2 Coríntios 4
4
Kihler-potuko Tokantshi Katalu Pixka Hixatshri Piranapni
1Hiyáhoni hi wuhroka klu tshinanu Hoyakalu ruchinijyawaka tshinanwu xye kamrurtshi renekwu.
2Seyni halikaka ptowru hixatshri kamrurtshi yohimatkaluru hiyrun-koxa yokwihchinikanrewatatshri wuknokatka. Hi wyokwijrewata hiyrun-koxa hi pnuko wtshina hinkakleta Hoyakalu tokanuya. Seyni ptowru hohneruka halikakalutu pirana tshinyawaka wuphujeta. Kihle piranyehirune wixnawa ptowru yine hchinikanuya Hoyakalu hetanuya.
3Klu tshinanu wunkakle pirana, kihle piranalu potuko hiwekkaklewatatshri pirana, himka phujewaka mwakatni, hamhatshine tshinanu tsonu halikaka yohimatatshrini.
4Hi ralixluna Cristo klu tshinanu xye tshijne hoyakalute hektutu kkamhakleru himaletahchinikanutna. Hi ritshitna rumrekhaxyawakna hma mexyawakanupluna katalu, kihle piranalu potuko hiwekkaklewatatshri pirana, Cristo hoyaknu pirana. Cristo waleni Hoyakalu yáholu potuko.
5Klu tshinanu wunkakle pirana hi hixako wipiranni; wunkakle Jesus Cristo Tsru Hixikatshriwa piranni hiyrunu hixa towrertshinwu Jesus tshinanu wunkaklewjeta.
6Hoyakalu wla tshina: “Mapchahawak-yehi katalupni.” Wane potuko hixa hatawnaletatka halikaka pirana wihchinikanuya. Xyekni renejyawu himatkaltshi hatajnu Hoyakalu hoyaknu himatyehixikowakapa, yotshyahatatshri Cristo hojiya.
Hixa Kajpa Kamhikolu Pixkalunwu Kwenur-potuko Tenhohne Hichpajikatshri Hwahitokotexyawakwu Piranapni
7Seyni hixa xye halukkaluru tenhohne hichpajikatshri himwatshinwu kajpa kamhikolu stono pixka hixatshinwu. Wane wixa rimaxikowaka tsru pixkontshi hi hixanni Hoyakalunni.
8Ptowruko salewaktshi weta seyni hi rallitanwu. Hi wimatahchinikanuxnawa seyni hi mkahwakkanepwu.
9Kamnitkalunwu seyni hi hiknokkalunwu. Wkotshipjetka wihchinikanuya seyni hi nikawnatshinwu.
10Ptowru hohneruka hi howuklu wimane hiylaxikowakapa Jesus pixka rimathexikowakap-koxa Jesus hiwekle pirana, hixa wimaneya.
11Klu tshinanu wiwekka pchinika jhamlewaka wwahnapuwakata Jesus pirana tshinanu Jesus hiwekle koxa hiphujetkalurupni wimane himat-hipnatshri hetanuya.
12Hiyahokni ptowru hohneruka hipuktshi hetumhawu seyni wanepnawaka hixa riwekkakhonuka.
13Hoyakalu tokanu yonatkaluru mitshikawlur-pirana wan-tshin-yonhata: “Nalixa hiyáhoni nyanumata.” Hiyáhoni hix-koxa himwalu walerutu walixle hchinikanu. Cristo walixa hiyáhoni wyanumata.
14Klu tshinanu wimatlu Hoyakalu honra Wutsrukate Jesus hipuktshi yehi riwekkajyatkalu, hix-koxa hipuktshi yehi riwekkajinwu Jesus pixka. Hiyrun-koxa Hoyakalu Jesus yehi ranikanwu hixaymakananuko.
15Xye ptowruka hakanhatka hixa hepixikowaka tshinanupa. Wale tshinanu Hoyakalu hihlenu himukatatshri potuko hapokyehitna hixolune yin-yehi. Hiyáhoni nyipa yine himalwutanru Hoyakalu hanjihohneruya, hpohixikowakapa Hoyakalu.
Walixle Kosek-hiweklexyawakapwu Piranapni
16Hiyáhoni hi wuhroka halixletanu. Yáholu wimane himat-nikawna seyni hixa hitokote hwatshri rerotetka ptowru hohnekananuko.
17Xye papko salewaktshijiji wetjereru pchini hohnejiji tsonu hkojwakanwu. Seyni xye salewaktshijiji hapnutpatka yohnika tsru potuko hoyaknutshi hikeklu hohne mnikawnakatupni.
18Klu tshinanu hi wkahwakpirpotutlu hetjejrurkaka seyni ptowruka metkotkaka halikaka wkahwakpirata. Klu tshinanu ptowru hetjejrurkaka pchini tsonu nikawnanu. Seyni metkotkaka hikeklu hohne nikawnanu.
Currently Selected:
2 Coríntios 4: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
