2 Coríntios 2
2
1Wane ntshinahchinikanutatka, Corinto poktshi nyini hiyrunukotnaka nwamontakhetkotanhi. Hi naluklu nwamontajyawakhi.
2Klu tshinanu hixa nwamonuwnakajini hanhe nixa poyikownaletanu? Hixa tsonukni mayehixkakkalunhi?
3Wale tshinanu wale pirana hapka nyonata waneya hix-yehi nyinipa, hi hwamonuwnakakanno seyni npoyikotjenephi. Klu tshinanu nmunanhahi xye piranaya. Numuwaxini hita, hix-koxa himuwatanu.
4Hixa nwaka nyokanatanro yonawahlo nkamhin-honra. Waneklu nkojwakahchinikanpotuta nwamonuwata hiyrun-koxa ntshiyahpotutatka nyonre pirana tshinanu. Hiyahokni hi nyonatlo hixa nwamonuwnakajyawaka seyni nyonatlo hixa himathexyawakaplu hi psokananru nuchinijyawakhi.
Hektuntshi Hiknojikolu Hehchinikanutatshri Tshinanu Piranapni
5Seyni yine wamonuwnakakatshri, hi hita tsonu hwamonuwnakaka seyni psokaklu hixa ptowrunekhi hwamonuwnakaka halikaka. Hiyáhoni xye nyonanwakaxyahi tshinanu hi hchikowahchinikanyehitanru.
6Hpoyahotlu hixolune salewnakajyawaklu wan-hixatshri.
7Seyni xawakni pnuko hixanutka. Hixa hijhalu hamtakahchinikanyehixyawaklu rumtuknu hiyrun-koxa hyoptoxyawaklu kihler-piranayma. Wane hmixkanuklunru hwamonuwle himukata himtukletanru.
8Hiyáhoni nanjithi hixa himatkajyawaklu rimatpotuxyawaklu hixa hamotlu wanepnawaka.
9Hiyáhoni wale tshinanu nyonanwakathi nyahothi nimaxyawaka ho halikaka nuykole pirana homkahitatshinhi ho hike.
10Hixa hanuruktako hektuntshi hamtakahchinikanyehixinritka hit-koxa hamtakhimtuknutanru. Klu tshinanu yineru rumtuknu namtajinri, hixa tshinanukni namtakanru rumtuknu Cristo hetanuya tshinanu.
11Rumtuknu namtakanu Satanás nma menekyapawaklexyawakanupa klu tshinanu wimatlu hanu rixa kamrureta Satanás.
Tito Tshinkaluru Hma Yoptoxyawakanu Tshinanu Hkojwakahchinikanuta Paulo Piranapni
12Trôade poktshi napkapini Cristo pirana, kihle piranalu potuko hiwekkaklewatatshri pirana nunkaklexini, netlu Tsru Hixikatshriwa Hoyakalu hali halpokoletatkalu wane hyoptoxiko nunkakle.
13Seyni hi napnanuhchinikanuta klu tshinanu hi nukchiklu Tito tshinkaluru Cristo tshinanu nmoletanru. Hiyáhoni wanna nunhamtatka waneya Macedônia tshijne nwaka nyatka.
Kayatatshinwu Cristo Tshinanu Piranapni
14Seyni nimalwutlu Hoyakalu Cristo-ymalunwu wixyawaka tshinanu kayatatshine rixkakjexyawakwu ptowru hohneruka tshinanu. Hiyrun-koxa Cristo himatyehixikolu pirana kihlephalu pixkalutni wan-rixkaklu hixaya ptowru sretako hyakaklu.
15Klu tshinanu Hoyakalu renekanwu Cristo hatatjewa kihlepha hixatshinwu hiwekkakkalune yehiya hiyrun-koxa hamhatshine yehiya.
16Yine hiwekkakkalunetka tshinanu kihlephalu pixka rixa hiweklu heneklewatatshri seyni hamhatshine tshinanupa hijpahlupha pixka rixa ruylatjerupna. Rawhe yineru xyekaka poyahokakatshri?
17Klu tshinanu hi hixolune Cristo pirana hinkakletatshine yahole pixka wixa, hkayle tsonu hichinikanretatshine pixka hi wixa. Seyni wyokanatjerni Hoyakalu hiyáhoni wunkaklewaxini mayloklene pixkalunwu, Hoyakalu hetanu halikakalutu pirana wunkakleta Cristo-yma wixle tshinanu.
Currently Selected:
2 Coríntios 2: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
