Números 5
5
Qenlli impuro runakunata campamentomanta hawaman lloqsichisqankumanta
1Señor Diosmi Moisesta khaynata niran:
2—Israelpa miraynin runakunata kamachiy, khayna clase runakunata campamentomanta qarqonankupaq: *Lepra hina onqoyniyoq kaq runakunata, qari kayninmanta q'eya lloqsimuq runakunata hinallataq wañusqapa cuerponta tupaykusqankurayku qenlli qepaq runakunatapas. 3Paykunataqa qariña otaq warmiña kaqtinpas, qenlli kasqankuraykun campamentomanta hawaman qarqonkichis. Saynapin qankuna ukhupi tiyasqay campamentoqa mana qenllichasqachu kanqa, nispa.
4Hinaqtinmi Israelpa miraynin runakunaqa Moisesman Señor Diospa kamachisqanman hina, sayna qenlli kaq runakunata llapallanta campamentomanta hawaman qarqoranku.
Runamasinpa contranpi mana allinkunata ruwaq runakunapaq leykunamanta
5Señor Diosmi Moisesta khaynata niran:
6—Israelpa miraynin runakunata nimuy: Sichus mayqen kaq qaripas otaq warmipas runamasinpa contranpi ima mana allintapas ruwanqa chayqa, chay runaqa noqa Señor Diospa contraypin huchallikushan. Chayraykun payqa culpayoq kanqa. 7Hinaspapas chay runaqa huchanta willakuspan runamasinpa contranpi mana allinkuna ruwasqanmanta lliwta chay runamasinman pagapunqa, pishqa kaq partemanta huknin kaq parteta yapaykuspa. 8Ichaqa sichus chay daño ruwasqa runa wañukapunqaña, saynallataq mana ni pi familianpas kanqachu chay pagota chashkinanpaq chayqa, chay dañota ruwaq runaqa pagapunanpaq t'aqasqantan *sacerdoteman qonqa, saynapi noqa Señor Diospaq kananpaq. Chaytaqa entreganqa hucha perdonanapaq kaq carnerotawan kushkatan. Hinaspan noqa Señor Diosman sacerdote ofrecewanqa, saynapi chay huchallikuq runapa huchankuna perdonasqa kananpaq.
9Israelpa miraynin runakunapa sapaqchasqanku ofrendataqa sacerdotemanmi entreganqaku, ima ofrendaña kaqtinpas. Hinaspapas chay ofrendakunaqa sacerdotepaqmi kanqa. 10Noqa Señor Diospaq sapaqchasqa ofrendakunaqa sacerdotemanmi entregasqa kanqa. Hinaspapas chay ofrendakunaqa sacerdotepaqmi kanqa, nispa.
Celosanakuq runakunapaq leykunamanta
11Señor Diosmi Moisesta khaynata niran:
12—Israelpa miraynin runakunata khaynata nimuy: Sichus huk warmi casada kashaspa, waqllikunqa 13qosanpa mana yachasqallan huk qariwan, ichaqa qosantaq chay warminpa huchallikusqanta mana yachanqachu, warmin upallalla kaspa pakasqanrayku, saynallataq chay warminpa huchallikusqanmanta mana testigopas kanqachu chayqa, 14qosanmi chay warmintaqa celosanman, waqllikusqanta sospechaspa; hinaspapas celosanmanmi chay warmi mana waqllikushaqtinpas yanqamanta sospechaspa, 15saynata sospechaspaqa warmintan *sacerdoteman pusanqa, cebadamanta ruwasqa ishkay kilo harinata apayukuspa. Ichaqa chay harinamanqa aman aceitewanqa hich'aykunqachu; nitaqmi inciensotapas churanqachu, chay ofrendaqa huchallikunchus icha manachus chayta yachananpaq kasqanrayku.
16Hinaqtinmi sacerdoteqa chay warmita Señor Diospa ñawpaqninman pusanqa. 17Chaymantan sacerdoteqa Señor Diospaq sapaqchasqa ch'uya unuta wisinqa allpamanta ruwasqa vasopi. Hinaspan *tabernáculo templopa pampanmanta allpata oqarispa, chay vasopi kaq unuman polvoykunqa. 18Hinaspan chay warmitaqa Señor Diospa ñawpaqninpi sayaykachispa, umanpi kaq *velota orqonqa chukchan alayri kananpaq. Chaymantan sacerdoteqa chay warmiman hap'iykachinqa yuyarinapaq kaq celosrayku ofrendata. Ichaqa sacerdoteñataqmi makinpi hap'inqa allpamanta vasopi maldicionpaq kaq qatqe unuta. 19Hinaspan sacerdoteqa chay warmita juramentachispa khaynata ninqa: “Sichus qan huk qariwan mana waqllikurankichu nitaq qosaykitapas engañarankichu nitaq piwanpas millay qenlli huchata ruwaspa huchallikurankichu chayqa, maldicionpaq kaq qatqe unuta tomaqtiykin, mana ni imapas pasasunkichu, mana huchayoq inocente warmi kasqaykirayku. 20Ichaqa sichus qosaykita engañaranki; hinallataq waqllikuspa huk qariwan puñukuranki millay qenlli huchakunata ruwaspayki chayqa, 21Señor Diosmi maldecisunki. Hinaspan llaqtayki ukhupi runakunapas lliw yachanqaku maldecisqa kasqaykita. Hinaspan mana wawayoq qolluri warmi kapunki. Wiksaykipas punkipakunqan. 22Saynaqa kay maldicionpaq kaq qatqe unuta tomaqtiykin ñak'ariy qanman chayamusunki. Chaymi mana wawayoq qolluri warmi kapunki. Saynallataqmi wiksaykipas punkipakunqa”, nispa.
Hinaqtinmi chay warmiqa ninqa: “Nisqaykiman hinayá ruwasqa kachun”, nispa.
23Hinaqtinmi sacerdoteqa chay maldicionkunata huk libropi escribinqa. Hinaspan chay escribisqanta qatqe unuwan mayllispa borranqa. 24Chaymantan sacerdoteqa chay warmiman tomachinqa chay qatqe unuta, saynapi wiksanpi qatqenanpaq. 25Chaymantan sacerdoteqa chay warmipa makinmanta chashkinqa celosrayku cosecha kawsay ofrendata. Hinaspan chay ofrendataqa ishkay kinsa kutita altoman oqarispa, noqa Señor Diosman presentamuwanqa. Chaymantan chay ofrendataqa *altar pataman churanqa. 26Hinaspan sacerdoteqa chay celosrayku cosecha kawsay ofrendamanta huk hapt'ayta oqarispa, altar pataman churaykuspa k'ananqa. Chay ofrendaqa yuyarinapaq ofrendan. Chaymantan sacerdoteqa qatqe unuta chay warmiman tomachinqa. 27Sichus cheqaqtapuni chay warmi waqllikuspa, qosanta engañaran chayqa, maldicionta apamuq qatqe unu tomasqanmi chay warmipa wiksan ukhupi qatqenqa. Hinaspan wiksanpas punkipakunqa. Saynallataqmi chay warmiqa mana wawayoq qolluri kapunqa. Chayraykun chay warmiqa llaqtanpi maldicisqa kanqa. 28Ichaqa sichus chay warmi mana waqllikuranchu chayqa, chay warmitaqa manan imapas pasanqachu, mana huchallikusqanrayku. Hinaspapas chay warmiqa manan qollurichu qepanqa; aswanmi wawayoqkuna kanqa.
29Kaymi celosmanta kamachisqay leykunaqa: Sichus mayqen kaq warmipas qosanta engañaspa waqllikuy huchata ruwanqa, 30otaq chay warmipa qosanpas sospechaspa yanqamanta warminta celosakunqa chayqa, qosanmi chay warmitaqa sacerdoteman pusamunqa. Hinaqtintinmi sacerdoteñataq noqa Señor Diospa ñawpaqniypi sayachispa, kamachisqay leykunaman hina ruwanqa. 31Saynapin chay warmipa qosanqa mana huchachasqachu kanqa. Ichaqa sichus chay warmi waqllikuspa qosanta engañaran chayqa, chay warmiqa huchallikusqanraykun castigasqa kanqa, nispa.
Currently Selected:
Números 5: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
