Números 10
10
Qolqemanta ruwasqa trompetakunamanta
1Señor Diosmi Moisesta khaynata niran:
2—Qolqemanta ruwachiy ishkay trompetakunata. Chay trompetakunataqa ruwachinki martillowan labraspan. Hinaspan chay trompetakunata tocachiqtiyki, runakuna huñunakamunqaku. Saynallataqmi chay trompetata tocachiqtiykiqa campamentonku astakunankupaq huk señal kanqa. 3Chay ishkaynin trompetakunata tocachiqtiykin, Israelpa miraynin llapallan runakunaqa qanpa ñawpaqniykiman huñunakamunqaku, *tabernáculo templopa punkunman. 4Ichaqa sichus huk trompetallata tocachinki chayqa, qanpa ñawpaqniykimanmi huñunakamunqaku llapallan ayllukunapa jefenkunalla. 5Ishkaynin trompetakunata guerrapi hina avanzanankupaq altota tocachiqtiykiqa, este nisqa intipa lloqsimunan lawpi campamentoyoq kaq ayllukunan primerta puririnqaku. 6Ishkay kaq kutita trompetakunata guerrapi hina avanzanankupaq altota tocachiqtiykiqa, sur nisqa lawpi campamentoyoq ayllukunan puririnqaku. Chay sapanka trompetakunata guerrapaq hina altota tocamuqtinkun, chay lugarmanta puririnaykichispaq huk señal kanqa. 7Ichaqa trompetakunata mana guerrapaq hinachu, aswanqa hukniraqta tocachiqtiykiqa, Israelpa miraynin runakuna huñunakamunanpaqmi huk señal kanqa. Ichaqa chay trompeta tocayqa manan guerrapaq hinachu kanan. 8Chay trompetakuna tocaqkunaqa Aaronpa mirayninmanta sacerdotekunan kanqaku. Kay kamachikuy leykunan qankunapaq hinallataq mirayniykichis runakunapaqpas wiñaypaq kanqa.
9Qankuna allpaykichispiña kashaqtiykichis, enemigoykichiskuna qankunawan peleanankupaq hamunqaku chayqa, chay trompetakunataqa altotan tocanaykichis. Saynapin noqa Señor Diosniykichisqa qankunamanta yuyarispa, enemigoykichiskunamanta librasqaykichis. 10Saynallataqmi chay trompetakunataqa tocallankichistaq kusikunaykichis p'unchawkunapipas, imaynan noqa Diospaq fiestata ruwaspaykichis otaq mosoq killakunapi celebraspaykichis tocankichis chay hinata. Chay trompetakunataqa tocallankichistaqmi k'ananapaq sacrificio ofrendata presentawaspaykichispas hinallataq noqa Señor Dioswan hawkalla kawsanaykichispaq ofrendata presentawaspaykichispas. Saynapin noqa Señor Diosniykichisqa yuyarisqaykichis. Noqaqa Señor Diosniykichismi kani, nispa.
Israelpa miraynin runakuna Sinaí nisqa lugarmanta ripusqankumanta
11(Israelpa miraynin runakuna Egipto *nacionmanta lloqsimusqankupa qepantan) ishkay kaq watapi, ishkay kaq killapa ishkay chunka kaq p'unchawninpi *tabernáculo templopa hawanpi kaq phuyu altoman oqarikuran. 12Hinaqtinmi Israelpa miraynin runakunaqa Sinaí nisqa ch'inñeq lugarmanta, ordenninpi puriyta qallariranku. Hinaspan chayaranku asta Parán nisqa ch'inñeq lugarkama. Hinaqtinmi chay lugarpi phuyu sayaykuqtin, paykunaqa chaypi samaranku. 13Israelpa miraynin runakunaqa saynatan qallariranku viajayta, Señor Diospa Moisesta kamachisqanman hina. 14Primer kaq puntatan puririyta qallariranku Judá ayllumanta banderankuta apayukuspanku ejército tropanman hina. Chay soldadokunapa jefenmi karan Aminadab sutiyoq runapa wawan Naasón. 15Saynallataqmi Isacar ayllupas puririyta qallariranku ejército tropanman hina. Chay soldadokunapa jefenmi karan Zuar sutiyoq runapa wawan Natanael. 16Saynallataqmi Zabulón ayllupas puririyta qallariranku ejército tropanman hina. Chay soldadokunapa jefenmi karan Helón sutiyoq runapa wawan Eliab. 17Chaymantan tabernáculo templota pashkaruqtinkuña, Gersonpa mirayninkuna hinallataq Meraripa mirayninkunapiwan pashkasqa tabernáculo templota apayukuspanku puririranku, apanankupaq encargasqa kasqankurayku.
18Chaymantan puririyta qallariranku Rubén ayllumanta runakuna banderankuta apayukuspanku, ejército tropankuman hina. Chay soldadokunapa jefenmi karan Sedeur sutiyoq runapa wawan Elisur. 19Saynallataqmi Simeón ayllupas puririyta qallariranku ejército tropanman hina. Chay soldadokunapa jefenmi karan Zurisadai sutiyoq runapa wawan Selumiel. 20Saynallataqmi Gad ayllupas puririyta qallariranku ejército tropanman hina. Chay soldadokunapa jefenmi karan Deuel sutiyoq runapa wawan Eliasaf. 21Chaymantan Coatpa miraynin runakunañataq, Diospaq sapaqchasqa kaq serviciokunata apayukuspa puririranku. Paykuna samananku lugarman chayanankupaqqa, Señor Diosta yupaychananku tabernáculo temploqa ñan armasqaña karan.
22Chaymantan puririyta qallariranku Efraín ayllumanta runakuna banderankuta apayukuspanku ejército tropankuman hina. Chay soldadokunapa jefenmi karan Amiud sutiyoq runapa wawan Elisama. 23Saynallataqmi Manasés ayllupas puririyta qallariranku ejército tropanman hina. Chay soldadokunapa jefenmi karan Pedasur sutiyoq runapa wawan Gamaliel. 24Saynallataqmi Benjamín ayllupas puririyta qallariranku ejército tropanman hina. Chay soldadokunapa jefenmi karan Gedeoni sutiyoq runapa wawan Abidán.
25Chaymantan puririyta qallariranku Dan ayllumanta runakuna banderankuta apayukuspanku ejército tropankuman hina. Chay soldadokunapa jefenmi karan Amisadai sutiyoq runapa wawan Ahiezer. Paykunaqa riranku llapallan ayllukunapa último qepallantañan. 26Saynallataqmi Aser ayllupas puririyta qallariranku ejército tropanman hina. Chay soldadokunapa jefenmi karan Ocrán sutiyoq runapa wawan Pagiel. 27Saynallataqmi Neftalí ayllupas puririyta qallariranku ejército tropanman hina. Chay soldadokunapa jefenmi karan Enán sutiyoq runapa wawan Ahira.
28Sayna ordenpin Israelpa mirayninmanta llapallan ayllunkunaqa ejercitonkuman hina, sapa kutin astakuspanku, puririyta qallariranku.
Paykunawan rinanpaq cuñadon Hobabta Moisés valekusqanmanta
29Huk p'unchawmi Moisesqa Madián llaqtayoq suegron Reuelpa wawan Hobab sutiyoq cuñadonta khaynata niran:
—Noqaykuqa Señor Diospa prometewasqanku allpamanmi ripushayku. Saynaqa hakuchiyá noqaykuwan kushka. Noqaykuqa allintan tratasqaykiku. Señor Diosmi prometewaranku, Israelpa llapallan mirayninkunata allinta tratawanankupaq, nispa.
30Hinaqtinmi Moisespa cuñadon Hobabqa khaynata contestaran:
—Manan qankunawanqa riymanchu. Aswanmi noqaqa llaqtaypi familiaykunapa kasqanman kutipusaq, nispa.
31Hinaqtinmi Moisesqa cuñadonta valepakuspa, khaynata niran:
—Amayá saqeruwaykuchu. Qanqa allintapunin reqsinki ch'inñeq desiertopi kaq lugarkunataqa. Hinaspapas qanqa yachankin maypichus samanapaq hina lugarkuna kasqantaqa. Qanmi noqaykuta pusawaqniyku kanki. Chayraykun ruegakuyki noqaykuta compañawanaykikupaq. 32Sichus qan noqaykuwan rinki chayqa, Señor Diospa tukuy imapas noqaykuman qowasqankutan qanmanpas qosqaykiku, nispa.
33Chaymantan Israelpa miraynin runakunaqa Sinaí nisqa Señor Diospa orqonmanta ripuranku. Hinaspan kinsa p'unchaw viajaranku. Hinaspapas Señor Diospa baúl hina *arcanqa Israelpa miraynin llapallan runakunapa ñawpaqnintan riran, samanankupaq huk lugarman pusaspa. 34Israelpa miraynin runakuna puririqtinkun, sapa p'unchaw Señor Diospa phuyun paykunapa altonta riran.
35Señor Diospa baúl hina arcanta puririchiyta qallariqtinkun, Moisesqa khaynata niran:
Dios Taytalláy, hatariy.
Enemigoyki runakunata ch'eqechiy.
Cheqnikusuqniyki runakunaqa ñawpaqniykimantayá ayqekuchunku, nispa.
36Ichaqa Señor Diospa baúl hina arcanta samananku lugarpi churaykuqtinkuñataqmi, Moisesqa khaynata niran:
Dios Taytalláy,
noqaykuman kutirimuy.
Wara-waranqa
Israelpa mirayninkunamanyá kutirimuy, nispa.
Currently Selected:
Números 10: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
