Números 4
4
Leviypa wawan Coatpa miraynin runakunapa llank'anankumanta
1Señor Diosmi Moisesta hinallataq Aarontawan khaynata niran:
2—Leviypa wawan Coatpa miraynin runakunata censaspa yupaychis familiankuman hina hinallataq chay familiakunapa mirayninkuman hina. 3Chay censopiqa yupankichis llapallan qarikunatan kinsa chunka watayoqmanta asta pishqa chunka watayoqkama. Paykunaqa liston kananku tolderamanta ruwasqa *tabernáculo templopa pationpi llank'aspa, sacerdotekunata yanapanankupaq hinallataq tabernáculo templota desarmaspa apanankupaqpas. 4Coatpa miraynin runakunaqa *Lugar Santisimopi kaq hinallataq *Lugar Santopi kaq cosaskunata apanankupaqmi churasqa kanqaku.
5Israelpa miraynin runakuna huk lawman astakunanku kaqtinqa, Aaronmi wawankunallapiwan tabernáculo templopi kaq cortinata pashkanqaku. Hinaspan chay cortinawan baúl hina *arcata tapanqaku. 6Saynallataqmi paykunaqa chay baúl hina arcataqa tapallanqakutaq huk qarawan hinallataq azul colorniyoq telawanpas. Hinaspan chay arcapa argollankunaman churallanqakutaq varillakunatapas wantunankupaq. 7Saynallataqmi Señor Diospaq sapaqchasqa t'anta churana mesaman churallanqakutaq azul color sumaq fino telata; chaypa hawanmantaqmi churanqaku platokunata, cucharakunata, copakunata, jarrakunata hinallataq vino hich'anapaq vasokunatapas. Saynallataqmi chay mesapiqa t'antapas manay faltaq kanan. 8Chaykunapa hawanmantaqmi mast'anqaku nina sansa hina puka color telata. Chaypa hawanmanñataqmi mast'allanqakutaq huk qarata. Hinaspan chay mesamanqa churallanqakutaq varillakunatapas wantunankupaq.
9Saynallataqmi azul colorniyoq telawan tapanqaku mechero hina k'anchaq *candelabrota, lamparinkunata, mecha arreglanapaq tenazakunata, platochakunata hinallataq aceite churanankupaq serviciokunatapas. 10Hinaspan tukuy chaykunataqa llapanta p'istunqaku huk qarawan. Hinaspan wantunankupaq k'aspi hawaman churanqaku.
11Saynallataqmi qorimanta ruwasqa altarpa hawanmanpas azul color telawan tapanqaku. Chaypa hawanmanñataqmi tapallanqakutaq huk qarawan. Hinaspan churanqaku varillakunata wantunankupaq. 12Tabernáculo templo ukhupi kaq llapallan serviciokunatapas azul colorniyoq telawanmi p'istunqaku. Chay serviciokunapa hawanmanñataqmi tapallanqakutaq huk qarawan. Hinaspan wantunankupaq k'aspi hawaman churanqaku. 13Chaymantan altarpi k'anasqanku kaq ushpata pichanqaku. Hinaspan chay altartaqa morado color telawan tapanqaku. 14Chaymantan chay altarpa hawanmanqa churanqaku llapallan serviciokunata, palakunata, trinchikunata, tenazakunata hinallataq tazakunatapas. Chaymantan chay llapallan serviciokuna altarpi utilizanankutaqa tapanqaku huk qarawan. Hinaspan churanqaku varillakunata wantunankupaq. 15Aarón wawankunapiwan chay tabernáculo templopi kaq llapallan serviciokunata tapayta tukuruqtinkuñan hinallataq campamentopas listoña astanankupaq kashaqtinñan, Coat sutiyoq runapa miraynin runakunaqa hamunqaku, llapallan chay sapaqchasqa cosaskunata apanankupaq. Ichaqa aman paykunaqa tupaykunqakuchu noqapaq sapaqchasqa kaq cosaskunataqa, saynapi ama wañunankupaq. Tabernáculo templopi kaq cosaskunamantaqa Coat sutiyoq runapa mirayninkunan apanankupaq churasqa kanqaku.
16Ichaqa Aaronpa wawan Eleazarñataqmi encargakunqa kaykunamanta: Lamparín k'anchananpaq aceitenmanta, sumaq q'apaq inciensomanta, sapa p'unchaw ofrendasqanku tarpusqa kawsaymanta hinallataq llusinapaq aceitemantawan ima. Saynallataqmi payqa tabernáculo templota hinallataq chay templopi kaq llapallan serviciokunatapas cuidananpaq churasqa kanqa, nispa.
17Señor Diosmi Moisesta hinallataq Aarontawan khaynata niran:
18—Qankunaqa amayá permitinkichishchu Leví ayllumanta Coat sutiyoq runapa miraynin runakuna wañuspa chinkanankutaqa. 19Noqa Señor Diospaq sapaqchasqa kaq cosaskunaman Coatpa miraynin runakuna ashuykuqtinku mana wañunankupaqqa, Aaronmi wawankunapiwan paykunaman willanqa imakunatas ruwanankupaq hinallataq imakunatas apanankupaqpas. 20Coatpa miraynin runakunaqa manan haykunankuchu ni huk ratollapas noqa Señor Diospaq sapaqchasqa kaq cosaskunata qawanankupaqqa, saynapi ama wañunankupaq, nispa.
Leviypa wawan Gersonpa miraynin runakunapa llank'anankumanta
21Chaymantan Señor Diosqa Moisesta nillarantaq khaynata:
22—Saynallataqyá qankunaqa censaspa yupaychis Gersonpa miraynin runakunata familiankuman hina hinallataq chay familiakunapa mirayninkuman hina. 23Chay censopiqa yupankichis llapallan qarikunatan kinsa chunka watayoqmanta asta pishqa chunka watayoqkama. Hinaspapas paykunaqa liston kananku *tabernáculo templopa pationpi llank'aspa, sacerdotekunata yanapanankupaq.
24Gersonpa mirayninmanta runakunan churasqa kanqaku kaykunata alistaspa apanankupaq: 25Paykunan apanqaku tabernáculo templopi cortinakunata hinallataq noqawan tupananchis chay tabernáculo templotapas. Saynallataqmi paykunaqa apallanqakutaq templo tapananku telata, qarakunamanta tolderakunata, noqawan tupananchis tabernáculo templopa punkunpi cortinakunata, 26patiopa muyuriqninpi kaq cortinankunata hinallataq patiopa punkunpi kaq cortinatapas. Chay cortinakunawanmi cercasqa kashan noqawan tupananchis tabernáculo temploqa hinallataq altarpas. Hinaspapas paykunaqa apallanqakutaqmi washk'akunata hinallataq tabernáculo templopi serviwanankupaq utilizasqanku llapallan serviciokunatapas. 27Aaronmi wawankunapiwan kamachinqa Gersonpa mirayninkunataqa imatapas ruwanankupaq hinallataq apanankupaqpas. Qanmi Moisés paykunata kamachinki, tukuy imapas ruwasqankumanta responsable kanankupaq. 28Aaronpa wawan Itamarmi diriginqa Gersonpa miraynin runakunataqa tukuy chaykunata ruwaspanku, tabernáculo templopa wakin cosasninkunata cuidaspa apanankupaq.
Leviypa wawan Meraripa miraynin runakunapa llank'anankumanta
29Saynallataqyá qankunaqa censaspa yupaychis Meraripa miraynin runakunata familiankuman hina hinallataq chay familiakunapa mirayninkuman hina 30Chay censopiqa yupankichis llapallan qarikunatan kinsa chunka watayoqmanta asta pishqa chunka watayoqkama. Paykunaqa liston kananku *tabernáculo templopa pationpi llank'aspa, sacerdotekunata yanapanankupaq 31Meraripa mirayninmanta runakunan churasqa kanqaku kaykunata apanankupaq: Tabernáculo templopa pilarninkunata, varillankunata, chay pilarkunapa tiyanan basekunata, 32patiopa muyuriqninpi kaq pilarkunata, chay pilarkunapa tiyanan basekunata, estacakunata, washk'akunata hinallataq noqata serviwanankupaq utilizasqanku llapallan serviciokunatapas. Qanmi paykunataqa sapankamata kamachinki imatapas apanankupaq. 33Aaronpa wawan Itamarmi diriginqa Meraripa miraynin runakunataqa, tukuy chaykunata ruwaspanku, tabernáculo templopa wakin cosasninkunata cuidaspa apanankupaq, nispa.
Coatpa miraynin runakuna yupasqa kasqankumanta
34Chaymantan Moisesqa Aaronpiwan hinallataq Israelpa mirayninmanta líder runakunapiwan Coat sutiyoq runapa miraynin runakunata yuparanku, mirayninkuman hina hinallataq familiankuman hina. 35Paykunataqa yuparanku llapallan qarikunatan kinsa chunka watayoqmanta asta pishqa chunka watayoqkama. Hinaspapas paykunaqa liston karanku *tabernáculo templopa pationpi llank'aspa, sacerdotekunata yanapanankupaq. 36Paykunaqa llapallankupin 2,750 qarikuna karanku. 37Paykunan Coatpa mirayninmantaqa yupasqa karanku, Señor Diosta tabernáculo templopa pationpi servinankupaq. Hinaspapas paykunataqa Moisesmi Aaronpiwan yuparanku Moisesman Señor Diospa kamachisqanman hina.
Gersonpa miraynin runakuna yupasqa kasqankumanta
38Saynallataqmi Gersonpa miraynin runakunapas, familiankuman hina hinallataq chay familiakunapa mirayninkuman hina yupasqa karanku. 39Paykunataqa yuparanku llapallan qarikunatan kinsa chunka watayoqmanta asta pishqa chunka watayoqkama. Hinaspapas paykunaqa liston karanku *tabernáculo templopa pationpi llank'aspa, sacerdotekunata yanapanankupaq. 40Paykunaqa llapallankupin 2,630 qarikuna karanku. 41Paykunan Gersonpa mirayninmantaqa yupasqa karanku, Señor Diosta tabernáculo templopa pationpi servinankupaq. Hinaspapas paykunataqa Moisesmi Aaronpiwan yuparanku Moisesman Señor Diospa kamachisqanman hina.
Meraripa miraynin runakuna yupasqa kasqankumanta
42Saynallataqmi Merari runapa miraynin runakunapas familiankuman hina hinallataq chay familiakunapa mirayninkuman hina yupasqa karanku. 43Paykunataqa yuparanku llapallan qarikunatan kinsa chunka watayoqmanta asta pishqa chunka watayoqkama. Hinaspapas paykunaqa liston karanku *tabernáculo templopa pationpi llank'aspa, sacerdotekunata yanapanankupaq. 44Paykunaqa llapallankupin 3,200 qarikuna karanku. 45Paykunan Meraripa mirayninmantaqa yupasqa karanku Señor Diosta tabernáculo templopa pationpi servinankupaq. Hinaspapas paykunataqa Moisesmi Aaronpiwan yuparanku Moisesman Señor Diospa kamachisqanman hina.
46Saynatan Moisesqa, Aaronpiwan hinallataq Israelpa miraynin runakunapa jefenkunapiwan ima Leví ayllumanta runakunata yuparanku, mirayninkuman hina hinallataq familiankuman hina. 47Paykunataqa yuparanku llapallan qarikunatan kinsa chunka watayoqmanta asta pishqa chunka watayoqkama. Hinaspapas paykunaqa liston karanku, *tabernáculo templopa pationpi llank'aspa, sacerdotekunata yanapanankupaq. Hinallataq tabernáculo templota desarmaspa apanankupaqpas. 48Paykunaqa llapallankupin 8,580 qarikuna karanku. 49Saynatan Leví ayllumanta runakunata censaspa yuparanku Moisesman Señor Diospa kamachisqanman hina. Hinaspapas yupasqankuman hinan paykunamanqa sapankamankuman encargaranku, imatapas ruwanankupaq hinallataq imatapas apanankupaq. Saynatan Moisesqa ruwaran Señor Diospa kamachisqanman hina.
Currently Selected:
Números 4: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
