Rɔmu minin 11
11
Lawa Izirayeli tɔrɔ daa wa
1 #
FILI 3.5. Man nɔ̀n diɛ kəni: Lawa na á ná a din a tɔrɔ kɛ daa? Haayii dɛ! A giala, ma dinmaa lɛ n Izirayeli min lɛa, Abrahamu a nɔ̀ɔn nə ma nɛ, man Bɛnzamɛn tɔrɔ lɛa. 2Lawa din saa lɛlɛ a ná a tɔrɔ mɛn bɔ ke, a bɛ daa wa dɛ. Yilii bɛ́ wuu pii Lawa ganaa Izirayeli a lɛa bǎã mɛn nɛ, Lawa a boo á màn mɛn pii walan, ka n yiri gisĩ bɛ nɛ. 3#KIIN1 19.10,14. Yilii mà Dɛnaa ganaa: «Ǹ nə́ n boo gii-dalin dɛ, ǹ nə́ n wúlu bɔ ǹ bǎãn ziziɛ̃. Masɛ dinsɔɔ̃ n má goã, maǹ giɛ li ǹ tá masɛ dɔ nyin boe.»
4 #
KIIN1 19.18. Sɛnɛ, Lawa na á pɛ nɛ mà wàa? Mà asɛ min duu sɔbaa (7 000) bɔ, á ǹ koa a wɔn lɛa, ǹ kɔ́n ná a tɔn nə n musin kuruməə tán *Baali dì kɛ yɔrɔ-a wa. 5Bɛa yɔrɔ goon kɛ lɛ la, haalɛ ka pelo yii ni, Izirayeli min gialakun boɛɛn tan, Lawa din bɔ á kɔnpɛ a din a bǐɛ̃baa kɛ nɛ. 6Lawa na á ǹ bɔ a din a bǐɛ̃baa a lɛa, ǹ nya ǹ dí a lɛa bie wa. Bɛ̀ ǹ nya ǹ dí a lɛa nɛ, bɛ̀ Lawa a bǐɛ̃ lɛ ba n bíi doo mà bǐɛ̃ wa.
7Wɔ n die pii mà wàa kəni? Izirayeli tɔrɔ lɛ bɛ́ á goã giɛ màn mɛn li, a bɛ yɛ wa. Lawa din boɛɛn mɛn bɔ, bɛn nə́ yɛ, gialakunun kɛn sɛn nə boo la, ǹ ná a giala ma wa. 8#TDP 29.4; IZA 29.10. A na á n pɛ Lawa a boo ne, bɛa gialakunun kɛn lɛn wɔ gɔn la: «Lawa toa ǹ yiri tã. Haalɛ a da kaa pelo lɛ, maǹ giɛ, sɛnɛ, ǹ yii a wɔlɔ yii wa, manə n too koe, sɛnɛ, ǹ too a boo miɛ wa.» 9#LOE 69.23-24. Kii Davida dɔ́ pɛ:
«Ǹ dinin zɔ́n màn-biin die
ǹ nə ǹ kũ ka kan bɛ́ lɔn,
a die a ǹ mɛnaa ǹ gòã baa,
a die a dɔlɔ baa ǹ mìi ni.
10 Ǹ yii die a tii
ká a baran wɔlɔ yɛ dinin wa,
Lawa die
a bɛ̀rɛbaa ǹ nɔmaa da ǹ mìi ni
yǎa duduu.»
Bɔ din gole kɔ wɔlɔ li boo
11Man nɔ̀n diɛ kəni: Zuifun sã lɛ na á ǹ papaã baa duduu ya? Haayii dɛ! Sɛnɛ, ǹ sã lɛ a lɛa nɛ, kirisibaa mɛn bɛ́ ǹ wɔ lɛa, tɔrɔ kɔsɔn kɛn nə́ bɛ yɛ, màn mɛn bɛ́ toɛ, Zuifun foo wuu pɛ ǹ li. 12Zuifun bɛ́ ǹ nə́ sii baraa zɛnaa, sii sonbore gigiã dɔ kanaa din tumaa ganaa. Zuifun zaman boɛɛn kooro na á kirisibaa, sɛnɛ, bɛa sii sonboren kɛn lɛn nə́ dɔ tɔrɔ kɔsɔn min gigiã gigiã ganaa. Bɛ̀ Izirayeli tumaa daa Yezu *Krita dɔ̃ ǹ mɛn waáraa, sii sonboren mɛnɛn bɛ́ re boe bɛ nɛ, ǹ dɔ kanaa ganaa, bɛn ba re mɔnɛɛ ǹ la yii-n wa?
13Kasɛn mɛnɛn bɛ́ ka a Zuifun lɛa wa, man kɔn kasɛn nɛ sisia. Lawa na á masɛ bɔ, á ma dia tɔrɔ kɔsɔn la, mà ma a din a boo kɛ pɛ. Bɛ lɛ nɛ, ma tá n nyɛnyɛɛ bɛa dí lɛ a nyɛɛ gɔ́ɔ̃ nɛ, 14ta bɛ á re ma din tɔrɔ minin Zuifun kɛn lɛn foo busi, a gialakunun kirisibaa ǹ gòã baa. 15Sonbore, ǹ da para li kio ne, kanaa bii kɔɔ̃n kɔ kɔn ka Lawa nɛ. Bɛ̀ Lawa wusoo á n yɔrɔ da ǹ la, wàa n die n zɛnɛɛ kəni? A n die n biɛ ka min a yii kaa a bɔ geren bii bɛ́ lɔn!
16Bɛ̀ n wii dii bibinaa kɔ Lawa la, ma nə́ n ná a gialakun kɛ tumaa dɔ kɔ la. Bɛ̀ da gòonən nə́ n kɔ Lawa la, da lɛ a gùrùn dɔn man nə́ n kɔ la. 17Izirayeli tɔrɔ lɛ n kɔnboe ka *olivie da kɔ́n nɛ min zumu, a ná a gùrùn tɛnɛn kuru. Nsɛ mɛn bɛ́, n ba Zuifu lɛa wa, man kɔnboe ka don a olivie da gùrù ni, ǹ nə́ kuru, ǹ nə́ daa wɔ gùrù taãnan lɛn bǎã nɛ. Ǹ olivie da mɛn zumu lɛn, bɛ lɛ gòonən manə n dɔ toe sisia.
18Bɛ lɛ taman yii, n baran n din koa gùrù kurii wolen lɛn ganaa wa. N din koa ǹ paǹ din nə maa bɔrɔ? Nsɛ bɛ́ n bie da lɛ gòonən guĩ wa, da lɛ gòonən manə nsɛ guĩ. 19Táa ma n die pii: «Maǹ nə gùrùn kɛn lɛn kuru, màn mɛn bɛ́ toɛ, ǹ masɛ wɔ ǹ bǎã nɛ!» 20Sonbore ne. Maǹ nə́ ǹ kuru a giala, ǹ golee Lawa li wa. Nsɛ dɔ n doa nɛ, golee Lawa li barka nɛ. N baran toa din gole kɔ wɔ n foo-n wa. Sɛnɛ, nyɛ́ɛ baa Lawa nɛ. 21A giala, Zuifun mɛnɛn bɛ́ kɔnboe ka da lɛ a gùrù taãnan nɛ, bɛ̀ Lawa bɛn sã toa wa, a n die nsɛ wɔ toɛ lɔn?
22N yiri kɔ sii màn paa kɛ li: Lawa a bǐɛ̃baa kɛ laanka a kakaarɛbaa kɛ nɛ. A n kakaarɛ a piãman wolen ganaa, a n bǐɛ̃ zɛnɛɛ nsɛ dɔ nɛ. Sɛnɛ, yǎa n goɛ̃ bɛa bǐɛ̃ kɛ lɛ nɛ, bɛ bie wa, á re n dɔ kuri a n daa. 23Bɛ̀ Zuifun lɛn dɔn nə́ wusoo ǹ goleemalibaã kɛ kio, Lawa á re wusii a ǹ wɔ da giala lɛ ganaa, a giala, bɛa pàã tá Lawa lon. 24Sonbore, nsɛ tɔrɔ kɔsɔ kɛ lɛ, nsɛ nə n goã don a olivie da gùrù lɛa. N lɛ-mui sii bɛ́ a bie ka sii mɛn nɛ wa, bɛ na á n zɛnaa n nɛ. Maǹ nə́ n bɔ n bǎã nɛ, ǹ nə́ daa n wɔ olivie da taãn ganaa. Sanparɛ Zuifun mɛnɛn dinin bɛ́, ǹ nə́ goã olivie da taãn kɛ a gùrù taãn-taãnan lɛa, bɛ̀ ǹ tá wusii bɛn woe ǹ bǎã zizin ni, bɛa re naanaa koe a la yii-n wa?
Izirayeli minin tumaa a kirisibaa
25Ma dɔɔ̃nɔn lɛn, man giɛ li ma sii-durii goon nyaa ka nɛ, màn mɛn bɛ́ toɛ, ka baran ka dinin baa sii-dɔ̃lin lɛa wa. Sonbore ne, Zuifun gigiã yiri tã, ǹ ba boe la ǹ tá màn kɔ́n giala miɛ wa. Sɛnɛ, bɛa re beleboe wa. A n die goɛ̃ miɛ̃, yǎa Lawa din a bíi wolen kɛn tumaa tɔrɔn kɔsɔn bii, bɛn nə die a ganaa ǹ nyɛɛ. 26#IZA 59.20-21. Bɛa yɔrɔ kɛ lɛ la, Izirayeli minin dɔn tumaa á re kirisibiɛ, ká a bɛ́ á n kiɛ̃ lɔn:
«Nyin-sili lɛ n die boe
*Siɔn kele la Zeruzalɛmu kiwi,
a n die Zakɔba tɔrɔ minin kɛn
Lawa bɔlɔ-tii nyɛɛ.
27 #
ZER 31.33-34. Bɛ̀ má ǹ sii baraan nya ǹ mɛn waáraa,
bɛ lɛ n die lɛ kɔ kɔn la biɛ
masɛ laanka ǹsɛn bii ni.»
28Ǹ piã ka Lawa a boo tii kɔɔ̃n kɛ lɛ taman yii ni, Zuifun tá Lawa a zɔ́ɔn lɛa. Bɛ na á n zɛnaa kasɛn tɔrɔ kɔsɔn kɛn bǐɛ̃ a lɛa. Sɛnɛ, Lawa din a minin bɔ kɛ wɔ gɔn la, Lawa tá ǹ narɛ ǹ digolon lɛ-a. 29A giala, bɛ̀ Lawa màn kɔ, a na á kɔ, bɛ̀ á min dɔ bíi, a na á bíi, a ba wusii a sii zɛnaa kio wa. 30Kasɛn tɔrɔ kɔsɔn kɛn lɛn, lɛlɛ ká goã ká Lawa bɔlɔ tii. Sɛnɛ kanna, Zuifun Lawa bɔlɔ-tii taman yii, Lawa makara bɔ ka ganaa. 31A n die n zɛnɛɛ bɛa yɔrɔ kɛ lɛ la Zuifun lɛn dɔn manɛ. A laanɛ ǹ tá Lawa bɔlɔ tii wolen lɛa kanna ke, ǹ kɔ́n pinaa Lawa á re makara boe ǹ dɔn ganaa. 32Lawa na á min din tumaa baa ka kòso nɛn bɛ́ lɔn, ǹ bɔlɔ-tii a lɛa. A na á bɛ zɛnaa, màn mɛn bɛ́ toɛ, a makara bɔ min tumaa ganaa.
Min a Lawa a taasiɛn giala ma baã
33 #
IZA 55.8. Lawa a bǐɛ̃ lɛ á gole á la yii ni!
A sii-doɛ̃ dɔ á zuzulu á la yii ni!
Min kɔ́n ba boe la a na a kiri kɛ giala ma wa,
min kɔ́n ba boe la a na a makara kɛ dɔ giala ma wa.
34 #
IZA 40.13. Ká a bɛ́ á n pɛ Lawa a boo-n lɔn:
«Die n boe la a Lawa a taasiɛ dɔ̃ sonbore?
Die n yiri koe la? Min kɔ́n!»
35 #
ZƆB 41.11. Hinlaa «Die ne,
mà asɛ na á màn kɔ Lawa la lɛlɛ,
sɛnɛ, mà a ná a tɔn bɛ dòo saraa asɛ la wa?
Min kɔ́n!»
36 #
KOR1 8.6. A giala, màn tumaa n boe a din ni,
a tumaa na a tan a din barka nɛ,
a tumaa na a tan a din a lɛa.
Lawa die a goã guguru miɛ̃ yǎa duduu.
A n miɛ̃!
Currently Selected:
Rɔmu minin 11: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
