Éxodo 14
14
Israelpa miraynin runakuna Puka Lamar Qochata pasasqankumanta
1Señor Diosmi Moisesta khaynata niran:
2—Israelpa miraynin runakunata nimuy, Pi-hahirot nisqa lawman kutinankupaq. Hinaspa carpankuta armaspanku samachunku Baal-zefón nisqa lugarpa chimpanpi. Chay lugarqa kashan Migdol lugarwan hinallataq Puka Lamar Qochawan tupaqninpin. Chay lugarpin paykunaqa lamar qochapa patanpi samananku. 3Chaymi rey Faraonqa khaynata piensanqa: “Israelpa miraynin runakunaqa, ch'inñeq desierto lugarpin chinkasqa purishanku. Paykunataqa ch'inñeq desierton hark'ashan”, nispa. 4Noqa Señor Diosmi Faraonpa sonqontaqa astawanraq rumiyachisaq, qankunata qatimusunaykichispaq. Hinaspan rey Faraonman hinallataq ejercitonmanpas atiyniyta rikuchisaq. Saynapin Egipto *nacionniyoq llapallan runakunaqa yachanqaku noqa Señor Dios kasqayta, nispa.
Saynatan Israelpa miraynin runakunaqa Diospa nisqanman hina ruwaranku. 5Hinaqtinmi Egipto nacionta gobiernaq rey Faraonman willaranku Israelpa miraynin runakuna ishkapakusqankuta. Chaymi rey Faraonqa hinallataq payta serviq jefekunapas ñakapakuspanku anchata phiñakuranku. Hinaspan khaynata niranku:
—Yanqan Israelpa miraynin runakunataqa kacharirunchis, noqanchispaq llank'ananku kashaqtin, nispanku.
6Chaymi rey Faraonqa carretanta alistamunankupaq kamachiran. Hinaspan Faraonqa ejercitonta pusarikuspa, qepankuta qatiran. 7Rey Faraonqa soqta pachak ancha allinnin carretakunatan aparan. Apallarantaqmi Egipto nacionpi llapallan carretakunatapas. Sapankama carretakunapitaqmi huk capitán riran. 8Señor Diosmi Egipto nacionpi gobiernaq rey Faraonpa sonqontaqa astawanraq rumiyachiran. Chayraykun payqa Israelpa miraynin runakunata qatiran. Ichaqa Israelpa miraynin runakunaqa (Señor Diospa atiyninwanmi) qarillaña lloqsiranku.
9Rey Faraonqa llapallan ejerciton runakunapiwanmi Israelpa miraynin runakunata qatiranku carretakunapi, caballopi montayusqa soldadokunantin hinallataq chakipi riq soldadokunantin ima. Hinaspan paykunaqa Israelpa miraynin runakunaman lamar qochapa cercanpi samashaqtinku ayparanku. Chay samasqanku lugarqa karan Baal-zefonpa chimpan Pi-hahirot sutiyoq lugarmi. 10Rey Faraón paykunaman ashuykuqtinmi Israelpa miraynin runakunaqa cuentata qokuranku, Egipto nacionniyoq runakuna paykunapa qepanta hamusqankuta. Chayraykun anchatapuni mancharikuspanku, Señor Diosmanta qaparisparaq mañakuranku. 11Hinaspan Moisesta reclamaspa khaynata niranku:
—¿Imapaqtaq qanri yanqa orqomuwarankiku kay ch'inñeq desierto lugarpi wañunaykupaqrí? ¿Acaso manachu karan Egipto nacionpiri panteón, chaypi p'ampawanankupaq? 12Noqaykuqa Egipto nacionpiraqmi niraykiku: “Dejaykuwayku Egipto nacionniyoq runakunapaq llank'anaykuta”, nispa. Allinmi kanman karan paykunata servinaykupaq, kay ch'inñeq desierto lugarpi wañunaykumantaqa, nispanku.
13Chaymi Moisesqa Israelpa miraynin runakunata khaynata niran:
—Ama manchakuychishchu. Kunanmi rikunkichis imaynatas Señor Dios Egipto nacionniyoq runakunamanta librawasunchis chayta. Kunanmanta wichaymanqa manañan hayk'aqpas rikunkichishñachu kay Egipto nacionniyoq runakunataqa. 14Kunanmi Señor Dios qankunapa favorniykichispi peleanqa. Saynaqa tranquilollayá qepakuychis, nispa.
15Ichaqa Señor Diosmi Moisesta khaynata niran:
—¿Imanaqtintaq noqamantaraq yanapakuyta mañakuwashankí? Apurayman Israelpa miraynin runakunata kamachiy, viajenkuta seguinankupaq. 16Saynaqa bastonniykita oqarispa, makiykita lamar qochapa hawanman haywariy, lamar qocha ishkayman partikunanpaq. Saynapin Israelpa miraynin runakunaqa lamar qochapa chawpinta purispa ch'aki allpanta pasanqaku. 17Noqan Egipto nacionniyoq runakunapa sonqonta rumiyachisaq, saynapi qankunata qatimusunaykichispaq. Hinaspan Faraonpa ejerciton runakunata, caballonkuta hinallataq carretankutapas atiyniywan destruisaq. Saynapin noqaqa hatunchasqa kasaq. 18Hinaspan paykunata destruiqtiy, Egipto nacionniyoq llapallan runakunaqa yachanqaku Tukuy Atiyniyoq Señor Dios kasqayta, nispa.
19Hinaqtinmi Israelpa miraynin runakunapa ñawpaqninta riq angelqa paykunapa qepankutañataq riran. Saynallataqmi paykunapa ñawpaqninkuta riq sayashaq phuyupas paykunapa qepankutañataq riran. 20Saynapin chay sayashaq phuyuqa chawpipi churakuspa, Israelpa miraynin runakunata Egipto nacionniyoq runakunamanta separaran. Chaymi Israelpa miraynin runakunapaqqa k'anchay karan; Egipto nacionniyoq runakunapaqñataqmi tuta karan. Chayraykun Egipto nacionniyoq runakunaqa enteron chay tutapi mana ayparankuchu Israelpa miraynin runakunamanqa.
21Hinaqtinmi Moisesqa makinta lamar qochaman haywariran. Chaymi Señor Diosqa enteron chay tuta intipa lloqsimunan lawmanta nishu wayrata wayrachimuran. Hinaspan lamar qochata ishkayman partispa, ch'aki allpata rikhurichiran. 22Hinaqtinmi Israelpa miraynin runakunaqa chay lamar qochapa chawpinta ch'aki allpanta pasaranku. Lamar qochapi unuñataqmi huk perqa hina karan, paykunapa lloq'e lawninkupi hinallataq phaña lawninkupipas.
23Hinaqtinmi Egipto nacionniyoq llapallan runakunaqa Israelpa miraynin runakunata qatiranku carretakunapi hinallataq caballopi montayusqa soldadokunantin ima asta lamar qochapa chawpinkama. 24Yaqaña achikhamushaqtinmi, Señor Diosqa Egipto nacionniyoq runakunapa tropanta qawarimuran sayashaq ninamanta hinallataq sayashaq phuyumantapacha. Hinaspan paykunataqa pantachiran. 25Saynallataqmi Señor Diosqa carretakunapa llantankunatapas lloqsichiran, saynapi mana avanzayta atinankupaq. Chaymi Egipto nacionniyoq runakunaqa khaynata niranku:
—Ayqekusunchis Israelpa miraynin runakunamanta. Paykunapa Señor Diosninmi noqanchispa contranchispiqa peleashan, nispanku.
26Hinaqtinmi Señor Diosqa Moisesta khaynata niran:
—Lamar qochaman makiykita haywariy, saynapi unu kutiyuspa, Egipto nacionniyoq runakunata, carretankunata hinallataq caballopi montayusqa soldadokunatapas tapananpaq, nispa.
27Hinaqtinmi Moisesqa lamar qochapa hawanman makinta haywariran. Chaymi lamar qochaqa achikhamuyta hinaña imayna kasqallanman kutiyapuran. Chaymi Egipto nacionniyoq runakunaqa ishkapakuyta munaranku. Ichaqa Señor Diosmi paykunataqa lamar qochapa chawpinpi unuwan heq'epachispa wañuchiran. 28Lamar qochapi unuqa maypi kasqanman kutiykuspan, carretakunata hinallataq caballopi montayusqa soldadokunata hinallataq chakipi riq soldadokunatapas taparan. Saynapin Israelpa miraynin runakunata qatispa, lamar qochaman llapallan haykuq Egipto nacionniyoq runakunaqa lamar qochapi wañuranku. Manan ni ch'ullallapas qeparanchu kawsashaqqa. 29Israelpa miraynin runakunan ichaqa lamar qochapa chawpinta pasaranku ch'aki allpanta. Lamar qochapi unutaqmi paykunapaqqa huk perqa hina karan, lloq'e lawninkupi hinallataq phaña lawninkupipas.
30Saynatan Señor Diosqa chay p'unchawpi Egipto nacionniyoq runakunamanta Israelpa miraynin runakunata tukuy atiyninwan salvaran. Hinaqtinmi paykunaqa Egipto nacionniyoq runakunata lamar qochapa patanpi wañusqa chutalayaqta rikuranku. 31Israelpa miraynin runakunaqa rikurankun imaynatas Señor Dios Egipto nacionniyoq runakunata tukuy atiyninwan wañuchisqanta. Chayraykun paykunaqa Señor Diospi creeranku. Hinaspan ancha manchakuywan paytaqa respetaranku. Saynallataqmi Señor Diosta serviq Moisespipas confiaranku.
Currently Selected:
Éxodo 14: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
