Éxodo 26

Tolderamanta ruwasqa tabernáculo templomanta

(Ex 36.8-38)

1(Diosmi Moisesta nillarantaq khaynata):

—Tolderamanta ruwasqa *tabernáculo nisqa templotaqa chunka cortinakunamantan ruwanki. Chay cortinakunaqa fino *lino q'aytuwan ruwasqan kanan: Azulwan, moradowan hinallataq nina sansa hina pukawan ima. Chay cortinapitaqmi *querubín sutiyoq ishkay *angelkunata bordanki. 2Sapankama cortinakunan chunka ishkayniyoq metrota pishqa chunka centimetroyoqta largonman medinan. Anchonmantaqmi huk metro pusaq chunka centimetroyoq kanan. 3Chay cortinakunataqa pishqata t'inkispaykin siranayki. Saynallatataqmi wakin pishqa cortinankunawanpas ruwanayki. 4Chay primer kaq grupopi sirasqayki cortinakunapa último kaq cortinapa patanpin morado q'aytuwan ojalkunata ruwanki. Saynallatataqmi ishkay kaq grupopi cortinakunapa último kaq cortinapa patanpipas ojalkunata ruwanki. 5Primer kaq grupoman perteneceq cortinakunapa patanpin pishqa chunka ojalkunata ruwanayki. Saynallataqmi ishkay kaq grupoman perteneceq cortinakunapipas pishqa chunka ojalkunata ruwanayki, saynapi sapankama ojalkuna parnintinkama kananpaq. 6Saynallataqmi ruwanayki qorimanta pishqa chunka ganchokunatapas. Hinaspan chay ganchokunawan ishkaynin grupo cortinakunata t'inkinki. Saynapin chay temploqa ch'ulla cortinamantapas ruwasqa kashanman hina kanqa.

7Ruwallankitaqmi chunka hukniyoq cortinakunatapas cabra pelomanta. Hinaspan chay cortinakunawan tabernáculo nisqa templota tapanki. 8Sapankama cortinakunan chunka kinsayoq metrota pishqa chunka centimetroyoqta largonman medinan. Anchonmantaqmi ishkay metrota medinan. 9Primer kaq grupoman perteneceq pishqantin cortinakunatan siranki, saynapi juntasqa kananpaq. Saynallataqmi ishkay kaq grupoman perteneceq soqtantin cortinakunatapas sirachillankitaq. Hinaspan soqta kaq cortinata templopa ñawpaqnin lawman doblanki. 10Ruwallankitaqmi pishqa cortinakunapa patanpipas pishqa chunka ojalkunata. Saynallataqmi soqta cortinakunapa patanpipas pishqa chunka ojalkunata ruwallankitaq. 11Ruwallankitaqmi broncemanta pishqa chunka ganchokunatapas. Hinaspan chay ganchokunawan ishkaynin grupo cortinakunata t'inkinki. Saynapin chay temploqa ch'ulla cortinamantapas ruwasqa kashanman hina kanqa. 12Chay chunkantin cortinakunamantaqa puchunqaraqmi. Chay cortinakunapa puchusqantan kushkanta templopa qepan lawman doblanki warkulayananpaq. 13Chay cortinakunapa sapa ladonmanmi pishqa chunka centímetro hina puchunqa. Chay puchuqtayá templopa sapa lawninman doblanki, saynapi templo tapasqa kananpaq.

14Ruwallankitaqmi tabernáculo templota tapanaykipaqpas carnerokunapa qaranmanta pukawan teñisqa huk tolderata. Saynallataqmi chay tolderapa hawanman tapanaykipaqpas ruwallankitaq huk llamp'uy-llamp'u qarakunamanta huk fino tolderata.

15Saynallataqmi ruwallankitaq tabernáculo templota sostenenanpaqpas pilarkunata acacia nisqa sach'apa tablankunamanta. 16Sapanka tablakunapa largonmi kanan tawa metro parten. Anchontaqmi kanan soqta chunka pishqayoq centímetro. 17Saynallataqmi sapanka tablakuna juntasqa kananpaqpas machimbriasqa kanan. Saynatan ruwanki llapallan tablakunata tabernáculo templopaq. 18Tabernáculo templopaq tablakunata ruwaspaqa ishkay chunka tablakunatan ruwanki *sur nisqa uray lawman churanaykipaq. 19Saynallataqmi ruwallankitaq qolqemanta tawa chunka basekunatapas. Chay basekunaqa t'oqoyoqkaman kanan, chay ishkay espigayoq tablakuna chay basekunapi sayananpaq. Huk tablan ishkay basekunapi sayanan. 20Saynallataqmi ruwallankitaq tabernáculo templopaqqa ishkay chunka tablakunatapas *norte lawman churanaykipaq. 21Chaypaqmi ruwallankitaq qolqemanta tawa chunka basekunatapas. Hinaspan sapa tablapa pachanman t'oqoyoq ishkay basekunata churanki. 22Saynallataqmi tabernáculo templopa qepan law intipa haykunan lawman churanaykipaqpas soqta tablakunata ruwanki. 23Saynallataqmi ruwallankitaq ishkay tablakunatapas tabernáculo templopa qepan lawpi esquinankunaman churanaykipaq. 24Chay esquinakunapi kaq ishkaynin tablakunaqa doblen kanan. Chay tablakunapa wichayninpitaqmi anillokuna hap'inan juntanasqa kananpaq. Saynatan ruwanki tabernáculo templopa qepanpi ishkay esquinakunapi kaq tablakunawanpas. 25Saynapin kanqa pusaq tablakuna hinallataq qolqemanta chunka soqtayoq basekunapas. Chay sapanka tablakunapa pachanpin ishkay basekuna churasqa kanqa.

26Ruwallankitaqmi acacia nisqa sach'apa k'aspimanta pishqa varillakunatapas, tabernáculo templopa huknin lawpi kaq tablakunapaq. 27Ruwallaytaq pishqa varillakunatapas tabernáculo templopa huk lawninpaq hinallataq pishqa varillakunatapas intipa haykunan lawpaqpas. 28Chawpinta pasaq varillañataqmi huk lawnin esquinamanta huknin kaq esquinakama tablakunapa chawpinta pasanan. 29Chay tablakunataqa qoriwanmi llut'inki. Hinaspapas ruwallankitaqmi qorimanta argollakunatapas chayninta varillakuna pasananpaq. Saynallataqmi chay varillakunapas qoriwan llut'isqa kanan.

30Chay tabernáculo templotaqa ruwanki, imaynatan Sinaí orqopi rikuchirayki chay hinatan.

31Saynallataqmi ruwallankitaq huk cortinatapas. Chay cortinaqa khayna clase q'aytukunawanmi ruwasqa kanan: Azul q'aytuwan, nina sansa hina puka q'aytuwan, morado q'aytuwan hinallataq fino lino q'aytuwan ima. Chay cortinapitaqmi querubín nisqa ishkay angelkunata bordanki. 32Hinaspan chay cortinamanqa qorimanta ruwasqa ganchokunata churanki. Hinaspan warkunki qoriwan llut'isqa acacia nisqa sach'amanta ruwasqa tawa pilarkunaman. Chay pilarkunaqa sapankaman qolqemanta ruwasqa basepi tiyanan. 33Chay cortinatan warkunki ganchokunaman. Chay cortinan separanqa *Lugar Santo nisqata *Lugar Santísimo nisqamanta. Chay cortinapa qepanmantaqmi churanki tablamanta ruwasqa baúl hina *arcata. 34Chaymantan tablamanta ruwasqa baúl hina arcamanqa tapanta churanki Lugar Santísimo nisqa ukhupi. 35Saynallataqmi mesatapas churallankitaq Lugar Santo nisqa cuartopi. Chay mesataqa churanki cortinapa ñawpaqninpin norte lawpi. Hinallataqmi churallankitaq mechero hina candelabrotapas chay mesapa chimpanpi sur nisqa uray lawpi.

36Ruwallankitaqmi tabernáculo templopa punkunpaqpas sumaq bordasqa cortinata azul q'aytuwan, nina sansa hina puka q'aytuwan, morado q'aytuwan hinallataq fino lino q'aytuwan ima. Chaytaqa ruwachinki cortina ruway oficioyoq runakunawanmi. 37Chay cortinakunapaqmi acacia nisqa sach'amanta ruwachillankitaq pishqa pilarkunata qoriwan llut'isqata. Chay pilarkunaqa sapankaman kanan qorimanta ganchoyoqkama. Saynallataqmi fundillankitaq *broncemanta pishqa basekunatapas chay pilarkuna sayananpaq.

Currently Selected:

Éxodo 26: QEAÑT

Highlight

Copy