2 Tessalonicenses 1
1
Hichiniklewlu
1Hita Paulo-no hiyrunu Silas hiyrunu Timóteo tshinkaluruyma wyonanwakathi hixa Tessalônica poktshi hajenhi Cristo halixatshine hapatjetatshinhi, Hoyakalu tshinanuya hiyrunu Tsru Hixikatshriwa Jesus tshinanuya.
2Hoyakalu henekachale hihlenu yoptotatshinephi. Hiyrun-koxa kihlehchinikanurunephi Wuru Hoyakaluya hiyrun-koxa Tsru Hixikatshriwa Jesus Cristo henekanwu.
Hoyakalu Hikolukanuwnayehixyawakapna Hektune Runinipa Cristo Piranapni
3Cristo tshinanu wmoletanune, ptowru hohnekananuko waluka poyahnutletlu Hoyakalu hixa tshinanu! Kihleru wane wixyawaka hixa halixle tshinanu, hiyrunu htseruwna halixlekananumxyawaka tshinanu hiyrun-koxa hixa ptowruneka hichinikakjexyawaka pnute hya tseruwlekananumxyawaka tshinanu.
4Hiyáhoni hixa piranyehi tshinanu wtokanuwnajeta pimrine Hoyakalu hapatjetanunekak-yehiya. Wtserutpiranathi hakotachale tshinanu hiyrunu halixle tshinanu ptowru hsalewakluya hiyrunu hsalewnaleya hiknohjereru tshinanu.
5Xye tshinanukni rimathexikowakapa halikakalutni, potukalni jihyehixikolu Hoyakalu hikolukanuwnayehjixlewle. Hiyáhoni xye ptowruka tshinanu Hoyakalu pohirewaxyawaka yehi poyahokakatshinephi. Wale tshinanu hsalewnajeta.
6Klu tshinanu Hoyakalu honra kihler-potuko rixanru. Hiyáhoni hixa saletjene salewaktshi renekanna Hoyakalu, rumlujikolupna.
7Waneya hixa kojwaklu hetjetatshinhi hixayma hapnanutanutka Tsru Hixikatshriwa Jesus hiphujewninipa tenhohne runini, htowrene hiwejikalune tenhohne hajene hixkolune rimapojinpatka.
8Runinipa tsru mero potuko rimapokanu rapnokaxyawakapna yinepni, Hoyakalu mimatyehitkane kihle piranalu potuko hiwekkaklewatatshri pirana, Wutsrukate Jesus Cristo pirana majnakowaxikatshinepni.
9Rapnokatkona, hnikatkonna hikeklu hohne mnikawnakatupni Tsru Hixikatshriwa Hoyakalu yehi hma yiywakanupna, hma mexyawakanupluna Hoyakalu hoyaknu ptowru potuko himukatatshritka.
10Rapojini hohnepa hpohitko hpotukatanuneya hiyrunu kihleru htshinko ralixjeneya. Hix-koxa wannaymalunpatkahi klu tshinanu wunkakle halixatshin-koxhi.
11Hiyáhoni wale tshinanu hi wutuk-hanjihohneyehrethi. Wanjijetlu Woyakalute xye htshanixikowaka pixka potuko halukalunephi. Hiyrun-koxa wanjijetlu Hoyakalu ptowru kihleru haluka kamhaletanru himata kamhiywakapa hiyrunu wanjijetlu halixlewlu kamrure hpoyahokakanu pixkontshiyma.
12Hiyahokni Wutsrukate Jesus Cristo hiwaka pohijexikowakapa hixa hitokoteya hiyrunu hixa himathexikowakapa Cristo-ya, Wutsrukate Hoyakalu hiyrunu Tsru Hixikatshriwa Jesus Cristo hepixleyma.
Currently Selected:
2 Tessalonicenses 1: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil