Éxodo 25

*Tabernáculo templopaq ofrenda churasqankumanta

(Ex 35.4-9)

1Señor Diosmi Moisesta khaynata niran:

2—Israelpa miraynin runakunata nimuy, sapankamanku ofrendankuta apamuwanankupaq. Chay ofrendataqa chashkinkichis tukuy sonqonkumanta apamuqkunamantan. 3Paykunamantan kay ofrendakunata chashkinkichis: Qorita, qolqeta, cobreta, 4azul telata, morado telata, nina sansa hina puka telata, fino linomanta ruwasqa telata, cabrapa pelonta, 5pukawan teñisqa carneropa qarankunata, sumaq llamp'ullaña qarakunata, acacia nisqa sach'apa k'aspinta, 6lámpara k'anchananpaq aceiteta, ch'uyanchana aceitepaq perfumekunata hinallataq incienso q'oshñichinapaq mishk'i k'apaqkunatapas, 7*ónice nisqa alhaja rumita hinallataq huk clase sumaq alhaja rumikunatapas. Chay rumikunaqa sacerdotepa *efod nisqa chaleco p'achanman hinallataq pechonpi churakunan *pectoralman adornota churanankupaqmi kanqa. 8Saynallataqmi ruwankichis noqata yupaychawanaykichispaq tolderamanta ruwasqa *tabernáculo templotapas, saynapi noqa qankuna ukhupi kanaypaq. 9Chay tabernáculo templotapas hinallataq chaypi tukuy imaymana kaqkunatapas imaynatachus ruwanaykipaq rikuchisqayki, chayman hinan iguallata ruwanaykichis.

Tablamanta ruwasqa baúl hina arcamanta

(Ex 37.1-9)

10Saynallataqmi ruwanki acacia nisqa sach'apa tablanmanta baúl hina *arcatapas. Chay arcapa medidankunaqa khaynan kanan: Largonmi kanan huk metro chunka centimetroyoq. Anchonmi kanan soqta chunka pishqayoq centímetro. Saynallataqmi sayayninpas kanan soqta chunka pishqayoq centímetro. 11Hinaspan chay ruwasqayki arcataqa hawantapas hinallataq ukhuntapas qori purowan llut'inayki. Saynallataqmi chay arcapa enteron patankunatapas qorimanta moldurata churanayki. 12Ruwallankitaqmi qorimanta tawa argollakunatapas. Hinaspan chay arcapa esquinankunapa tawantin chakinman chay argollakunataqa churanki. Ishkaytan huknin ladonman churanki, ishkaytataq huknin kaq ladonman. 13Saynallataqmi ruwallankitaq acacia nisqa sach'apa k'aspinmanta varillakunatapas. Hinaspan chay varillakunataqa qoriwan llut'inki. 14Chay varillakunatan arcapa sapa lawninpi argollakunaman ustuchinayki. Saynapin chay varillakunaqa servinqa, chay arcata wantunankupaq. 15Ichaqa aman chay varillakunataqa orqonkichu. Chay varillakunaqa chay arcallapin qepanan. 16Noqaqa qanmanmi qosqayki chunkantin kamachikuy leykunata. Chay leykunatan arcapa ukhunman churanki.

17Ruwallankitaqmi arcapa tapantapas qori puromanta. Medidanmi khayna kanan: Largonmi huk metro chunka centimetroyoq kanan. Anchontaqmi soqta chunka pishqayoq centimetrota medinan. 18Ruwallankitaqmi martillowan takashaspalla qorimanta ishkay *querubinwan sutichasqa huk clase *angelkunatapas. Hinaspan chay querubinkunata arcapa tapanpa ishkaynin puntankunaman churanki. 19Huknin querubinmi kanan tapapa huknin puntanpi, huknin kaqñataq tapapa huknin kaq puntanpi. Chay querubinkunaqa arcapa tapanwanmi huk piezalla ruwasqa kanan. 20Chay querubinkunaqa chimpapurankan k'umuyuspa arcapa tapanta qawananku. Saynallataqmi raphrankupas kicharisqa kanan, saynapi arcapa tapanta tapananpaq. 21Noqapa qosqay chunkantin kamachikuy leykunata chay arcapa ukhunman churanki. Hinaspan tapanwan chay arcata tapanki. 22Noqaqa chay arcapa kasqan lugarpin qanwan tupasaq. Hinaspan chay arcapa tapan hawapi ishkaynin querubinkunapa chawpinmanta rimapayamusqayki. Chay lugarmantan Israelpa miraynin runakunapaq llapallan kamachikuykunata rimapayamusqayki.

T'anta churanapaq mesamanta

(Ex 37.10-16)

23Saynallataqmi ruwallankitaq huk mesatapas acacia sach'apa tablanmanta. Chay mesapa medidankunaqa khaynan kanan: Largonmi esqon chunka centimetrota medinan. Anchontaqmi tawa chunka pishqayoq centimetrota medinan. Saynallataqmi sayayninpas soqta chunka pishqayoq centimetrota medinan. 24Hinaspan chay mesataqa qori purowan llut'inki. Saynallataqmi enteron muyuriqninpipas qorimanta moldurata churanki. 25Hinallataqmi ruwallankitaq chay mesapa muyuriqninpipas adornokunata qanchis centímetro anchoyoqta. Hinaspa qori puromanta moldurakunata churanki. 26Saynallataqmi ruwallankitaq qorimanta tawa argollakunatapas. Hinaspan mesapa tawantin esquinanman churanki chakinkunapa waqtanpi. 27Chay argollakunaqa churasqa kanan chay adornokunapa urachanpin, saynapi chay argollakunaman varillata ustuchispa apanankupaq. 28Chay varillakunataqa acacia sach'amanta ruwaspan, qori purowan llut'inki. Chay varillakunan mesata apanankupaq servinqa. 29Saynallataqmi ruwallankitaq qori puromanta platokunata, wishllakunata, jarrakunata hinallataq vasokunatapas. Chay jarrakunaqa hinallataq vasokunapas vino ofrendata ofrendanankupaqmi valenqa. 30Chay mesamanmi siempre churanayki noqapaq sapaqchasqaykichis t'antataqa, saynapi noqa Señor Diospa ñawpaqniypi kananpaq.

Qorimanta ruwasqa candelabromanta

(Ex 37.17-24)

31Saynallataqmi ruwallankitaq qori puromanta mechero hina k'anchaq candelabrotapas. Chay candelabroqa martillowan takashaspalla ruwasqan kanan. Tiyananpaq basenpas, tronconpas, copankunapas hinallataq adornananpaq phanchirishaq t'ikankunapas, qorimanta ruwasqan huk piezalla kanan. 32Chay candelabroqa soqta brazoyoqmi kanan. Troncopa sapa lawninpin kinsa brazonkuna kanan. 33Chay candelabropa soqtantin brazonkunapin kanqa phanchirishaq almendro t'ika hina copakuna. Chay copakunaqa sapankama brazopin kinsa kanqa. 34Chay candelabropa chawpinpi kaq troncopitaqmi tawa copakuna kanqa, phanchirishaq almendro t'ika hina. 35Chay troncopin kinsa bolachakuna kanan. Chay bolachakunan servinqa soqtantin brazokunata hap'inanpaq. 36Chay bolachakunaqa huk piezallan brazonkunawan kanan. Chaykunaqa llapallanmi martillowan takashaspalla ruwasqa kanan qori puromanta. 37Saynallataqmi ruwallankitaq qanchis lamparakunatapas. Hinaspan candelabropa qanchisnintin puntankunaman churanki, chaymanta ñawpaqman k'anchananpaq. 38Mechata arreglanapaq tenazapas hinallataq ushpapaq platochapas qori puromanta ruwasqan kanan. 39Kinsa chunka kinsayoq kilo qori puromantan chay candelabrotaqa tukuy imaymanantinta ruwanayki. 40Chaykunataqa imaynatan Sinaí orqopi rikuchirayki sayna igualchallatan ruwanayki.

Currently Selected:

Éxodo 25: QEAÑT

Highlight

Copy