Números 9
9
Imaynatas Pascua Fiestata ruwanankumanta
1Egipto *nacionmanta Israelpa miraynin runakunapa lloqsimusqankupa ishkay kaq wata qallarisqan primer kaq killapin, Señor Diosqa Moisesta Sinaí nisqa ch'inñeq lugarpi khaynata niran:
2—Israelpa miraynin runakunaqa *Pascua Fiestatan señalasqa tiempopipuni ruwanqaku. 3Kay primer kaq killa qallariypa chunka tawayoq p'unchawninpin, inti haykuykuytaña chay Pascua Fiestataqa ruwanqaku. Chay fiestataqa señalasqa tiempopin ruwanqaku kamachisqay leykunaman hinan, nispa.
4Saynatan Moisesqa Israelpa miraynin runakunata kamachiran Pascua Fiestata ruwanankupaq. 5Hinaqtinmi Israelpa miraynin runakunaqa chay primer kaq killapa chunka tawayoq p'unchaw tardeykuyta Sinaí nisqa ch'inñeq lugarpi Pascua Fiestataqa ruwaranku. Chay fiestataqa ruwaranku Moisesman Señor Diospa kamachisqanman hinan.
6Ichaqa Israelpa mirayninmanta wakin runakunaqa wañusqata tupaykusqankuraykun qenlli *impuro qeparanku. Chayraykun chay p'unchawpiqa Pascua Fiestataqa mana ruwayta atirankuchu. Hinaspan paykunaqa chay p'unchaw Moisespa hinallataq Aaronpa kasqanman riranku. 7Hinaspan khaynata niranku:
—Noqaykuqa wañusqatan tupaykurayku. Chaymi qenlli impuro kashayku. ¿Chaychu mana permitiwankikuman Señor Diosman wakin Israelpa miraynin runamasinchiskunawan kushka ofrendaykuta presentanaykuta chay citasqa p'unchaw? nispa.
8Chaymi Moisesqa contestaran khaynata:
—Qankunaqa suyaykuwaychisraqyá, imatas Señor Dios qankunamanta niwanqa chayta averiguanaykama, nispa.
9Hinaqtinmi Señor Diosqa Moisesta khaynata niran:
10—Israelpa miraynin runakunata kamachiy khaynata: “Qankunaqa llapallaykichismi Pascua Fiestataqa ruwayta atinkichis. Ichaqa sichus mayqenniykichispas qankuna ukhumanta qenlli impuro kanqa wañusqata tupaykusqanrayku otaq viajepi tarikunqaku huk law *nacionpi chayqa, 11paykunaqa ishkay kaq killapa chunka tawayoq p'unchawninpiñan tardeykuy horasninta Pascua Fiestataqa ruwanqaku. Chay fiestapiqa kaykunatan mikhunqaku: corderopa aychanta qatqe qorayoqta hinallataq mana levadurayoq t'antatawan ima. 12Aman paqarisnintin p'unchawpaqqa puchunkichishchu chay corderopa aychantaqa nitaqmi tulluntapas p'akinkichishchu. Chay Pascua Fiestataqa ruwankichis noqa Señor Diospa kamachisqayman hinan. 13Sichus pipas mana qenlli impuro kashaspa otaq mana viajepi tarikushaspa Pascua Fiestata mana ruwanqachu chayqa, chay runaqa Israelpa miraynin runakunamantan chinkachisqa kanqa, Señor Diosman ofrendanta chay fiesta p'unchawpi mana presentasqanrayku. Saynatan chay runaqa castigasqa kanqa huchankunarayku. 14Sichus qankuna ukhupi tiyaq huk law nacionniyoq forastero runa Pascua Fiestata ruwaspaqa, qankunapa ruwasqaykichisman hinan ruwanqa. Kay kamachikuymi kanqa qankunapaq hinallataq qankuna ukhupi tiyaq huk law nacionniyoq runakunapaqpas”, nispa.
Tabernáculo templota phuyu tapaykusqanmanta
(Ex 40.34-38)
15*Tabernáculo templota ruwayta tukusqanku p'unchawmi phuyu tapaykuran tabernáculo templota. Saynallataqmi tutapas nina rawrayman rikch'akuq phuyu tapaykuran tabernáculo templota asta achikhamunankama. 16Saynan pasaran sapa p'unchaw. P'unchawmi tabernáculo templopa hawanpi phuyu karan. Tutañataqmi nina rawrayman rikch'akuq phuyu karan. 17Tabernáculo templopa hawanmanta phuyu oqarikuqtinmi, Israelpa miraynin runakunaqa chay lugarmanta puririranku. Ichaqa may lugarpichus phuyu tiyaykuqtinñataqmi, paykunaqa chay lugarpi qepakuranku. 18Israelpa miraynin runakunaqa Señor Dios paykunata kamachiqtinmi, rinanku kaqtin, riranku otaq qepakunanku kaqtinpas, qeparanku. Tabernáculo templopa hawanpi kaq phuyu hayk'aqkamachus kaqllapi qepakuran, chay p'unchawkaman paykunaqa chay lugarpi qepakuranku. 19Tabernáculo templopa hawanpi ashka p'unchawkuna phuyu qepakuqtinqa, Israelpa miraynin runakunaqa chay lugarmantaqa manan puririrankuchu. Saynataqa ruwaranku Señor Diospa kamachisqanta kasukuspankun. 20Sichus pisi p'unchawkunalla tabernáculo templopa hawanpi phuyu qepakuqtinqa, Israelpa miraynin runakunaqa Señor Diospa kamachisqanman hinan pisi p'unchawkunalla samaranku. Chaymantaqa Señor Diospa kamachisqanman hinan puririranku. 21Mayninpiqa huk tutallan chay phuyuqa qepakuran tabernáculo templopa hawanpi. Ichaqa tutaña otaq p'unchawña chay phuyu oqarikuqtinqa, Israelpa miraynin runakunaqa alistakuspanku chay lugarmantan puririranku. 22Chaymi tabernáculo templopa hawanpi ishkay p'unchaw otaq huk killa otaq huk watapas chay phuyu qepakuqtinqa, chay lugarpi Israelpa miraynin runakunaqa qepakuranku. Ichaqa phuyu oqarikuqtintaqmi, chay lugarmantaqa puririranku. 23Israelpa miraynin runakunaqa Señor Diospa kamachisqanman hinan, chay lugarpi samaranku. Saynallataqmi Señor Diospa kamachisqanman hina puririrankupas. Tukuy chaykunataqa ruwaranku Moisesman Señor Diospa kamachisqanman hinan.
Currently Selected:
Números 9: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
