Éxodo 11

Primer kaq naceqkuna wañunanmanta

1Chaymantan Señor Diosqa Moisesta khaynata niran:

—Noqan *rey Faraonta hinallataq Egipto *nacionniyoq runakunatapas huk ancha sasachakuy plagawanraq castigasaq. Chaymantañan Egipto nacionmanta ripunaykichispaq dejasunkichis. Hinaspapas kikin rey Faraonpunin wiñaypaq qarqosunkichis. 2Saynaqa kunanyá Israelpa miraynin runakunata khaynata niy: “Llapallan qarikuna hinallataq warmikunapas Egipto nacionniyoq vecinoykichis runakunamanta mañakamuychis qorimanta hinallataq qolqemanta tukuy clase alhajakunata”, nispa.

3Señor Diosmi permitiran, Egipto nacionniyoq runakuna allinta Israelpa miraynin runakunata tratanankupaq. Hinaspapas rey Faraonta serviq jefekunapas hinallataq Egipto nacionniyoq runakunapas, Moisestaqa allintan respetaranku.

4Moisesmi rey Faraonta khaynata niran:

—Señor Diosmi khaynata nin: “Noqan kushka tuta horasta kay Egipto nacionninta pasasaq. 5Hinaqtinmi kay Egipto nacionpi primer kaq nacesqakuna wañunqaku, rey Faraonpa *trononpi tiyaq primer kaq wawanmanta qallarispa, asta maranpi kutaq esclava warmipa primer kaq wawankama. Saynallataqmi llapallan animalkunapa primer kaq uñankunapas wañullanqataq. 6Chaymi enteron kay Egipto nacionpiqa anchallaña waqay kanqa. Sayna waqayqa manan hayk'aqpas karanchu; nitaqmi hayk'aqpas kanqañachu. 7Ichaqa Israelpa miraynin runakunataqa hinallataq animalninkutapas manan ni imapas pasanqachu; nitaqmi paykunataqa ni alqopas kaninqachu. Saynapin qankunaqa yachankichis Egipto nacionniyoq runakunamanta Israelpa miraynin runakunata t'aqasqayta”, nispa. 8Hinaspapas Moisesqa rey Faraontan nillarantaq khaynata:

—Qanta serviq llapallan jefekunan noqaman hamunqaku. Hinaspan ñawpaqniypi qonqoriyukuspa, khaynata ruegakuwanqaku: “¡Ripuy kaymanta, llapallan kay Israelpa miraynin runakunapiwan!”, nispanku. Chaymantañan noqaqa ripusaq, nispa.

Hinaspan Moisesqa rey Faraonpa ñawpaqninmanta ancha phiñasqallaña lloqsimuran.

9Chaymantan Señor Diosqa Moisesta khaynata niran:

—Rey Faraonqa manan chaykuna nisqaykitaqa kasusunkichu. Chaymi noqaqa Egipto nacionniyoq runakuna ukhupi tukuy señalkunata astawanraq ruwasaq, saynapi tukuy atiyniyta rikunankupaq, nispa. 10Hinaqtinmi Moiseswan hinallataq Aaronwan Señor Diospa kamachisqanman hina, tukuy milagrokunata hinallataq señalkunatapas rey Faraonpa ñawpaqninpi ruwaranku. Ichaqa Señor Diosmi rey Faraonpa sonqontaqa astawanraq rumiyachiran. Chaymi Israelpa miraynin runakunataqa mana dejaranchu, Egipto nacionmanta ripunankutaqa.

Currently Selected:

Éxodo 11: QEAÑT

Highlight

Copy