Éxodo 13

Primer kaq naceqkuna Diospaq kasqanmanta

1Señor Diosmi Moisesta khaynata niran:

2—Llapallan primer kaq naceqkunataqa noqapaq separay. Israelpa miraynin runakunapa llapallan primerta nacemuq qari wawankuqa noqapaqmi kanqa. Saynallataq animalninkupa primer kaq nacemuq orqo uñankunapas noqapaqmi kanqa, nispa.

3Hinaqtinmi Moisesqa Israelpa miraynin llapallan runakunata khaynata niran:

—Aman hayk'aqpas qonqankichishchu kay p'unchawtaqa. Kay p'unchawpin Señor Diosqa tukuy atiyninwan Egipto nacionpi *esclavo kasqaykichismanta orqomusurankichis. Chayraykun *Pascua Fiesta p'unchawpiqa mana mikhunaykichishchu *levadurayoq t'antataqa. 4Qankunaqa kunanmi *Abib nisqa killapi lloqsishankichis. 5Señor Diosmi ñawpaq abueloykichiskunaman juramentota ruwasparaq, Canaán allpata qonanpaq prometeran. Chay allpapin kunan tiyashanku cananeo runakuna, heteo runakuna, amorreo runakuna, heveo runakuna hinallataq jebuseo runakunapas. Chay allpapiqa lechepas hinallataq mielpas anchallatañan abundan. Chay allpamanmi Señor Diosqa pusasunkichis. Hinaspan chay allpaman haykuspaykichis, chay *Abib nisqa killapi ruwankichis “Mana Levadurayoq T'anta Fiestata”. 6Qanchisnintin p'unchawmi mana levadurayoq t'antataqa mikhunaykichis. Hinaspan chay qanchis kaq último p'unchawpi Señor Diospaq huk fiestata ruwanaykichis. 7Chay qanchisnintin p'unchawmi mana levadurayoq t'antata mikhunaykichis. Hinaspapas chay p'unchawkunapiqa chay tiyasqaykichis enteron llaqtapiqa manan kananchu ni ima levadurapas nitaq ni imapas levadurawan poqosqaqa. 8Chay p'unchawmi wawaykichiskunaman willankichis khaynata: “Kaytaqa ruwashanchis Egipto nacionmanta Señor Dios orqomuwasqankuta yuyarispan”, nispa. 9Kay fiesta ruwasqaykichistan qankunaqa sapa kutin yuyarinaykichis, imaynan makiykichispipas hinallataq mat'iykichispipas huk señal kashanman hinata. Hinaspapas chay fiesta ruwasqaykichismi yuyarichisunkichis tukuy atiyninwan Señor Dios Egipto nacionmanta orqomususqaykichista. Saynapin Diospa leyninkunataqa mana ni hayk'aqpas qonqankichishchu. 10Kay fiestatan qankunaqa watan-watan ruwanaykichis, kay Abib nisqa killapi.

11Señor Diosmi qankunamanqa hinallataq abueloykichiskunamanpas, juramentota ruwaspa, Canaán allpata qosunaykichispaq prometesurankichis. Chay allpaman haykuchisuqtiykichismi, 12qankunaqa primer kaq nacemuq llapallan qari wawakunata Señor Diosman qonaykichis, saynapi Diosman dedicasqa kananpaq. Saynallataqmi animalniykichispa primer kaq nacemuq orqo uñachankunatapas Señor Diosman qonaykichis. Primer kaq naceqkunaqa Señor Diospaqmi kanqa. 13Ichaqa asnopa primer kaq uñantaqa cambianaykichismi huk corderowan, saynapi asnopa rantinta chay corderota Señor Diosman qonaykichispaq. Sichus mana cambiankichishchu chayqa, kunkanta q'ewispan chay asnotaqa wañuchinaykichis. Saynallataqmi primer kaq wawaykichispa rantintapas huk ofrendata Señor Diosman qonaykichis rescatasqa kananpaq. 14Sichus qepa tiempokunaman wawaykichis tapusunkichis khaynata: “¿Imanaqtintaq kay fiestatari ruwashanchís?” nispa chayqa, qankunaqa khaynatayá ninkichis: “Señor Diosmi Egipto nacionpi esclavo kasqaykumanta ancha hatun atiyninwan orqomuwaranku. 15Rey Faraonqa sonqonta rumiyarachispan mana kacharimuwarankuchu. Chaymi Señor Diosqa Egipto nacionniyoq runakunapa primer kaq qari wawankuta wañuchiran. Hinaspapas wañuchillarantaqmi animalninkupa primer kaq uñankutapas. Chayraykun noqaykuqa primer kaq naceq animalkunata sacrificaspa, Señor Diosman ofreceyku. Saynallataqmi primer kaq wawaykupa rantintatapas huk animalta sacrificaspa Señor Diosman ofreceyku, saynapi rescatasqa kananpaq”, nispa.

16Chay fiesta ruwasqaykichismi qankunapaqqa makiykichispipas hinallataq mat'iykichispipas huk señal kashanman hina kanqa, saynapi Egipto nacionpi esclavo kasqaykichismanta Señor Dios tukuy atiyninwan orqomususqaykichista ama qonqanaykichispaq, nispa.

Israelpa miraynin runakunata sayashaq phuyu hinallataq sayashaq nina compañasqanmanta

17*Rey Faraón Israelpa miraynin runakunata kacharirapuqtinqa, Señor Diosqa manan Filistea nacionman riq ñannintachu paykunataqa pusaran, chayninta (Canaán nacionman) cercalla kashaqtintas. Aswanmi Señor Diosqa ch'inñeq desierto lugarninta pusaran, khaynata piensaspa:

—Sichus Filistea nacionman riq ñanninta pusasaq chayqa, Filisteo runakunawan guerrapi peleaspankun hukmanyarunkuman. Hinaspan Egipto nacionman kaqlla kutirapunkuman, nispa.

18Chaymi Señor Diosqa Israelpa miraynin runakunataqa pusaran Puka Lamar Qochata muyuriq desierto lugarninta. Israelpa miraynin runakunaqa Egipto nacionmantan tropa-tropapi allin armasqa lloqsimuranku. 19Moisesqa apachillarantaqmi Joseypa tullunkunatapas. Saynataqa Moisesqa ruwaran, José kawsashasparaq Israelpa miraynin runakunaman huk juramentowan prometechisqanraykun. Joseyqa khaynatan niran:

—Señor Diosqa cheqaqtapunin huk p'unchaw visitamusunkichis (kay Egipto nacionmanta orqosunaykichispaq). Chay lloqsisqaykichis p'unchawyá tulluykunatapas kaymanta apankichis, nispa.

20Israelpa miraynin runakunaqa Sucot nisqa lawmanta lloqsispankun, ch'inñeq desierto lugarpa qallarisqan Etam nisqa lugarpi carpankuta armaspa samaranku. 21Señor Diosqa paykunata ñanninta pusananpaqmi p'unchawqa ñawpaqninkuta sayashaq phuyupi riran. Tutañataqmi paykunata k'anchananpaq sayashaq ninapi riran. Saynapin paykunaqa tutapas hinallataq p'unchawpas viajenkuta seguillaranku. 22Chay sayashaq phuyuqa Israelpa miraynin runakunamanta mana karunchakuspan p'unchaw riran. Saynallataqmi chay sayashaq ninapas paykunamanta mana karunchakuspa tuta riran.

Currently Selected:

Éxodo 13: QEAÑT

Highlight

Copy