Psom 96
96
Lesegner, limem Monark Siprem
1Anou sant enn nouvo sante pou LESEGNER!
Tou kreatir dan liniver, sant laglwar LESEGNER!
2Nou sant pou LESEGNER; anou sant so louanz.
Toulezour nou anonse ki limem nou Sover.
3Anou anons so laglwar ar tou bann nasion;
anons so bann explwa ar tou bann pep.
4LESEGNER li bien gran, li merit ki nou louanz aklam li.
Li pli for e pli redoutab ki toulezot ti-bondie.
5Bann bondie ki lezot pep venere zot zis bann idol
me LESEGNER limem kreater liniver.
6Li antoure ar laglwar ek mazeste;
pouvwar ek bote ranpli so Tanp.
7Donn LESEGNER, zot tou bann pep lor later;
donn LESEGNER so laglwar ek so pouvwar.
8Donn LESEGNER laglwar ki so nom merite;
amenn zot ofrand e rant dan so Tanp.
9Ador LESEGNER ki sin, ler li paret dan so mazeste;
liniver ki li finn kree, tranble devan li.
10Dir tou bann tribi, “LESEGNER limem lerwa.
Lemond finn etabli bien ferm, peyna li bouze.
Li pou ziz tou dimoun ar drwatir.”
11Lesiel montre to lazwa! Later exprim to boner!
Ki lamer gronde, avek tou saki viv ladan;
12bann karo ek tou seki pouse ladan, les zot boner exploze.
Bann pie dan lafore pou sante ar lazwa
13zot pou sant devan LESEGNER akoz li pe vini,
li vini pou regn lor later.
Li pou regn lor lemond avek lazistis
lor bann pep selon laverite.
Currently Selected:
Psom 96: KMOTPOR
Highlight
Copy
Compare
Share
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
