Números 6
6
Señor Diospaq sapaqchasqa kaq runakunapaq leykunamanta
1Señor Diosmi Moisesta khaynata niran:
2Israelpa miraynin runakunata nimuy: Qaripas otaq warmipas *nazareo nisqa votota ruwaspa, noqa Señor Diosta serviwananpaq prometekunqa chayqa, 3aman vinotaqa nitaq mach'anapaq poqosqa kaqkunatapas tomanqachu. Hinaspapas chay runaqa aman *vinagretaqa nitaq mach'anapaq kaqkunatapas tomanqachu. Saynallataqmi chay runaqa ama tomanqachu uvasmanta q'erwasqa jugotapas; nitaqmi mikhunqachu uvastapas nitaq uvasmanta pasastapas. 4Chay runaqa noqa Señor Diosta serviwananpaq prometekusqan tiempo cumplikunankaman ama mikhunqachu uvasmanta ruwasqa ima mikhunatapas nitaq uvaspa rurunmanta otaq qaranmanta ima ruwasqakunatapas.
5Hinaspapas chay runaqa noqa Señor Diosta serviwananpaq prometekusqan tiempo cumplikunankaman, ama chukchantaqa rutuchikunqachu. Aswanmi payqa chukchanta wiñachikullanqa, noqa Señor Diospaq sapaqchasqa kasqanrayku. 6Hinaspapas chay runaqa noqa Señor Diosta serviwananpaq prometekusqan tiempo cumplikunankaman, ama wañusqa runamanpas ashuykunqachu. 7Tayta-mamanña otaq wawqenña otaq hermananña wañuruqtinpas, amapunin ashuykunqachu, saynapi ama qenlli *impuro qepananpaq. Payqa noqa Señor Diospaq sapaqchasqa kasqanraykun señalta umanpi apan. 8Payqa noqa Señor Diosta serviwananpaq prometekusqan tiempo cumplikunankaman ch'uya kanan.
9Sichus pipas qonqayllamanta paypa ladonpi wañurunqa chayqa, Señor Diospaq sapaqchasqa kaq runapa chukchanqa qenllin qepanqa. Chaymi payqa qanchis p'unchaw ch'uyanchakunan. Chay qanchis p'unchaw cumplirukuqtintaqmi, chukchanta rutuchikunqa. 10Pusaq kaq p'unchawpitaqmi ishkay palomakunata otaq ishkay kullkukunata apamunqa. Hinaspan *tabernáculo templopa punkunpi *sacerdoteman entreganqa. 11Hinaqtinmi sacerdoteqa huknin kaq palomata ofrecewanqa, chay runa qenlli impuro kasqanmanta ch'uyanchasqa kananpaq. Huknin kaq palomatañataqmi sacrificio ofrendapi lliwta k'ananqa. Saynapin chay runaqa wañuq runapa cuerponpa ladonpi kasqanmanta ch'uyanchasqa kanqa. Chay p'unchawllapitaqmi chay runaqa chukchanta kaqmanta ch'uyanchanqa, 12noqa Señor Diospaq kaqmanta sapaqchasqa kananpaq. Hinaspan apamuwanqa huk watayoq corderota, noqa Señor Diosman ofrecewananpaq, saynapi culpan perdonasqa kananpaq. Ichaqa manañan yupasqachu kanqa serviwananpaq nazareo votota ruwasqan ñawpaq p'unchawkunaqa, qenlli impuro kasqanrayku.
13Chay nazareo votota ruwaq runaqa noqa Señor Diosta serviwananpaq prometekusqan tiempo cumplirukuqtinmi, kay kamachikuyman hina ruwanqa: Payqa tabernáculo templopa punkunmanmi hamunqa. 14Hinaspan noqa Señor Diosman ofrecewanqa huk watayoq corderota, lliw k'anasqa ofrenda kananpaq. Saynallataqmi ofrecewanqa huk watayoq ovejata, huchan perdonasqa kananpaq hinallataq huk carnerotapas, noqawan hawkalla kawsananpaq. Chay presentawasqan animalkunaqa mana defectoyoq sanon kanan. 15Saynallataqmi payqa ofrecewallanqataq kaykunatapas: Huk canastapi mana levadurayoq t'antata hinallataq mana levadurayoq galletastapas aceitewan llusisqata. Chaykunaqa aceitewan chapusqan fino harinamanta ruwasqa kanan. Hinaspapas chaykunataqa kawsay ofrendakunatawan hinallataq vinotawan kushkatan ofrecemuwanqa.
16Chaymantan sacerdoteqa noqa Señor Diosman ofrecemuwanqa hucha perdonasqa kananpaq sacrificio ofrendata hinallataq lliw k'anasqa kananpaq sacrificio ofrendatapas. 17Hinaspapas ofrecemuwallanqataqmi noqawan hawkalla kawsanapaq carnerotapas. Chaykunataqa ofrecemuwanqa canastapi mana levadurayoq t'antatawan, kawsay ofrendatawan hinallataq vinotawan kushkatan.
18Chaymantan noqa Señor Diosta serviwananpaq prometekuq runaqa tabernáculo templopa punkunpi chukchanta rutukunqa. Hinaspan chay chukchantaqa wikapaykunqa noqawan hawkalla kawsanankupaq ofrecewasqanku ofrendata ruphaq ninaman. 19Chaymantan sacerdoteqa canastamanta mana levadurayoq huk t'antata hinallataq mana levadurayoq huk galletastawan oqarispa hinallataq sacrificio ofrendapi ofrecesqanku carneropa chayasqa piernantawan kushkata chay runaman qonqa. 20Chaymantañataqmi sacerdoteqa ishkay kinsa kutita altoman oqarispa, noqa Señor Diosman presentamuwanqa. Tukuy kaykunaqa anchapas ch'uyan. Chayraykun sacerdoteman pertenecen chay ofrecesqanku animalpa pechonpas hinallataq piernanpas. Chaymantañan noqata serviwananpaq prometekuq runaqa vinota tomanqa.
21Kay kamachikuy leykunaqa nazareo votota ruwaspa ofrendata ofrecekuq runapaqmi kanqa. Payqa chay ofrendatan noqa Señor Diosman presentamuwanqa. Hinaspapas payqa presentallawanqataqmi huk ofrendatapas atisqanman hina. Saynapin chay nazareo runaqa chay leykunaman hina prometekusqanta cumplinan, nispa.
Runakunapaq sacerdotekuna Diosmanta mañakusqanmanta
22Señor Diosmi Moisesta khaynata niran:
23—Aaronta hinallataq wawankunatawan niy, Israelpa miraynin runakunata khaynata bendecinankupaq:
24“Señor Diosmi qankunataqa bendecisunkichis; hinallataq waqaychasunkichis.
25Señor Diosyá qankunataqa allinta qawarisunkichis; hinallataq khuyapayasunkichis ima.
26Señor Diosyá qankunataqa khuyakuspa tukuy imapi yanapasunkichis; hinallataq hawkayaypi ima kawsachisunkichispas”, nispa.
27Saynatan Aaronqa wawankunapiwan Israelpa miraynin runakunaman noqa Señor Diospa sutiyta willanqaku. Hinaqtinmi noqaqa Israelpa miraynin runakunata bendecisaq, nispa.
Currently Selected:
Números 6: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
