Números 11
11
Israelpa miraynin runakuna Señor Diospaq phiñakuspa quejakusqankumanta
1Huk p'unchawmi Israelpa miraynin runakunaqa sasachakuykunapi kaspanku, Señor Diospa contranpi quejakuyta qallariranku. Chaymi Señor Diosqa chayta uyarispa, anchata phiñakuran. Hinaspan ninawan ruphachiran campamentopa muyuriqninta hinallataq chay campamentopa patantawan. 2Hinaqtinmi paykunaqa altota qaparispanku Moisesta valekuranku. Chaymi Moisesqa paykunapaq Señor Diosmanta mañakuran. Hinaqtinmi chay ninaqa wañupuran. 3Chaymi chay lugartaqa suticharanku “Tabera” nisqa sutiwan, chaypi Señor Diospa ninan campamentonkupa muyuriqninpi ruphasqanrayku. [Nota: Hebreo rimaypiqa “Tabera” sutiqa “rawrashaq nina” ninantan nin.]
Israelpa miraynin runakuna aychata antojakusqankumanta
4Israelpa miraynin runakunawan kushkan huk law *nacionniyoq runakunapas Egipto nacionmanta lloqsispa paykunawan puriranku. Hinaspan chay runakunaqa anchallataña mikhuna mikhuykuyta munaranku. Chaymi Israelpa miraynin runakunapas chay runakunata qatipakuspanku, waqayta qallariranku khaynata:
—¡Ay, pillaraq aychallatapas qoykuwasunman mikhunanchispaq! 5¡Maypiraq Egipto nacionpi gratislla challwa mikhusqanchis! ¡Maypiraq pepinokuna, sandillakuna, porokuna, cebollakuna hinallataq ajoskuna mikhusqanchispas! 6Ichaqa kunantaq mana ni ima mishk'i mikhunapas kanchu kaypi mikhunanchispaq. Kaypiqa kay “*maná” nisqa mikhunallan kashan. Chaymi yarqaypi wañushanchis kaypi, nispanku.
7Chay “maná” nisqa mikhunaqa culantro mukhu hinan karan. Colornintaqmi q'ellu niraq karan bedelio nisqa sach'apa weqenman rikch'akuq. 8Runakunaqa lloqsispankun “maná” nisqa mikhunataqa huñumuranku. Chaymantan marankunapi kutaranku hinallataq mutk'akunapipas. Hinaspan mankapi wayk'uranku. Saynallataqmi tortakunatapas ruwaranku. Sabornitaqmi karan aceitewan chapuspa ruwasqa t'anta hina. 9Sapa tutan campamentoman shulla chayamuqtinmi, “maná” nisqa mikhunaqa urmamuran.
10Moisestaqmi uyariran Israelpa miraynin runakuna familiakunantin carpankupa punkunpi waqasqankuta. Sayna ruwasqankuwanmi Señor Diosqa anchallataña phiñakuran. Saynallataqmi chay ruwasqankuqa Moisespaqpas mana allinchu karan. 11Hinaqtinmi Moisesqa Señor Diosta khaynata niran:
—Noqaqa serviqniyki runan kani. ¿Imanaqtintaq khaynatari tratawankí? ¿Imanaqtintaq noqapaq phiñakuspa, kay runakunapa sasachakuynintari noqaman wikch'uykuwankí? 12¡Noqaqa manan paykunapa tayta-mamanchu kani! ¿Chaychu noqata niwanki: “Ñuñuq wawata hina apay marq'ayniykipi, abuelonkuman prometesqay allpaman”, nisparí? 13Noqari, ¿maymantataq aychata orqoramusaq kay llapallan runakunaman mikhuchinaypaqrí? Paykunaqa waqaspan hamuwanku khaynata: “Qoykuwayku aychata mikhunaykupaq”, nispanku. 14¡Noqa sapallayqa manan atiymanchu kay llapallan runakunata chay (prometesqayki allpaman) pusaytaqa! ¡Noqapaqqa anchapas sasallañan kashan kay runakunata pusayqa! 15Sichus saynallata tratawanki chayqa, ama hina kaspaykiyá wañurpachiway, saynapi amaña khayna sasachakuykunata rikuspa ñak'arinaypaq, nispa.
16Chaymi Señor Diosqa Moisesta nimuran khaynata:
—Israelpa miraynin runakunamanta reqsisqa kaq liderkunata qanchis chunkata huñumuy. Hinaspa *tabernáculo templopa punkunman pusaspayki, chaypi suyamuwankichis. 17Noqa Señor Diosmi chayman uraykamusaq, qanwan parlanaypaq. Hinaspan qanman qosqay Espirituta chay qanchis chunka runakunamanpas qosaq, saynapi Israelpa miraynin llapallan runakunata pusaysisunaykipaq. Saynapin qanqa mana sapallaykiñachu chay runakunataqa pusanki.
18Israelpa miraynin runakunata khaynata niy: “Ch'uyanchakuychis paqarin p'unchawpaq. Paqarinmi qankunaqa aychata mikhunkichis. Señor Diosmi uyarirun khaynata waqaspa mañakusqaykichista: ‘¡Ay, pillaraq aychallatapas qoykuwasunman mikhunanchispaq! ¡Maypiraq Egipto nacionpi allin kasqanchis kashan!’ nispa nisqaykichista. Chayraykun noqa Señor Diosqa aychata qosqaykichis mikhunaykichispaq. 19Chay aychataqa mikhunkichis manan huk p'unchawllachu nitaq ishkay p'unchawllachu nitaq pishqa p'unchawllachu nitaq chunka p'unchawllachu nitaq ishkay chunka p'unchawllapashchu. 20Aswanmi chay aychataqa mikhunkichis huk killa hunt'a, asta senqaykichismanta aycha lloqsimuqtin millakunaykichiskamaraq. Saynaqa pasanqa noqa Señor Dios qankunawan kushka kashaqtiy, noqata despreciawashaspa khaynata waqasqaykichisraykun: ‘¿Imapaqraq Egipto nacionmanta lloqsimuspa, kaykunaman hamuranchís?’ ” nispa.
21Hinaqtinmi Moisesqa Señor Diosta khaynata niran:
—Noqawanqa 600,000 qarikunawan kashanku. ¿Chaychu khaynata ninki: “Huk killa hunt'an aychata mikhunkichis”, nisparí? 22Ashka ovejakunataña hinallataq ashka wakakunataña ñak'aspapas, ¿imaynatataq aypachiyman kay ashkallaña runakunamanrí? Lamar qochapi kaq llapallan challwakunataña challwamuspapas, ¿imaynatataq aypachiyman kay ashkallaña runakunamanrí? nispa.
23Chaymi Señor Diosqa Moisesta contestamuran khaynata:
—¿Pisilla atiyniyoq kanaypaqchu piensankirí? Kunanmi yachanki noqapa nisqaykuna cumplikunqachus icha manachus chayta, nispa.
24Chaymi Moisesqa (tabernáculo templo punkumanta) hawaman lloqsispa, Señor Diospa llapallan rimapayamusqanta Israelpa miraynin runakunaman willaran. Chaymantan payqa qanchis chunka liderkunata huñumuran. Hinaspan paykunata kamachiran, tabernáculo templopa muyuriqninpi sayanankupaq. 25Hinaqtinmi Señor Diosqa phuyupi uraykamuspa Moiseswan parlaran. Hinaspan Moisesman qosqan Espirituta chay qanchis chunka líder runakunamanpas qollarantaq. Chaymi paykunapi Espíritu kaqtin Diosmanta willakuq *profetakuna hina willakuyta qallariranku. Kaykunaqa manan ni hayk'aqpas kaqmantaqa pasaranchu.
26Ichaqa Israelpa mirayninmanta qanchis chunka liderkunamantan ishkay liderkuna mana tabernáculo templopa kasqanman rirankuchu. Aswanmi paykunaqa campamentollapi qepakuranku. Paykunan karanku: Eldad hinallataq Medad. Paykunapas Espirituta chashkikuspankun, Diosmanta willakuyta qallariranku chay kasqanku campamentopi. 27Hinaqtinmi huk joven p'itaylla rispa, Moisesman willamuran khaynata:
—¡Eldad sutiyoq runan hinallataq Medad sutiyoq runapiwan Diosmanta willakuq profetakuna hina, campamentopi willakushanku! nispa.
28Nun sutiyoq runapa wawan Josueymi waynacha kasqanmantapacha Moisesta serviq karan. Chaymi payqa Moisesta khaynata niran:
—¡Señorniy Moisés, chay runakunata prohibiy, ama saynata rimashanankupaq! nispa.
29Hinaqtinmi Moisesqa contestaran khaynata:
—¿Noqapaqchu sientesqa kashankí? Ima allinchá kanman llapallan runakunamanpas Señor Dios Espiritunta qoykuqtinqa, saynapi paykunapas Diospa willakuqninkuna kaspa, willakuyta qallarinankupaq, nispa.
30Chaymantan Moisesqa Israelpa mirayninmanta líder kaq runakunapiwan kushka campamentoman kutipuranku.
Yuthuman rikch'akuq codorniz animalkunata Señor Dios rikhurichisqanmanta
31Señor Diosmi wayrata wayrachimuran lamar qocha lawmanta. Chay wayran apamuran ashkallataña yuthuman rikch'akuq codorniz animalkunata. Hinaspan chay animalkunaqa campamentoman chayamuspa, campamentopa sapa law muyuriqninpi allpa pampatapas tapaykuranku yaqa huk metro altota hinaraq, saynallataq huk p'unchaw puriyta hinaraq. 32Hinaqtinmi Israelpa miraynin runakunaqa tukuy p'unchaw, tukuy tuta hinallataq paqarisnintin ch'isiyaq p'unchawpas, chay animalkunata huñuranku. Chaymi chikallan huñuqqa huñuran chunka cargata. Hinaspan (ch'arkita ruwaspanku) ch'akichiranku campamentopa muyuriqninpi. 33Ichaqa Israelpa miraynin runakuna chayraq chay yuthu hina animalpa aychanta mikhuyta qallarishaqtinkun, Señor Diospa phiñakuynin paykunapa contranpi chayamuran. Chaymi ashka runakuna onqoywan wañuranku. 34Hinaqtinmi chay lugartaqa suticharanku Kibrot-hataava nisqa lugarwan, rakrapu kaspanku mikhuyllapi piensaspa wañuq runakunata chaypi p'ampasqankurayku. [Nota: Hebreo rimaypi Kibrot-hataava sutiqa “rakrapukunata p'ampasqanku lugar” ninantan nin.]
35Chaymantan Israelpa miraynin runakunaqa Kibrot-hataava nisqa lugarmanta puririranku asta Hazerot nisqa lugarman chayanankukama. Hinaspan chay lugarpi qepakuranku.
Currently Selected:
Números 11: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
