2 Coríntios 3
3
Herotu Pirana Yokanru Piranapni
1Wla wtshinini hixlahe kahwaklu kihle piranyehi wtshinyehixinwa? Hixlahe xawaka hijhalu yonawahlo kapiranyehi wixyawakapa pimrine hixjexyawaka pixka hixa himukata yoptolhihlenuxyawakapwu hixa hyonre ho pnuko hichpakatshro yonawahlo?
2Hixakni wyonawahlenhi. Wajkaka yonatkalunhi. Hixni himatkalunhi hiyrun-koxa het-yonhatkalunhi ptowruneka yineya.
3Halikakni rimathetka hixa Cristo yonrene pixka hixatshinhi hiyrun-koxa hanikatshinekwu hixa. Hi yonawahlewapha hyonaxika, hi sotlu tshrajiko hyonaxika seyni yine hajiko hyonaxika. Hoyakalu hiwekatshri Hiwejikaluru yonatlu.
4Hoyakalu wmunanhiywaka tshinanu wane wtshina Cristo-ya.
5Himka wpoyahota hixa nanwaka, hixa nanwaka pa hixanu wkahwajnawakwa seyni Hoyakalukni wpoyahokakjeru.
6Hiyrun-koxa Hoyakalu poyahotatshine rixkakwu herotu hkojiretlewleya. Xye hkojirexyawu hi Moisés yokanreru yonatkaluru ruchpajya seyni Hoyakalu Hiwejikaluru yokanre ruchpajya halikaka. Klu tshinanu Moisés hiykole yonatkaluru hipuktshi heneklewatatshrini seyni Hoyakalu Hiwejikaluru heneklewle hiwekkaklewata.
7Moisés hiykole yonatkaluru yonrurni sotlu tshrajkaka hyonatka. Waneya yine renekka yonawahlo Hoyakalu hoyaknu hakanhayehitna. Moisés hoji katalu hyinuwaka hiwnaletatka wanepnawaka israel-nerune hi hakothatnutlu rethojixyawakluna Moisés. Hiyáhoni Moisés yokanreru yonatkaluru hipuktshi heneklewatatshri tsru hoyaknu rimapokyehitna yine,
8hi psokananru xawaka royaknu Hoyakalu Hiwejikaluru kamrure.
9Mitshikananu yokanruru yine jihyehitatshri tsru hikahwakkalurmakni. Hiyáhoni tsru hikahwakkalur-potni herotu yokanruru wpotukatjeru.
10Klu tshinanu mitshikananu yokanruru hoyaknu tsru rixapa seyni xawakni hike potutkani wale, klu tshinanu yokanruru hepi rixinri psol-potuko tsrutkani wale royaknu.
11Klu tshinanu pchini tsonu hakotatshri hoyakawjejtapinri wane yohnik-hijhakalurni hoyaknutshi hikeklu hohne mnikawnakatu.
12Xyekni wkahwaka Hoyakaluya hiyáhoni tsru hchinikanwu wunkaklewaxyawaka.
13Hi Moisés pixka hixatshinepwu, wale honukla hihoji ruchyata mkatshri samaya israel-nerune muhle hetlepotuxyawakanuplu hihoji hatnu. Hiyrunu hihoji hatnu hiwnakananumtatka.
14Halikaka wanna hchinikanu katshpokka. Haté xawakni Hoyakalu tokanu yonatkaluru Jesus mapokkanuklunuwa pirana rethajekanaxinna israel-nerune, hihchinikanna hichyatka hatatjewa mkatshri sama Moisés hichyahojiwaklexinri ruchyahchinikanuxnawana. Xye hihchinikanna hichyale Cristo ralixini tsonna wale konanna.
15Haté xawakni Moisés hiykole yonatkaluru rethaxinna Moisés hichyahojiwakletanru wanna hchinikanu ruchyajeta.
16Seyni rumukata kochtshekota hichyahojru sama Tsru Hixikatshriwa Hoyakalu ruprotakyehixyawakapa yineru.
17Hewi Tsru Hixikatshriwa htshinini, waleni Tsru Hixikatshriwa Hoyakalu Hiwejikaluru hkochtsheka. Hanuktalu Hoyakalu Hiwejikaluru wane koxlu ruchoxikowaka yineru hkachikanatjer-yehiya.
18Ptowrunekwu hixa muchyahojitkanwu wuphujetlu Tsru Hixikatshriwa Hoyakalu hoyaknu hatajnu hanihapi pixka. Wekhitlu waleko royaknu hatajnu. Tsru Hixikatshriwa Hoyakalu ruchpajya xye hoyaknutshi, Hoyakalu Hiwejikalurukni. Tsru Hixikatshriwa Hoyakalu pixka rixkakwu. Hiyáhoni hoyakawaxikaluru hatajnu pnuteko hyakananumta.
Currently Selected:
2 Coríntios 3: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
