Éxodo 27

Sacrificio ofrendakunata k'ananankupaq altarmanta

(Ex 38.1-7)

1(Diosmi Moisesta nillarantaq khaynata):

—Ruway acacia nisqa sach'apa tablamanta tawa esquinayoq hinallataq tawa ladoyoq altarta. Sapanka ladonmi medinan ishkay metro ishkay chunka pishqayoq centimetrota. Sayaynintaqmi medinan huk metro ishkay chunka pishqayoq centimetrota. 2Tawa waqrakunatan ruwanki huk wakapa waqranta hina, chay altarpa sapanka esquinanpi kananpaq. Chaykunaqa altarwanmi huk piezalla kanan. Hinaspan chay altartaqa broncewan llut'inki. 3Hinaspapas broncemantan ruwallankitaq altarpi utilizanapaq kaykunata: Ushpa oqarinapaq posillokunata, palakunata, tazonkunata, tenedorkunata hinallataq nina sansata apanapaq kaqkunatapas. 4Saynallataqmi chay altarpaqqa broncemanta ruwallankitaq huk rejillata. Hinaspapas chay rejillapa tawantin esquinanpaqmi ruwanayki broncemanta tawa argollakunata. 5Chay rejillataqa altarpa ukhu chawpipin churanayki. Saynapin chay rejillaqa altarpa kushkan ukhupi churasqa kanqa. 6Ruwallanaykitaqmi altarta apanapaq ishkay varillakunatapas. Chaytaqa ruwanki acacia nisqa sach'apa k'aspimantan. Hinaspan broncewan llut'inki. 7Chay varillakunatan altarpa sapa lawninpi kaq argollakunapa chawpinta pasachinki. Chay varillakunan servinqa chay altarta wantunankupaq. 8Chay altartaqa tablamantan ch'usaq ukhuyoqta ruwanayki, imaynatan Sinaí orqopi huk altarta rikuchirayki chay hinata.

Tolderamanta tabernáculo templopa pationmanta

(Ex 38.9-20)

9Saynallataqmi ruwallankitaq tolderamanta tabernáculo nisqa templopa pationtapas. Chay patiopa largonmi medinan *sur nisqa uray lawman tawa chunka pishqayoq metrota. Hinaspan fino *linomanta ruwasqa cortinawan wishq'asqa kanan. 10Chay sur nisqa uray lawpin kanan ishkay chunka postekuna. Saynallataqmi kanan chay postekuna sayananpaqpas broncemanta ruwasqa basekuna. Ichaqa chay postekunapa ganchonkunapas hinallataq argollankunapas qolqemanta ruwasqan kanan. 11Chay patiopa norte lawninpas largonmanmi tawa chunka pishqayoq metrota medinan. Hinaspan chay lawninpas cortinakunawan wishq'asqa kanan. Saynallataqmi chay norte lawpiqa kanan ishkay chunka postekuna, chay postekunapa sayananpaqpas broncemanta ruwasqa basekunan kanan. Chay postekunapa ganchonkunapas hinallataq argollankunapas qolqemanta ruwasqan kanan. 12Chay tolderamanta ruwasqa *tabernáculo templopa pationqa intipa haykunan lawpi kaq anchonmi ishkay chunka ishkayniyoq metrota pishqa chunka centimetroyoqta medinan. Chay lawninpas cortinawan wishq'asqan kanan. Saynallataqmi postenkunapas chunka kanan, sapanka baseyoqkama. 13Chay templopa pationqa intipa lloqsimunan lawpi kaq anchonmi ishkay chunka ishkayniyoq metrota pishqa chunka centimetroyoqta medinan. 14Punkupa phaña lawninmi qanchis metro cortinawan wishq'asqa kanan. Postenkunapas kinsan kanan, sapanka poste baseyoqkama. 15Saynallataqmi punkupa lloq'e lawninpas qanchis metro cortinawan wishq'asqa kanan. Postenkunapas kinsan kanan sapanka poste baseyoqkama. 16Patioman haykuna punkupin esqon metro cortina largonman churasqa kanan. Chay cortinaqa azul q'aytumanta ruwasqan kanan, nina sansa hina puka q'aytumanta, morado q'aytumanta hinallataq fino lino q'aytumantawan ima. Hinaspapas chay cortinaqa sumaq bordasqan kanan. Postenkunapas tawan kanan sapanka poste baseyoqkama. 17Patiopa enteron muyuriqninpi postekunaqa qolqemanta ruwasqa varillakunawanmi hap'ichisqa kanan. Saynallataqmi postekunapa ganchonkunapas hinallataq argollankunapas qolqemanta ruwasqa kanan. Ichaqa chay postekunapa basenkunataqmi broncemanta ruwasqa kanan. 18Chay patiopa largonmi medinan tawa chunka pishqayoq metrota. Anchontaqmi medinan ishkay chunka ishkayniyoq metrota pishqa chunka centimetroyoqta. Alturantaqmi medinan ishkay metro ishkay chunka pishqayoq centimetrota. Chay patiopa cortinankunaqa fino linomanta ruwasqan kanan. Saynallataqmi postenkunapas broncemanta ruwasqa baseyoq kanan. 19Noqata yupaychawanaykichispaq tukuy imaymana utilizasqaykichispas broncemanta ruwasqan kanan. Saynallataqmi patiopa hinallataq templopa estacankunapas broncemanta ruwasqallataq kanan.

Lamparakunapaq aceitemanta

(Lv 24.1-4)

20Israelpa miraynin runakunata kamachiy, aceituna sach'apa rurunmanta fino aceiteta apamunankupaq, saynapi chay aceitewan lamparakuna mana thañiyta ratananpaq. 21Aaronmi qari wawankunapiwan chay lamparakuna tukuy tuta prendesqalla kananpaq encargakunqaku. Chay lamparakunatan ratachinqaku *Lugar Santopi. Chay Lugar Santoqa huk cortinawan separasqan kashan *Lugar Santisimomanta. Chay cortinaqa kashan *arcapa ñawpaqninpin. Kay kamachisqaykunatan Israelpa miraynin runakunaqa wiñaypaq kasukunanku.

Currently Selected:

Éxodo 27: QEAÑT

Highlight

Copy