Marcos 2
2
So Jesús ỹomatec so se ra'ñiigue
(Mateo 9.1-8; Lucas 5.17-26)
1Ca co'na' ỹore'ueguelo saua na'xata', ca' so Jesús liỹa inoxonougui yi na'a' Capernaum, ca qara'xaiguelec so'maxare quiyim hueete'e ca la'a'. 2Ca cha'ma' 'xoic so lapoỹata' qomyipi, chi ỹovireta'a quiyim qaica ca ledaaqa' ñi lasom ñi 'imec. Qam so'maxare ỹa'xatetac da la'qaatec ñi qota'olec. 3Ca qanodou'a yi hueeta'ñi so Jesús so ỹale se ra'ñiigue, qane'xateta so'maxare quesaua cuatro ỹale'. 4Qam ma' saua'maxare se ishite' ỹovirera'a so Jesús, ma' ỹapaguelec so qomyipi. Ca saua'maxare naqate' so lahi na lelaq so 'imec quiyí'maq naloochi'ña so'maxare. Ca quesó'maq nauaatec, ca quiichi'ñigui nqohin só'maq ralolaxaic hueetalec so lacanec. 5Ca so Jesús co'na' iuana da lpi'ỹaxague' saua'maxare, ca 'naaco' queso ralolaxaic:
—Qami' ỹaalcolec, nagui qaỹapalaxat ná'ogue na rasauaxashichi'.
6Qam 'vio' saua ỹalequesaho quená'maq rapaxaguinataxanta'pegue na naqataxaquipi, nqa'xansañi, ra'deenataxanta'pe, 'neraco': 7“¿Chi'neco' dá'maq la'qaatec da ỹale? Ma' napaqueteguelec ñi qota'olec, ma' qaica ca ishit ỹapalaxat ca nasauaxaset, qaiñiita ñi'maxare.” 8Qam só'maq Jesús chaqa'ma' ỹa'den dá'maq la'deenataxanaxague' saua'maxare, ca 'naaco':
—¿Chi'negue ma' 'ñiita'gue dajo, da ra'deenataxanaxaguii? 9¿Negue' ca paguec se qalaq quiyim qohinac queca ralolaxaic: “Qaỹapalaxate' caua rasauaxashichichi'”, loqo'm qohinapega: “Ne'laxachirishiguim, nañireta' na qacanqui', ca' qui'”? 10Ca' nagui sachaxanalo qamiri quiyim najo ỹale llaalec 'ue lquesaxanaxa quena 'laua quiyim ỹapalaxat ca nasauaxaset.
Ca 'naapego' so se ra'ñiigue:
11—Shinapega qami' nagui, ne'laxachirishiguim, nañireta' na qacanqui', ca' quirepegue' ca ra'aachi'.
12Ca chaqa'ma' ne'laxashiguim so ralolaxaic, inanta' so lacanec. Ca' ca'e yí'maq hueeta'ñi, ca sá'ogue so qomyipi chi ra'i'tegue. Ca' quedajo, ca sá'ogue 'xoic da le'laxa. Ca' imaqachintac ñi qota'olec, 'naaco':
—Se ỹauanapega 'ue ca seuanqachigui 'nejem dajo.
So Jesús roỹaxana so Leví
(Mateo 9.9-13; Lucas 5.27-32)
13Ca co'na' ime dajo, ca' so Jesús lotqai liỹa quepegue' yi lahi aso latogot late'ogue'. Ca co'na' sá'ogue so qomyipi nqo'neu'a so'maxare, ca' ỹapaxaguin. 14Ca co'na' eec, ca iuane'ta so Leví só'maq llaalec so Alfeo. Nqa'xantañi quiyi nishiuetenaxanqa' quena qomyipi quena' qaishiueten so nashi quiyi Roma. Ca 'naapego':
—Quitegue aỹim.
Ca' so Leví ne'laxashiguim, ca' quegue.
15Ca co'na' so Jesús que'eetac quiyi la'a' so Leví. Ca 'xoico' na ỹacona'piguit ana nishiuete so nashi quiyi Roma, chaqai na sauaqhuaiquipi, nqa'xantañi, lqui'ỹaxaua so Jesús chaqai saua lapaxaguinatqa, ma' ỹaatqajam 'xoico' so qomyipi queeta'pegue' na'le so'maxare. 16Qam ná'maq rapaxaguinataxanta'pegue na naqataxaquipi chaqai na fariseoipi co'na' idaana'a so Jesús quiyim lqui'ỹaxaua sá'ogue so qomyipi, 'naaco' quesaua lapaxaguinatqa so Jesús:
—¿Chi'neco' ñí'maq ra'gaxalarii que'eeta'pegue' chaqai ne'teeta'pegue' ná'maq ỹacona'piguit ana nishiuete ñi nashi quiyi Roma chaqai na sauaqhuaiquipi?
17Ca co'na' so Jesús 'xaỹa dajo, ca 'naaco':
—Quecá'maq sqaicanqaida chaqai queca no'ueenta, ca se ỹouen ca natarenataxanaq, ta'ta'a ná'maq ralolaxaiquipi. Ma' se ñanac quiyim soỹaxana cá'maq 'maxaraic, ta'ta'a ná'maq sauaqhuaiquipi.
Qainatetac so Jesús queca llicyaxac quiyim nqopaaqachit ca qom
(Mateo 9.14-17; Lucas 5.33-39)
18'Uo' so na'xa'a co'na' nqopaaqachite' saua queesa'pegue' so Juan chaqai na queeta'pegue' na fariseoipi. Ca 'vio' saua qomi' nagrepegue' so Jesús, ca' inate' so'maxare:
—¿Chi'neco' ma' nqopaaqachit ná'maq queeta'pegue' so Juan chaqai ná'maq queeta'pegue' na fariseoipi, qam naua rapaxaguinataxahi' se nqopaaqachite'?
19Ca' so Jesús 'naaco' quesaua'maxare:
—¿Peeta'a ishit quiyim nqopaaqachit cá'maq ỹalequetau'a ca nashilaxac quiyim cá'maq huonaxaua ñaq ỹalequeta'guit ca qomyipi? Ca no'm ñaq ỹalequetaho cá'maq huonaxaua, ca' se ishit nqopaaqachit. 20Qam 'uo' ca na'xa'a quiyim qarouootaxana'gue ca'maxare, ca' quiyi, ca' nqopaaqachit.
21Ma' qaica cá'maq ishit napalaten ca nooỹac leteraxaic quiyim rapalatenaxana ca dalaxaic hualoq lahi. Ma' cá'maq dalaxaic ma' cata', ca paguec nqo'naxatec cá'maq lasectaxa. 22Chaqai qaica ca ishit iỹoxogui aca isecỹac loshicmaxa leteraxai queca dalaxaic lataxa. Ma' cá'maq dalaxaic lataxa ỹachipiaxata'gue ca loshicmaxa, ca na'lerañi cauá'maq loshicmaxa chaqai ca lataxa. Ca vichiguiño' quiyim qaỹocoriñi ca dalaxaic lataxa, ca qaỹocori'ñigui aca dalaxai loshicmaxa.
Saua lapaxaguinatqa so Jesús no'tequesa'ña ana trigo la queso na'xa'a co'mataxaqui
(Mateo 12.1-8; Lucas 6.1-5)
23Ca 'uo' so na'xa'a co'mataxaqui, ca' so Jesús queetalec so nanaxanqa', ca' saua lapaxaguinatqa so'maxare no'tequesa'ña ana trigo la. 24Ca' so fariseoipi 'naaco' queso'maxare:
—'Ajñi', ¿chi'negue ma' ỹo'ueete' nauá'maq rapaxaguinataxahi' dá'maq se qaỹo'uet quiyi na'xa'a co'mataxaqui?
25Qam so Jesús 'naaco' quesaua'maxare:
—¿Se ỹauano' quen taxahilec qamiri dá'maq 'neeto' na'le so nashi David co'na' so'maxare chaqai saua nauegaxaua' 'ue da louenaxanqa' chaqai qopate'? 26Co'na' so David inoxonougui ñi lauo' ñi qota'olec co'na' so Abiatar ñaq lashi na letaxaỹaxanqajanqaipi na qomyipi quena' qaretaxaỹa'pegue' ñi qota'a. Ca ỹa'gue' saua paañi' mashic shi'gue qoỹaanoto ñi qota'a, só'maq qainaata na netaxaỹaxanqajanqaipi ishit ỹa'ic, chaqai nouanta'to sauá'maq nauegaxaua'.
27So Jesús 'naaco' qai'neeta quesaua'maxare:
—Na' qaỹo'uet so na'xa'a co'mataxaqui, qaỹauaaque nco'mataxaqui na qom, qam mesqaiyi yí'maq na'xa'a co'mataxaqui yí'maq 'em qaỹo'uet na qom. 28Vichiguiño' najo ỹale llaalec 'ue da lquesaxanaxa quiyim 'ue ca relaataxanlec quiyi na'xa'a co'mataxaqui.
Currently Selected:
Marcos 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.