2 Coríntios 7
7
1Nuchinikanune nimatletlene, xye ptowruka Hoyakalu hinkaklexyapiranwu hixanni. Hiyáhoni xawakni hpowraxinwa ptowru hixatshri wimane pitshotatshriya hiyrun-koxa wsamenru. Potukalun-potu wixinwa ptowru hohneruka Hoyakalu kahwakpiraxikol-tshinanu.
Paulo Hichinijyawakna Corinto Poktshi Hajene Piranapni
2Hikchikahwawakletanwu hihchinikanuya wwiywakapa. Hi satukna hixa wyotneta. Hi satukna hixa wumtuka. Hike yineru wkonapahixanutechata.
3Hi wane ntshina, njihyehixyawakaphi. Klu tshinanu wane mitshi ntshinatkahi hixakni wuchinikpotutanunhi hiyáhoni hike kotspalkakanwu ho wupnini ho wiwejini.
4Hixa nmunanhapotuta hiyrun-koxa ntserutahchinikanuxnawa hixa pirana tshinanu. Napnanuhchinikanuta hiyrun-koxa numuwpotuthonuka ptowruka wsaletjeru tshinanuya.
5Macedônia tshijne wapokkawaka hi wapnanuta. Ptowru sretako wexyalu kojwaklu, yahotkaklu hiyrun-koxa wpikle weta hitok-hajiya.
6Seyni Hoyakalu honukla kojwakahchinikanutatshri hepixatshri, Tito tshinkaluru hapokle tshinanu htserutahchinikanutatkawu.
7Hi Tito hapokle tshinanu tsonni seynikta hixa Tito hpoyikotahchinikanuxyawaka pirana tshinan-koxni. Runkakno hixa pirana. Hix-hima hichinikno. Hix-hima wamonuwata hita nopirana tshinanu haté hit-hima himatshwahpirata. Hiyáhoni xye pirana tshinanu xawakni pnut-potu numuwata.
8Hi nehchinikanuta yonawahlo hixa nwaka nyokanreru tshinanu. Netkamkalo yonawahlo nyokanatanro pchini hohnejiji twamontakamkahi nehchinikanutanmaka.
9Seyni xawakni npoyikowata yonawahlo nyokanatanro tshinanu hi twamontakhi seyni halikaka hwamonnu hehchinikankakatkahi. Hoyakalu hixkajyawaklu hwamonnu tshinanu hehchinikanutatka hiyáhoni hi psojikna wumtukatkahi.
10Klu tshinanu wamonuwnalu Hoyakalu henejyahi hehchinikankaklewata riwekkakko pupjekanatatshri. Wale tshinanu hi wwamonuwnanu hixa. Seyni wamonuwnalu xye tshijne heneklewle hipuktshi reneklewata.
11Haha hetanu hanu rixhi Hoyakalu hwamonuwnal-tshinanu: mchikohchinikanune rixkakhi, hiyáhoni hijhahapkatatkalu hekhixyawaklu hi ntshinyawaka mitshi pixka hixatshinhi. Hi psokananru hamlehonutshi, hi psokananru hetwamonuxyano, hi psokananru hixa hichiniklewle. Hekhixnawa hapnokathapkaxyawaklu hektutu. Ptowru potuko hekhixnawa potukalunetkahi hixyawaka xye piranaya.
12Hiyáhoni xawakni yonawahlo nyonanwakathi seyni hi nyonatlo hektutu kamhatshri tshinanni, hi koxa rumtuklerutka tshinanu nyonatlo. Halikaka nyonatlo Hoyakalu hekhipotuxyawakaphi hi psokananru hichinijyawu.
13Hiyáhoni xye pirana tshinanu wpoyikowata. Hi xye tshinanu tsonni seyni wumuwata Tito tshinkaluru poyikowle tshinanu. Klu tshinanu wjempiranyehithi hanu hixa poyikowkakletatkalu Tito hiyrun-koxa hixa hapnanuhchinikankaklexyawaklu pirana.
14Tito nunkakatka hixa pirana kihlewaka ntshinanwakathi. Hiyrun-koxa hi npatewata kihlewaka pirana ntshinanwakaxyawakhi. Ptowru hohneruka halikaka pirana wunkakhi. Hiyáhoni hixa pirana kihleru wunkaklu Tito halikaka piranni.
15Pnut-potu ruchinikhi ruchinijinri kajnakolunhi hixyawaka pirana hiyrun-koxa tsru pikluyma hima hyoptotatkalu kahwakpirruyma koxa.
16Hiyáhoni npoyikowata klu tshinanu psol-potuko nmunanhiyhi.
Currently Selected:
2 Coríntios 7: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
