Rɔmu minin 12

Tɔ wɔ ǹ gɔn laanka dí nya Lawa-n boo

1Dɔɔ̃nɔn lɛn, man ka nyankoe, Lawa a makara-doɛ̃ a lɛa, ka ka dinin kɔ Lawa la, *wúlu màn yiikoonaan lɛa, wúlu mànan mɛnɛn bɛ́ koa nɛ a din ni, ǹ nə́ kɔɔ̃n a ganaa. Bɛ lɛ n die goɛ̃ kaa Lawa guguru kɔ ǹ gɔn sonbore lɛa. 2Ka baran tɔ wɔ, a kɔnpɛ ka kanaa minin sii zɛnaan nɛ wa. Ka toa Lawa ka bɔyaa, a yiri dii kɔ ka la, màn mɛn bɛ́ toɛ, ka Lawa dùũ sii dɔ̃, bɛ giala mà sii bǐɛ̃, sii mɛn bɛ́ kɔɔ̃n a ganaa, sii mɛn lɛ piɛ̃ bɛ́ nɛ.

Dí nya ka Lawa a bǐɛ̃baa ǹ mànan nɛ boo

3Lawa din na á dí kɛ lɛ kɔ ma la, ka a din a bǐɛ̃baa barka nɛ. Bɛ lɛ tɔ ganaa, man pii ka tumaa nɛ, máa min kɔ́n baran taasiɛ wɔ, a n din da bǎã gole-n wa. Sɛnɛ, didie din boɛɛn kɔ ǹ taasiɛ wɔ a din wɔ gɔn la, Lawa goleemali pàã lɛ mɛn kɔ la, a kɔnpɛ ka bɛ nɛ.

4 # KOR1 12.12. Ka ga minbuiin gɔ̀nɔn ganaa. A gùn man mɔnaa nɛ, ǹ tumaa dɔ bie dí goon nyɛɛ wa, sɛnɛ, gɔ̀nɔn goon toto ne. 5Bɛa yɔrɔ kɛ lɛ la, wɔsɛn mɛnɛn bɛ́ gigiã, wɔa kaa kun ka Krita-n lɛ a lɛa nɛ, wɔ á gɔ̀nɔn goon lɛa. Wɔ tumaa n doa-n kɔn ganaa ka min gùn bɛ́ lɔn. 6#KOR1 12.4-11. Lawa bɛ́ á bǐɛ̃baa ǹ màn tɔtɔ kɔ wɔ la, á kɔnpɛ a din a bǐɛ̃ kɛ nɛ, wɔ doamaa nɛ wɔ dí nya ǹ nɛ. Bɛ̀ Lawa a boo gii diɛ na á n kɔ min mɛn la, ǹ dɛnaa doamaa nɛ a zɛnaa, a kɔnpɛ ka a golee Lawa li ni. 7Bɛ̀ dí yɔrɔ bɔ na á n kɔ min mɛn la, a dɔ dí yɔrɔ bɔ. Bɛ̀ minin daraa na á n kɔ min mɛn la, bɛ dɔ minin daraa. 8Bɛ̀ minin foo taã n min mɛn wɔ lɛa, bɛ dɔ minin foo taã. Bɛ̀ Lawa wɔ gii bɔ n min mɛn wɔ lɛa, bɛ dɔ bɛ zɛnaa ka foo sonbore ne. Bɛ̀ min mɛn dɔ n minin nyɛɛnaan boe, bɛa dɛnaa dɔ bɛ zɛnaa sɔnbɔraanɛ. Bɛ̀ min mɛn dɔ n doobaan goe màn nɛ, a zɛnaa ka foo kɔɔ̃n nɛ.

Kɔn narɛ ǹ gɔn

9Ka toa kaa kɔn-narɛɛ goã kɔn-narɛɛ taãn lɛa, a baran goã bɔlɔ papaa pɛ ǹ kɔn-narɛɛ lɛa wa. Ka baraabaa toa walan, ka ga bǐɛ̃ zɛnaa li parsiini. 10Ka kɔn narɛ ka Lawa a minin bɛ́ zɛnɛɛ lɔn dɔɔ̃nbaa gɔ́ɔ̃ nɛ. Ka n zɔɔ̃ kɔn ka kɔn guguru kɔ nɛ. 11Ka n doa, ka baran yoo baa wa. Ka n we yii ka dí nya Dɛnaa nɛ. 12Ka n nyɛnyɛɛ kaa foo-doa kɛ a lɛa. Ka n doa ka fuu si ka ganaa. Ka Lawa nyankɔ ka baran nɔmaa wa. 13Ka n doa ka Lawa-nyankɔlen laadoo bǐɛ̃ kɔ, ka tiin kũ doɛ̃ sɔnbɔraanɛ.

14 # MAT 5.44; LUK 6.28. Min mɛnɛn bɛ́ boe ka yii ni, ka Lawa nyankɔ bɛn lɛa, mà Lawa bǐɛ̃ zɛnaa ǹ nɛ. Ka Lawa nyankɔ ǹ lɛa, ka baran dì bíi ǹ li wa. 15Ka n nyɛnyɛɛ kun ka nyɛnyɛɛ wolen ne, ka wuu pɛ kun ka wuu-pɛlen ne. 16#SUU 3.7. Ka toa ka kɔn wɔ ma doɛ̃, ka bɔlɔ goã goon. Ka baran n taasɛ din gole kɔ ǹ siin ganaa wa, ka lɛ kɔ din boɛɛn kɔ ǹ dín ganaa. Ka baran ga ka dinin ganaa màn-dɔ̃lin lɛa wa.

17Bɛ̀ min sii baraa zɛnaa ka nɛ, ka baran a dòo saraa ka sii baraa-n wa. Ka ga sii bǐɛ̃ zɛnaa li min din tumaa yɔrɔ-a. 18Bɛ̀ á boe la a n zɛnaa, bɛ̀ a bɔ ka dinin li wa, ka n doa là nyantoro goã ka bii ka min tumaa nɛ. 19#TDP 32.35. Ma dɔɔ̃nɔn lɛn, ka dinin baran kaa gɛ̀ dòo bɔ wa, sɛnɛ, ka toa Lawa bɔ, a giala, a tá kiɛ̃ nɛ: «Masɛ din nə gɛ̀ dòo boe, masɛ din nə dòo sarɛɛ. Dɛnaa a da ǹ boo ne.» 20#SUU 25.21-22. Lawa a boo n pii dɔn: «Bɛ̀ bòo tá n zɔ́ɔ ganaa, màn kɔ la a bii, bɛ̀ mu boro tá a ganaa, mu kɔ la a mi. A giala, bɛ̀ n tá zɛnɛɛ miɛ̃, a n goon ka ma n sìi diɛ a ganaa!» 21N baran toa sii baraa boo n la wa, sɛnɛ, sii baraa naa ka sii bǐɛ̃ nɛ.

Currently Selected:

Rɔmu minin 12: SCE2013

Highlight

Copy