Atos 19
19
Paulo Éfeso Poktshi Rawyawaka Piranapni
1Corinto poktshi rawakanatawa Apolo tshinkaluru, seyni Paulo pimri poktshikaka hyapamta haté Éfeso poktshi rapoka. Pimrine hapatjetatshine hyoptota Paulo waneya.
2Waneya Paulo hepomhana wanna:
— Hixlahe yoptotlu Hoyakalu Hiwejikaluru halixinri papko?
Waneya ruhitluna:
— Hi wimatyehikanatlu Hoyakalu Hiwejikaluru.
3Hiyáhoni repomhana wanna:
— Han-hixatshri batiz-lu hyoptota hixa?
Waneya ruhitna:
— João batiz-le tsonu.
4Waneya Paulo wan-tshina:
— João batiz-le hekhitlu yine rehchinikanuxyawakatkana. João hinkakna yine ralixyawakapluna wale hatjiniyaka hapokatshripa, walekni Jesus Cristo.
5Waneya hjeminixkaluna xye pirana h-batiza-tkana Tsru Hixikatshriwa Jesus hiwakaya.
6Waneya Paulo kapxaktseptahitna yine waneya Hoyakalu Hiwejikaluru hapokhohotna yine waneyakni satkaka nru hyanumaxyatkana hiyrun-koxa runkakletluna hinamtatshriwa pirana.
7Waneklu papko wane rawapna doze jejine.
Tirano Tshinkaluru Escola-tepji Hjihlojyawaka Paulo Piranapni
8Waneya mapa ksuru pchinika Paulo jihlokjekanatlu hanjihohnewakapji. Tsru htsernu hchinikanuyma ruhjekakna judeu-ne haté repixna hyoptoxyawakapluna Hoyakalu pohirewaxyawaka pirana hanu rixa hinkakletna Paulo.
9Seyni pimrine tokantshi malixkane, hi ralixluna haté hektuwaka htshinanwakatluna Hoyakalu hatnu hapote pirana hixolune jemanu. Waneya wane ruchpajyatka Paulo Cristo halixatshineyma. Hiyáhoni Paulo Tirano tshinkaluru escola-tepji hya, hyinuwaka hasrukletna yine ptowru hohnekaka waneya.
10Hepi mhale pchinika wan-rixatka. Paulo hinkakle tshinanu wanestsi hajene ptowruneka Ásia poktshi hajene judeu-ne haté judeu mixkane koxa yijnakotlu Hoyakalu pirana.
11Waneya hix-potuko himyekaklewatatshri hkamha Hoyakalu Paulo tshinanu.
12Satkaka yine haniklu Paulo hitakjereru hiyrunu raniksamajereru koxa ranikna waneya yeyixatshine yotneklu. Wan-rixinixkana yeyixatshine hitskalhatka haté kamtshine hichpajyana.
13Seyni pimrinkaka judeu-ne ptowru poktshi hyapjetna hiwejikalune hektune hakakpiratatshine yine mane hwatshri. Wannamka hakakna hiwejikalune hektune Tsru Hixikatshriwa Jesus hiwakaya. Wanemka htshinna:
— Paulo hinkakletjereru Jesus hiwaka tshinanu pasukanu.
14Wan-rixjekanatna Ceva tshinkaluru whenene set-na. Ceva walekni judeu sacerdote-ne chefe-te.
15Seyni pa kata hima hiwejikaluru hektutu wan-tshinatkana:
— Hita himathetlu Jesus, Paulo koxa nimatheta seyni hixa hi nimatheta.
16Waneya jeji hiwejikaluru hektutu himwatshri hiptekhohotna, hyahotkakna waneya tsru yahotkaklu tshinanu rasukna hiskamkatatshinetka, kachremanerune.
17Waneya ptowruneka Éfeso poktshi hajene judeu-ne, judeu mixkane koxa hjempiranyehixinri hpikpotutna hiyáhoni hkahwakpirapotutluna Jesus Tsru Hixikatshriwa hiwaka.
18Waneya hixo Cristo halixatshine yinuwaka hiphujtaletluna hkamhalerna hektutu hixowakaya.
19Hixo kahontshine hixakanatatshine hapatjetlo yonawahlo kahontshi pirana yonaxikolu waneya ranikluna hixowaka hyoxijyatkalona. Waneya rutakyahojinixkalo yonawahlo wenru cinquenta mil proji prata kamhikolu poyahotapatka.
20Wan-rixa hipalepiranata Hoyakalu pirana hiyáhoni htseruwpiranapotutatka Hoyakalu pirana.
Paulo Yokanatna Timóteo, Erasto Macedônia Tshijne Hyiywakapna Piranapni
21Hiyáhoni wan-rixatka, Paulo hichinikanuwata Macedônia tshijne Acaia tshijne koxa hyapamxyawaka Jerusalém poktshi hyiywakapa. Wane htshina:
— Nali wane hwalexinipatka Roma poktshi nyanu koxa.
22Hiyáhoni hepi repirene, Timóteo hiyrunu Erasto tshinkalune hyokanata Macedônia nwaka. Seyni wale Paulo Ásia tshijne hitukatka pimri hohnekaka.
Tsru Kojwaklu Rixapoktshita Demétrio Piranapni
23Waneklu papko tsru kaheknanuwlu rixna Éfeso poktshi hajene Tsru Hixikatshriwa hatnu hapote pirana tshinanu.
24Satu jeji Demétrio tshinkaluru prata kamruretatshri kamhajekanatlu Diana-pji mayawle yáholukaka hkamha. Prata hkamhiylona. Hkamrurna tshinanu tsru tiyiro hyoptotna repixjeneyma.
25Waneya Demétrio hapatjetna repixjene hiyrunu pimrine wale kamrurtshi kamhatshine. Runkakna:
— Jejine, hixa himata tsru tiyiro potuko wyoptoxyalu wkamrure tshinanu.
26Seyni hetanru hjemanu koxlu Paulo kamrure. Rumtukahchinikanutna hixo yine Éfeso hajene haté Ásia tshijne psol-tshijne hajen-koxa. Wale hinkajyana, yine kamhaleru hoyakalune hima hi halikakni. Hixo yine halixlu.
27Hiyáhoni pa katako wkamrure wamtakanu. Pa katako yine yinuwaka hichinikanuwletanu tsro hoyakalo Diana-pji hi hijhakaluru hkahwakkotka. Toyaknu nikatko. Waneya pa katako ptowru Ásia hajene haté psol-tshijne hajeneko hi kahwakpiratanutkalo hoyakalo Diana hihlenu.
28Waneya xye pirana hjeminixkaluna hjihekanuwpotutatkana yine. Waneya hsaplewatna wane htshinatkana:
— Kihlero potuko Diana Éfeso hajero. Tsro Hixikatshrowani wala!
29Hiyáhoni tsru poktshi hajene ptowruneka kaheknanuwatatka. Waneya wanna kachitna Paulo himotsane Macedônia hajene Gaio tshinkaluru hiyrun-koxa Aristarco tshinkaluru hkachitna. Waneya hapatjexikowaka nwaka hkosemtna.
30Paulo-mka haluka jihlokleyehitna hixolune riynumsaxyawakapna. Seyni romkahitjene hi hitshitlu.
31Hiyrun-koxa satkaka Ásia tshijne chefe-tene, Paulo himatletlene, yokantokannwakatlu, ruykotluna hapatjexikowaka hma jihlojyawakanupa.
32Pimrine saplewjeta, pimrine pnuk-tshin-sapleta, klu tshinanu tsru sejirtshi rixna hapatjetatshine haté hixolune hi himata klu tshinanu rapatjetna.
33Waneya judeu-ne Alexandre tshinkaluru hixolune hanikajite ranikluna waneya judeu-ne yopkakjixatkalu. Waneya Alexandre hanjitna himyoya potshke rixyawakna rumukata hihle hinkaklexyawakapna hixolune tskalaya.
34Seyni hixolune himaxinixkalu judeu rixyawaka Alexandre, hi raluka jemtokanretluna hiyáhoni wanerutu htshin-sapletna wanna ptowruneka, hepi hora pchinika hsaplewjetna. Wane htshin-sapletna:
— Kihlero potu Diana Éfeso hajero. Tsro Hixikatshrowani wala.
35Waneya tsru poktshi hajeru yonawahlewjetatshri potshke hixkakna hixolune yine. Wane htshinna:
— Jejine, Éfeso hajene, ptowru yineru himatlu Éfeso poktshikni hislahjetlu Tsro hoyakalo Diana-pji hiyrun-koxa sotlu tenhohne hichpajikatshri rihnanutjetna. Kahwakpiratkaluru hkahwakluna wanna.
36Hiyáhoni potshkephi hi hkamhanru wale muchinikanretkanekhi klu tshinanu halikakni xyekaka pirana hike himukata malixlenutlu.
37Hixa hanikna wkata nyi jejine seyni hikemka htshinanwakatluna woyakalute hi koxa pa hixanu htshowhutna hanjihohnewakapjiya.
38Hiyáhoni Demétrio hiyrunu rikamrurewatanune pa pirana raluka tshinrenwakatatkana satkaka yine waneya rumukata yanwakletluna jemahchinikanjexikowaka. Wanena jematshine, wane rumukata hihjekakjerexinna.
39Seyni pa piranako haluka kochtsheklexini hixolune hapatjexikowaka hjemiko, wane potuko raluka jemkapiranyehixika.
40Klu tshinanu pa katako wepomhakoklunu klu tshinanni tsru sejirtshi wixatka xye hohne, hike wumukata tshinretna. Hike hikolukle minje.
41Waneya rali wan-tshinrexinixkana yonawahlewjetatshri hyokanatatkana hixolune yine.
Currently Selected:
Atos 19: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
