2 Coríntios 5
5
Pantshi Myotshi Mkamhanutu Piranapni
1Klu tshinanu hewi tshiji wwaka pchinika wimankaka himajetshrikaka pixka hixatshrini. Seyni wimatlu xye wimajeru pixkalutu nikatkoklunupa wenekko pantshi Hoyakalu kamhaleru. Hi yinemyo kamhapjitanruni seyni wale hikeklu hohne mnikawnakatupni tenhohne hajerupjini.
2Wiwekka pchinika wimane hitokote kaheknanuwata wchireta. Walukpotutlu wjihlojyawaklu tenhohne hajerupji.
3Hiyáhoni tenhohne hajerupji wjihlojinpatka hi mapjine pixka wixanutka.
4Klu tshinanu xye wimane himajertshi pixkalutu wwaka pchinika, wkaheknanuwata wchireta. Himka waluklu wimane hkomkahikowaka seyni walukpotutlu wmakaxikowaka tenhohne hajeruya. Waneyapa hiwejikaluru nikatanru himat-nikawnatshri.
5Hoyakalukni wyokmanakjixjeru. Hiyrun-koxa renekwu walenuko Hiwejikaluru rimaxikowaka ptowru potuko wenekka.
6Hiyáhoni hi wutuka munanhaletlu. Wimatlu xye wimane wwaka pchinika howukawalu wwiywakapa, Tsru Hixikatshriwa Hoyakalu yehi hajeru.
7Klu tshinanu walixle wiwejya. Seyni hi wetjereru wiwejya.
8Poyikolun-potukwu. Xyemka wimane waluk-hiknokleta Tsru Hixikatshriwa Cristo-yma wiwejyawakapa.
9Seyni ptowruka pnute kihlerni hpoyikoxikowaka Tsru Hixikatshriwa Cristo, ho xye wimane wwaka pchinika, ho Tsru Hixikatshriwa Cristo-yma wiwejyawakapa.
10Klu tshinanu hixa ptowrunekwu Cristo hoji sreta wuphujewnini. Cristo hijhahchinikanyehitanwu hixa ptowrunekwu. Waneya satkaka yoptotanru hkayleru xye tshiji hajeru mantshi kamrure wenru ho kihlerhe hkamhaleru ho hektutra.
Wimatletlu Hoyakalu, Hituru Cristo Tshinanu Piranapni
11Tsru Hixikatshriwa Hoyakalu hamlenu pirana wimata. Hiyáhoni wujhalu walixkajyawakna yine halikakalutu pirana. Hoyakalu himathetwu psol-potuyako. Hiyrun-koxa nkahwaka hix-koxa himathetahchinikanutwu.
12Himka waluklu hixa nanwaka kihle piran-yehi hixnawakwa. Seyni waluklu hix-yehi htseruwpiranaxyawaka wipirana. Waneyapa hix-koxa kapiranayaphi kihler-pirana himat-hinkajyawakapna wipirana pimrine rohocha tsonu hikchikhihlenuxikatshine seyni hi rajiynina.
13Klu tshinanu mahchinikanune wkahwakkoklunu, Hoyakalu tshinanu wane wixa. Hiyrun-koxa kahchinikanurune wikahwakkoklunu hixa tshinanukni wane wixa.
14Klu tshinanu Cristo hichinijyawakwu tshinanu wihchinikanu hkoseta. Klu tshinanu wimatlu satupka yineru hipnatka ptowrunek-yine tshinanu. Hiyáhoni hatatjewa ptowrunekwu hipnatka waleyma.
15Ptowrunek-yine tshinanu rupnatka Cristo hiyáhoni hiwekatshine hi wannako ralujyawaka hkamhanna seyni halikaka riwekanna Cristo halujyawaka hkamhinipna, wanna tshinanu hipnapatshri, hiyrun-koxa wanna tshinanu hipuktshi hiwekkajikatshriwa.
16Hiyáhoni xawakni hike yineru hchinikanu wetanu yine hchinikanu hixjexyawaka. Mitshikananu wane wixjejtaplu Cristo seyni xawakni hi wane wixa himatletanutkalu.
17Cristo-yma hwatshritka herotu yinerutkani. Mitshikananu rixjekanaxyawaka nikawnatka. Hiyáhoni xawakni herotutkani.
18Xye ptowruka Hoyakalu kamrurni. Hoyakalu wan-hixkaklu Cristo. Wale tshinanu hixa Cristo kamnikanatatshinwu hiprotaka rimatletanune wixyawaka. Hiyrun-koxa renek-kamruretwu pimrine wimatletkajyawaklu Hoyakalu.
19Xyekni wunkakle: Hoyakalu hi hitajyana yine rektunna. Hoyakalu Cristo hoho hyapa ptowrunek-yine rimatlexyawakapa. Hiyrun-koxa Hoyakalu henekwu xye hinkaklu, Hoyakalu himukata himatletlexyawakapna yine pirana, wunkakletjeta.
20Hiyáhoni xawakni Cristo hitshre tshinanu wunkaklewjeta, hatatjewa Hoyakalu tshanixhi hixa wunkakle tokanuya. Cristo hitshre tshinanu nanjithi hixa Hoyakalu kamnikanatatshinhi himatletkotka Hoyakaluya.
21Hektuntshi mimwakatni Cristo seyni wanepnawaka Hoyakalu hapnokatlu Cristo wektunu tshinanu, wpoyaho potukawnalexyawaka Hoyakalu hetanuya.
Currently Selected:
2 Coríntios 5: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
