Aristarco hiyrunu Segundo Tessalônica poktshi hajene, Gaio Derbe poktshi hajeru Timóteo, Tíquico hiyrunu Trófimo tshinkalune Ásia tshijne hajene.
5Nyi jejine kosekatshinetka Trôade poktshi hkahwajyatkawuna.
6Pão myapjetkotu hohne hiknohinixka Filipos poktshi wuchpajya. Waneya cinco hohne hiknohatka Trôade poktshi wyoptoxyana waneya wane wutuka sete hohne.
Paulo Trôade Poktshi Rawyawaka Piranapni
7Waneya domingo hohne kayno hixa ptowrunekwu hapatjetatka pão wjiknajroxyawakapa. Paulo hinkaklewata haté hanikaj-yetshno runkakwu klu tshinanu wale prika wane ruchpajini.
8Tenopjirutu mapa kwalutu wapatjexya waneru hixo nikotapi.
9Satu makluji Êutico tshinkaluru hiphapto tenolu htuplakanata. Paulo hinkaklewatka pchinika Êutico tshinkaluru rixapnewata waneya howukchini rumkapotutatka hiyáhoni hiphapto tenolu rujrujyana. Waneya hyotunkajinixkaluna rali hipnaletanatka.
10Waneya Paulo serpikanwakatlu Êutico waneya hyonohohwakatlu waneya hsapriklu. Waneya Paulo wan-tshinna:
— Hi hkojwakahchinikanutanu klu tshinanu xawakni riwekatka.
11Waneya Paulo hatskotatnaklu teno hwahrukotatshri. Waneya hjiknajrotlu pão, hniklu. Riynumatna haté hohistsitkani waneya hyatka.
12Waneya pantshi ranikluna makluji hiwekatshri wale tshinanu rapnanuhchinikanutna wanna.
Assôs Poktshi Hpokowniyatka Paulo Waneya Mileto Poktshi Rapoka
13Hixa kosejyatkalu Paulo wyohreklo tsro kanawa Assôs poktshi yatshropa. Wane wyoptoxinri Paulo klu tshinanu wane raluk-hixleta Paulo tshijiko raluk-hapoklexya.
14Waneya hyoptoxinixkawu Assôs poktshiya hpokownatka tsro kanawa waneya Mitilene poktshi nwaka wyatka.
15Waneya wane wuchpajya wale prikatkani Quios poktshi hinaple wyapamta. Wale prikatkani Samos yopjewakle wutspaka. Waneya pa hohnetnakni Mileto yopjewakle wutspakatka.
16Paulo hi haluk-hitspakleta Éfeso poktshiya klu tshinanu hi hix-hohne raluk-hitukleta Ásia tshijne. Hchireta, Jerusalém poktshi rumukata hiknokaklexyalu Pentecostes hohneni.
Paulo Hinkakna Éfeso Hajene Cristo Halixatshine Hapatjetatshine Kosekatshine Piranapni
17Mileto poktshi rawakanata Paulo waneya htomhakjixna Éfeso hajene Cristo halixatshine hapatjetatshine kosekatshine hyoptoxyawakapluna.
18Rapojinixkana wanna wane htshinna Paulo:
— Hixa himathetno. Ásia tshijne napojinri hohnekananuko haté xawakni himathetno hanu nixa hiwekleta.
19Judeu-nerune hahxatno hiyáhoni xye kojwakahchinikanutno. Hixa himata hi hitako nalujyawaka nkamha seyni ptowru hohneruka Hoyakalu halujyawaka nkamhajeta, hixo kata ntshiyahata hixa tshinanu.
20Hiyrunu hixa himata, ptowruka nyahot-kamhaleta nepixyawakaphi, kihler-pirana nunkakjethi hixowakaya haté pa pjikakaya kihler-pirana nunkakjethi.
21Nunkakna judeu-nerune judeu mixkane koxa rehchinikanuxyawakapna rektunu tshinanna hiyrunu nunkakna Hoyakalu ruchinikanrexyawakna hiyrunu Jesus Cristo Wutsrukate ralixyawakapna.
22Seyni xawakni Hoyakalu Hiwejikaluru halujyawaka nkamhanu Jerusalém nwaka nyanu seyni hi nimata klu rixannona wane hajene.
23Seyni koxa nimatahnaputlu, klu tshinanu Hoyakalu Hiwejikaluru hinkakno, pa poktshikaka rawanu kojwawaktshi haté preso hwa hita tshinanu.
24Seyni hi namotlu niwekle. Hitaho hijhakalurni Hoyakalu kamrure nkamhiywakapa haté nnikaxyawakaplu nkamrure Tsru Hixikatshriwa Jesus henejyano. Xyekni nkamrure, nunkajyawakapna yine kihle piranalu potuko hiwekkaklewatatshri pirana, Hoyakalu hihlenu hixa tshinanu pirana.
25Hix-yehi nwaka pchinika nunkakletlu Hoyakalu pohirewaxyawaka pirana. Hiyáhoni xawakni nimatlu hi satukna hixa Hoyakalu pohirewaxyawaka pirana nunkakanunhi hetanutnakno.
26Wale tshinanu xawakni nunkakhi, pa hohnepa satu hamhinipa, hi hita tshinanni.
27Klu tshinanu hi psojikna Hoyakalu halujyawaka pirana nimalexyahi.
28Hislahinwa. Hislahan-koxna pimrine Hoyakalu Hiwejikaluru henejyahi hislahiywakna. Carneiro-ne hinotatshine pixka hixanna Hoyakalu halixatshine hapatjetatshine, hanjitkalunetka Hoyakalu whene hipnaleya.
29Klu tshinanu nimata nuchpajinpatka pimrine hinanu hocha hajeru kmatsyiru pixka rixa hapokletanna, wannamka haluka nikatletlu Hoyakalu halixatshine hapatjetatshine.
30Hiyrun-koxa satkaka hixako hepire weyawatanu waneya halikakalutu pixkalutu tokantshi htshinna seyni hi halikakni waneya pimrinepni hyapretakanna romkahlewaxyawakanapna.
31Wale tshinanu tsru hislahle hixinwa. Hichinikanru mapa mhale pchinika hohohne hoyetshno koxa hikeklu nutuk-kojiretlethi hixa satkaka haté hixo kata ntshiyahyehithi.
32Waneya xawakni Hoyakalu hislahlewle hiyrun-koxa Hoyakalu hihlenu hixa tshinanu pirana hislahlewle nutakanhi. Walekni himukata mixkowkaklethi htseruwahchinikanuxyawaka hiyrun-koxa renekanhi hyoptotanrupa Hoyakaluya ptowru yine potukaluneyma.
33Hixa tskala nwaka pchinika hikeklu hohne net-sotanukanatlu satu tiyirote hi koxa net-sotanukanatlu satu mkalu.
34Hixa himata, ptowru hohneruka nkamrurewata nmahaxinri nukchijyawakapa haté nimotsane mahaxinri koxa tshinanu.
35Nkamrure psoluyaka tshinanu nekhithi hixa haluka kamrurewleta hike mwikane wumukata hepixletanu. Hichinikanretanru Jesus Tsru Hixikatshriwa tokanu: “Katukta renejikolu yoptota hpoyikowata seyni heneklewatatshri pnute poyiknu.”
Paulo Hanjihohneta Wannayma Piranapni
36Waneya rali wan-tshinrexinixka Paulo hyoptsojita wannayma ranjihohnetatka.
37-38Hiyáhoni wanna tshiyahata klu tshinanu Paulo wan-tshinatkana, hi retanutnakluna. Waneya hsaprikluna ramlutluna. Waneya rimotsatluna tsro kanawa nwaka.
Currently Selected:
Atos 20: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
