1 Tessalonicenses 5
5
Halpokoxinwa Tsru Hixikatshriwa Cristo Hapojinripa
1Seyni Jesus tshinanu nmoletanune, hike mahata nyonyehixyawakhi Tsru Hixikatshriwa Cristo hapojinri hohnepa potuko pirana.
2Klu tshinanu hixako himatpotutlu Tsru Hixikatshriwa Cristo hapojinri hohnepa katshowhuru hoyetshno hapokatshri mpohitkotuko pixka rixa hinretanu.
3Waneya wla htshinannina yinepni: “Kihle hwalerunetkawu, kihle pokolunetkawu,” waneklukawa mkahwakakanatkotu tsru nikawnalu rixkonna. Matuwhenpiratatshro tshinowle pixka rixa hapokletanu, hi satukna hasukanu.
Hislahikatshriwa Piranapni
4Seyni hixa Cristo tshinanu nmoletanune, hi mapchahawaka pixkawaka hwajetatshinhi waneklu hohnepatka hma kachixikowakanupa katshowhurune hapokyehitanune mkahwakkone pixka.
5Seyni hixa Cristo tshinanu nmoletanune ptowrunekhi katawaka yehi hwatshinetkahi hohohne hwatshinetkahi. Hi hoyetshno hwatshinetkahi. Hi mapchahawaka hwatshinetkahi.
6Hiyáhoni xye tshinanu hi himkatshine pixkalunepwu pimrine pixka seyni hiyokatshine pixkalunepwu halikaka. Kahchinikanurunepwu.
7Himkatshine hoyetshno rumkana. Himetatshine hoyetshno rimjetna.
8Seyni hixa, hohohne hwatshinwu kahchinikanurunepwu. Statshi hislahatshri pixkalutu wutakastatanu. Waleni walixle hiyrun-koxa wuchinijyawakna pimrine. Jiwtshi hinotatshri pixkalutu hsahyetanu. Waleni wkahwakachale wiwekkakjeru.
9Klu tshinanu Hoyakalu hi nuretatkalu rapnokaxyawakapwu seyni winotka wiwekkakko Wutsrukate Jesus Cristo tshinanu halikaka.
10Rupnatka hixa tshinanu hiyáhoni ho wiwejiniwa ho wupninipa hike rixa, Cristo-yma wiwekanu rapojinipa.
11Hiyáhoni hepixkakanu htserutahchinikankakanu hixjekanaxyawaka pixka.
Paulo Hiykotna Cristo Tshinanu Moletkakatshine
12Cristo tshinanu wmoletanune wanjithi himathexyawakna hix-yehi kamrurewpotuxikatshine hinotjene, hasrukjene Tsru Hixikatshriwa Cristo piranaya.
13Hkahwakpirpotutanna, hichinikanna repixikowakna tshinanu. Kihle himwachakaklephi.
14Wmoletanune Cristo tshinanu, wanjithi hiykoxyawakna mmerene. Hpoyikotahchinikanutanna mmixkohchinikanune. Hepixanna hihroka halixletatshine. Hmachiretannuhonupna ptowruneka yehiya.
15Hislahinwa hi satukna hektutu, hektutuyma hapnutanu. Seyni ptowru katako hijhapotutanru kihleruyma hepixkajyawaka hixkakluko hiyrun-koxa pimrine yehiya.
16Ptowru katako poyikolunephi.
17Hi hituk-hanjihohneretanu.
18Hpoyahnutanru Hoyakalu ptowru potuko tshinanu. Klu tshinanu xye chinikantshikni Hoyakalu himalujyahi Cristo Jesus-ya.
19Hi himaletanru Hoyakalu Hiwejikaluru.
20Hi heyikanru halikak-potuk-tokantshi hinkaklewlu.
21Hyahotanru ptowru hinkaklewlu. Kihle piranalu himrexinwa.
22Hasujinri ptowru hixatshri muhletu.
Paulo Himalujyana Tessalônica Hajene Piranapni
23Waleko Hoyakalu hihlewahchinikanrewlu wenekjeru Hoyakalu pixkalune hixkakanhi ptowru chinikantshiya. Nanjitlu Hoyakalu rinoxyawakapwu hixa psoluka wiwejinri, wihchinikanu, wimanen-koxa ptowru hikoluklu hiyrun-koxa ptowru jihyehixikoluya rapojinpotukananuko Wutsrukate Jesus Cristo.
24Htshanixjeru kamrurtshi poyahokakatshrini.
Hichiniklewlu Piranapni
25Nmoletanune Cristo tshinanu, hanjihohneyehitanwu.
26Halikkakanna ptowruneka Cristo tshinanu moletkakatshine hamluruyma Cristo hiwakaya.
27Nanjipotuthi Tsru Hixikatshriwa Hoyakalu halujyawaka tshinanu twu yonawahlo het-yonhaxyawaka ptowruneka Cristo tshinanu moletkakatshine yehi.
28Nanjitlu Wutsrukate Jesus Cristo henekachale hihlenu hixa tshinanupa.
Currently Selected:
1 Tessalonicenses 5: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
